ບິລ ເກດ ຈັບມື ຊຳຊຸງ ເປີດຕົວໂຖວິດບໍ່ໃຊ້ນ້ຳ
ບິລ ເກດ ຮ່ວມກັບ ທີມນັກວິໄຈບໍລິສັດຊຳຊຸງ ເປີດຕົວໂຖວິດນະວັດຕະກຳໃໝ່ສຸດລ້ຳ ໃຊ້ຄວາມຮ້ອນແທນນ້ຳ ກຳຈັດຂອງເສຍຈູດໃຫ້ໝົດເປັນຂີ້ເຖົ່າ.
ເຮັດໃຫ້ປະຊາຊົນທົ່ວໂລກຕື່ນເຕັ້ນຢ່າງໜັກ ເມື່ອ ບິລ ເກດ ຜູ້ສ້າງຕັ້ງບໍລິສັດໄມໂຄຣຊອບ ເຊິ່ງຫລ້າສຸດຜັນຕົວມາເຮັດວຽກດ້ານສັງຄົມ ໂດຍສະເພາະດ້ານສາທາລະນະສຸກ ໄດ້ຮ່ວມກັບທີມວິໄຈຂອງບໍລິສັດ Samsung ເປີດຕົວໂຖວິດນະວັດຕະກຳໃໝ່ ທີ່ໃຊ້ຄວາມຮ້ອນແທນນ້ຳໃນການຈັດການຂອງເສຍ.
ໂຖວິດ ເປັນສິ່ງປະດິດເກືອບຈະບໍ່ມີນະວັດຕະກຳໃໝ່ໆ ຫລັງຖືກປະດິດຂຶ້ນໃນປີ 1596 ໂດຍ ເຊີ ຈອນ ແຮຣິງຕັນ ໂດຍການໃຊ້ນ້ຳດີໄລ່ນ້ຳເສຍໃຫ້ໄປລວມຢູ່ບໍ່ບຳບັດ ແຕ່ຈາກຂໍ້ຈຳກັດຂອງຫລາຍພື້ນທີ່ ນ້ຳເປັນສິ່ງມີຄ່າ ແລະ ຍັງບໍ່ພຽງພໍຕໍ່ການບໍລິໂພກ ເຮັດໃຫ້ຄົນປະມານ 2,8 ພັນລ້ານຄົນທົ່ວໂລກ ມີສຸຂະອະນາໄມບໍ່ປອດໄພ ສ່ຽງຕໍ່ພະຍາດຖອກທ້ອງ ແລະ ເຮັດໃຫ້ເສຍຊີວິດໄດ້.
ຫ້ອງນ້ຳຕົ້ນແບບຂອງ Samsung ໄດ້ອອກແບບໃຫ້ເຮັດວຽກໂດຍບໍ່ຕ້ອງໃຊ້ນ້ຳ ໂດຍຂອງເສຍທີ່ເປັນຂອງແຂງຈະຖືກເຮັດໃຫ້ແຫ້ງ ແລະ ເຜົາໄໝ້ເປັນຂີ້ເຖົ່າ ຈຶ່ງປາສະຈາກເຊື້ອພະຍາດ ແລະ ປອດໄພຕໍ່ສິ່ງແວດລ້ອມ. ຂະນະທີ່ຂອງເສຍທີ່ເປັນຂອງເຫລວ ຈະໄດ້ຮັບການບຳບັດດ້ວຍຂະບວນການເຮັດໃຫ້ບໍລິສຸດທາງຊີວະພາບ ແລະ ເອົາກັບມາໃຊ້ໃໝ່.
ນອກຈາກໂຖວິດໃຊ້ໄຟຂອງ Samsung ແລ້ວ ຍັງມີນະວັດຕະກຳໂຖວິດທີ່ບໍ່ໃຊ້ນ້ຳຂອງ LooWatt ແລະ ໂຖວິດທີ່ແຍກນ້ຳປັດສະວະໄດ້ຂອງ EOOS ທີ່ໄດ້ຮັບທຶນສະໜັບສະໜູນຈາກມູນນິທິຂອງ ບິວເກດ ນຳອີກ.
