ພະເຈົ້າຊາ ທີ 3 ກະສັດຄົນໃໝ່ ແຫ່ງສະຫະລາຊະອານາຈັກອັງກິດ

ພາຍຫລັງທີ່ສົມເດັດພະລາຊີນີອາລິຊາເບດທີ 2 ສະຫວັນນະຄົດ ສົ່ງຜົນໃຫ້ຕໍາແໜ່ງປະມຸກຖືກສົ່ງຕໍ່ໃຫ້ກັບ ພະເຈົ້າຊາທີ 3 (King Charles III) ລາຊະທາຍາດອັນດັບທໍາອິດຂອອງລາຊະບັນລັງ.

ກ່ອນໜ້ານີ້ພະອົງມີຕໍາແໜ່ງເປັນເຈົ້າຊາຍແຫ່ງເວວ (Prince of Wales) ເຊິ່ງດໍາລົງຕໍາແໜ່ງມາຕັ້ງແຕ່ປີ 1969 ເປັນເວລາດົນກວ່າ 53 ປີ ເປັນຜູ້ທີ່ດໍາລົງຕໍາແໜ່ງໄດ້ຍາວນານທີ່ສຸດ.

ການເລືອກໃຊ້ນາມມະຍົດ ຖືໄດ້ວ່າເປັນການຕັດສິນໃຈທໍາອິດຂອງກະສັດຄົນໃໝ່ ເນື່ອງຈາກພະອົງມີນາມເຕັມວ່າ ຊາ ຟີລິບ ອາເທີ ຈອດຈ(Charles Philip Arthur George) ຈຶ່ງສາມາດທີ່ຈະເລືອກໃຊ້ຊື່ໃດກໍໄດ້ໃນຖານະກະສັດ.

ແລະ ເມື່ອເລືອກນາມມະຍົດເປັນພະເຈົ້າຊາ ແລ້ວ ເຮັດໃຫ້ພະອົງກາຍເປັນກະສັດອົງຄົນທີ 3 ທີ່ເລືອກໃຊ້ນາມ ຊາ ຕໍ່ຈາກພະເຈົ້າຊາ ທີ 1(ປົກຄອງໃນປີ 1625–1649) ແລະ ພະເຈົ້າຊາທີ 2 (ປົກຄອງໃນປີ 1649–1651 ແລະ 1660–1685)

ມີການຄາດເດົາວ່າພະອົງຈະໄດ້ຮັບການສະຖາປະນາຂຶ້ນເປັນກະສັດຄົນໃໝ່ຢ່າງເປັນທາງການໃນມື້ນີ້ ທີ 10 ກັນຍາ ທີ່ພະລາຊະວັງເຊນເຈມໃນກຸງລອນດອນ.