ນະຄອນເຊິນເຈິ້ນຂອງຈີນອອກກົດໃໝ່ ກະຕຸ້ນຕ່າງປະເທດລົງທຶນ
ເທສະບານນະຄອນເຊິນເຈິ້ນຂອງຈີນ ປະກາດມາດຕະການຈັດການລົງທຶນໃໝ່ ກຽມບັງຄັບໃຊ້ທ້າຍປີນີ້ ເພື່ອດຶງດູດການລົງທຶນຈາກພາຍນອກ.
ວັນທີ 9 ກັນຍາ 2022, ສຳນັກຂ່າວຊິນຮົວລາຍງານວ່າ: ເມື່ອບໍ່ດົນມານີ້, ມະຫານະຄອນເຊິນເຈິ້ນ ມົນທົນກວາງຕຸ້ງ ທາງຕອນໃຕ້ຂອງຈີນ ໄດ້ອອກມາດຕະການໃໝ່ ເພື່ອສົ່ງເສີມການລົງທຶນຂອງຕ່າງປະເທດ ເຊິ່ງຈະມີຜົນບັງຄັບໃຊ້ໃນວັນທີ 1 ພະຈິກ 2022.
ຂໍ້ບັງຄັບເບື້ອງຕົ້ນກຳນົດວ່າ: ນັກລົງທຶນຕ່າງປະເທດສາມາດເຂົ້າເຖິງອຸດສາຫະກຳ ນອກລາຍການຫ້າມຕ່າງປະເທດລົງທຶນ (negative list) ຂອງຈີນ ໂດຍເທສະບານນະຄອນເຊິນເຈິ້ນ ຈະພິຈາລະນາຄຳຂໍເຂົ້າເຖິງອຸດສາຫະກຳເຫລົ່ານັ້ນຈາກນັກລົງທຶນຕ່າງປະເທດ ຕາມກົດໝາຍ ແລະ ຂໍ້ບັງຄັບ.
ຂະນະດຽວກັນ, ເທສະບານນະຄອນເຊິນເຈິ້ນຈະສົ່ງເສີມນັກລົງທຶນຕ່າງປະເທດເຂົ້າລົງທຶນໃນຂະແໜງທຸລະກິດຫລັກ ບໍ່ວ່າຈະເປັນການຜະລິດຂັ້ນສູງ, ອຸດສາຫະກຳເກີດໃໝ່, ອຸດສາຫະກຳການອະນຸລັກພະລັງງານ ແລະ ການຄຸ້ມຄອງສິ່ງແວດລ້ອມ.
ບັນດາຜູ້ຊ່ຽວຊານເຊື່ອວ່າ: ຂໍ້ບັງຄັບໃໝ່ນີ້ກຳນົດການເຂົ້າເຖິງຂອງທຶນຕ່າງປະເທດເປັນພິເສດ, ປັບປຸງສິ່ງອຳນວຍຄວາມສະດວກທາງການລົງທຶນຂອງທຸລະກິດທີ່ໃຊ້ເງິນທຶນຕ່າງປະເທດ ແລະ ປົກປ້ອງສິດ ແລະ ຜົນປະໂຫຍດອັນຖືກຕ້ອງຕາມກົດໝາຍຂອງນັກລົງທຶນຕ່າງປະເທດຕາມເງື່ອນໄຂທ້ອງຖິ່ນ.
ນອກຈາກນີ້, ການນຳສະເໜີຂໍ້ບັງຄັບໃໝ່ນີ້ຍັງສະແດງບາດກ້າວສຳຄັນຂອງເທສະບານນະຄອນເຊິນເຈິ້ນໃນການສ້າງສະພາບແວດລ້ອມທາງທຸລະກິດທີ່ໂປ່ງໃສ, ໝັ້ນຄົງ ແລະ ຄາດການໄດ້ແກ່ນັກທຸລະກິດຕ່າງປະເທດ.
ກົມການຄ້າແຫ່ງເທສະບານນະຄອນເຊິນເຈິ້ນໃຫ້ຂໍ້ມູນວ່າ: ມູນຄ່າການໃຊ້ເງິນທຶນຕ່າງປະເທດທີ່ແທ້ຈິງຂອງເທສະບານນະຄອນເຊິນເຈິ້ນສູງເກີນ 2.100 ລ້ານໂດລາສະຫະລັດ ໃນໄຕມາດທຳອິດຂອງປີນີ້ ເພີ່ມຂຶ້ນ 32% ເມື່ອທຽບໃສ່ແຕ່ລະປີ.
ປັດຈຸບັນ, ເທສະບານນະຄອນເຊິນເຈິ້ນເປັນທີ່ຕັ້ງຂອງບໍລິສັດຈາກ 160 ກວ່າປະເທດ ແລະ ພາກພື້ນ ແລະ ອະນຸມັດໂຄງການລົງທຶນໂດຍກົງຈາກຕ່າງປະເທດຫລາຍກວ່າ 1 ແສນໂຄງການແລ້ວ ນັບຮອດເດືອນພຶດສະພາຜ່ານມາ.
