ປະທານສານປະຊາຊົນສູງສຸດ ເນັ້ນໃຫ້ຜູ້ພິພາກສາຊັ້ນສອງ ແລະ ຊັ້ນໜຶ່ງ ເອົາໃຈໃສ່ 5 ບັນຫາສຳຄັນ

ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ໂອ້ລົມຕໍ່ກອງປະຊຸມຜູ້ພິພາກສາຊັ້ນສອງ ແລະ ຜູ້ພິພາກສາຊັ້ນໜຶ່ງສໍາລັບສານປະຊາຊົນພາກໃຕ້ ແລະ ສານປະຊາຊົນ 5 ແຂວງພາກໃຕ້ປະຈໍາປີ 2022 ໃນວັນທີີ 8 ກັນຍາ 2022 ນີ້ ທີ່ເມືອງປາກຊ່ອງ ແຂວງຈໍາປາສັກ.

ໃນໂອກາດໂອ້ລົມ ທ່ານ ປະທານສານປະຊາຊົນສູງສຸ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜູ້ພິພາກສາທີ່ໄດ້ພ້ອມກັນປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ແລະ ມີຜົນສຳເລັດ ແລະ ເພື່ອຮັບປະກັນໃຫ້ວຽກງານວິຊາການໃນຕໍ່ໜ້າ ຈຶ່ງຮຽກຮ້ອງໃຫ້ພ້ອມກັນເອົາໃຈໃສ່ຕື່ມບາງບັນຫາຄື:

1. ສືບຕໍ່ເອົາໃຈໃສ່ເຮັດໃຫ້ດີທີ່ສຸດໃນການຄົ້ນຄວ້າສໍານວນຄະດີໃຫ້ມີຄວາມລະອຽດຖືກຕ້ອງ ແລະ ຍຸຕິທໍາ ເພື່ອກໍານົດເຫດການຂອງຄະດີໃຫ້ແຈ້ງວ່າການຮ້ອງຟ້ອງຂອງໂຈດມີແນວໃດ, ຮ້ອງຟ້ອງເລື່ອງຫຍັງ ຈໍາເລີຍແກ້ຟ້ອງ ຫລື ໂຕ້ແຍ່ງແນວໃດ, ມີປະເດັນໃດແດ່ທີ່ເປັນຂໍ້ຄັດແຍ່ງກັນມີຈັກບັນຫາ, ຂໍ້ມູນຂອງໂຈດ ແລະ ຈໍາເລີຍ ມີອັນໃດແດ່, ຕ້ອງເກັບກໍາຂໍ້ມູນຫລັກຖານຢ່າງຄົບຖ້ວນທຸກປະເດັນທີ່ໂຈດ ແລະ ຈໍາເລີຍສະເໜີມາ. ພ້ອມທັງນໍາເອົາຂໍ້ມູນຫລັກຖານທີ່ ເກັບມາໄດ້ຢ່າງຄົບຖ້ວນນັ້ນມາຄົ້ນຄວ້າພິຈາລະນາຢ່າງຮອບດ້ານ ບໍ່ວ່າດ້ານທີ່ມີເຫດຜົນ ຫລື ບໍ່ມີເຫດຜົນ ຕ້ອງນໍາມາພິຈາລະນາ ແລະ ກວດກາທັງໝົດ ເພື່ອເປັນບ່ອນອີງໃຫ້ແກ່ການຕັດສິນຢ່າງພາວະວິໄສຂອງຄະນະສານຕັດສິນ, ຂັ້ນຕົ້ນຕ້ອງເອົາໃຈໃສ່ເກັບກໍາຂໍ້ມູນ, ຫລັກຖານໃຫ້ຄົບຖ້ວນ, ຮອບດ້ານເລິກເຊິ່ງແທ້ໆ.
2. ເພີ່ມທະວີຄວາມຮັບຜິດຊອບໃນການຂຽນຄໍາຕັດສິນ, ຄໍາພິພາກສາໃຫ້ມີຄວາມເປັນເອກະພາບສູງຕາມແບບແຜນທີ່ສານປະຊາຊົນສູງສຸດແຈກຢາຍໃຫ້ ເປັນຕົ້ນທາງດ້ານໂຄ່ງຮ່າງ, ເນື້ອໃນຕ້ອງໃຫ້ຮັດກຸມ, ໂດຍສະເພາະພາກວິນິດໃສຕ້ອງໃຫ້ລະອຽດ, ຮອບຄອບ, ຈະແຈ້ງຕອບທຸກບັນຫາ ແລະ ທຸກຂໍ້ສະເໜີຂອງຄູ່ຄວາມ.
3. ຜູ້ພິພາກສາຕ້ອງເອົາໃຈໃສ່ກວດກາຄໍາຕັດສິນ ແລະ ຄໍາພິພາກສາຂອງຕົນໃຫ້ຖືກຕ້ອງ ແລະ ເປັນເອກະພາບຕາມໂຄງຮ່າງທີ່ສານປະຊາຊົນສູງສຸດໄດ້ຝຶກອົບຮົມໃຫ້, ກວດກາການກໍານົດເຫດການຂອງຄະດີ, ການປະຕິບັດລະບຽບການດໍາເນີນຄະດີ ແລະ ການນໍາໃຊ້ມາດຕາຂອງກົດໝາຍເຂົ້າໃນການແກ້ໄຂຄະດີ, ກວດກາເຕັກນິກການພິມເປັນຕົ້ນການໃສ່ເລກທີ, ລົງວັນທີຂອງຄະດີ, ການນໍາໃຊ້ຫລັກໄວຍາກອນ ຫລື ຄໍາສັບຕ່າງໆ. ເພື່ອນໍາມາເປັນຂໍ້ມູນໃນການສຶກສາອົບຮົມ ແລະ ປັບປຸງແກ້ໄຂໃຫ້ດີຂຶ້ນເທື່ອລະກ້າວ.
4. ຜູ້ພິພາກສາຍາມຕ້ອງມີຄະຕິເຕືອນໃຈຢູ່ສະເໝີ ແລະ ປະຕິບັດຕາມຄໍາຂວັນຂອງສານທີ່ວ່າ: “ການບໍລິການດ້ວຍຄວາມຍິ້ມແຍ້ມແຈ່ມໃສຊ່ວຍແກ້ໄຂຄະດີໄດ້ບາດກ້າວໜຶ່ງ, ເຮັດວຽກດ້ວຍຄວາມສັດຊື່ສຸດຈະລິດ ຄືບາດກ້າວທໍາອິດຂອງການຕັດສິນທີ່ຖືກຕ້ອງ”.
5. ເພີ່ມທະວີການປະສານສົມທົບກັບອໍານາດການປົກຄອງທຸກຂັ້ນ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງເພື່ອສຶກສາອົບຮົມ, ໂຄສະນາເຜີຍເເຜ່ກົດໝາຍໃຫ້ເເກ່ປະຊາຊົນ ແລະ ສ້າງເງື່ອນໄຂໃຫ້ປະຊາຊົນໄດ້ມີສ່ວນຮ່ວມໃນການດໍາເນີນຄະດີຫລາຍຂຶ້ນ.