ລາວເປີດໂຄງການສ້າງຄວາມເຂັ້ມແຂງດ້ານການຄົ້ນຄວ້າ ແລະ ພັດທະນາການປະມົງ

ເມື່ອທ້າຍອາທິດຜ່ານມາ, ກະຊວງກະສິກໍາ ແລະ ປ່າໄມ້ ຮ່ວມກັບອົງການໄຈກາ ເປີດ ໂຄງການສ້າງຄວາມເຂັ້ມແຂງດ້ານການຄົ້ນຄວ້າ ແລະ ພັດທະນາການປະມົງ ແລະ ການລ້ຽງສັດນໍ້າ ຢູ່ ສປປ ລາວ. ຢູ່ສູນພັດທະນາການລ້ຽງປາ ກົມລ້ຽງສັດ ແລະ ການປະມົງ ກະຊວງກະສິກໍາ ແລະ ປ່າໄມ້ (ນໍ້າຊວງ). ໂດຍການເປັນປະທານຮ່ວມຂອງທ່ານ ລຽນ ທິແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້. ທ່ານ ທາເຄຊິ ຣິກິຣາຣະ (Takeshi HIKIHARA) ເອກອັກຄະຣາຊະທູດຍີ່ປຸ່ນປະຈໍາ ລາວ,  ຊຶ່ງແມ່ນໂຄງການໜຶ່ງທີ່ໄດ້ຮັບການຊ່ວຍເຫຼືອລ້າຈາກລັດຖະບານຍີ່ປຸ່ນລວມມີມູນຄ່າທັງໝົດ 714 ລ້ານເຢັນ ຫຼື ປະມານ 6,9 ລ້ານໂດລາສະຫະລັດ. ເພື່ອສ້າງຄວາມເຂັ້ມແຂງທາງດ້ານໂຄງລ່າງພື້ນຖານໃຫ້ແກ່ສູນ ແລະ ສະໜັບສະໜູນດ້ານວິຊາການສໍາລັບວຽກງານວິໄຈ, ການຄົ້ນຄວ້າ ແລະ ການພັດທະນາການປະມົງ ແລະ ໄລຍະເວລາໃນການຈັດຕັ້ງປະຕິບັດໂຄງການແມ່ນເລີ່ມມາແຕ່ ເດືອນ ພຶດສະພາ 2015 ແລະ ຈະສິ້ນສຸດໃນເດືອນ ກໍລະກົດ 2018.

ຂ່າວໃຫ້ຮູ້ອີກວ່າ: ໃນວັນດຽວກັນນີ້, ຊາວໜຸ່ມກະຊວງກະສິກໍາ ແລະ ປ່າໄມ້ ຮ່ວມກັບຊາວໜຸ່ມສູນກາງຊາວໜຸ່ມປະຊາຊົນປະຕິວັດລາວ ຈັດພິທີປ່ອຍປາ ເນື່ອງໃນວັນອະນຸລັກສັດນໍ້າ ແລະ ສັດປ່າແຫ່ງຊາດ ( 13 ກໍລະກົດ) ທີ່ຜ່ານມາ, ພ້ອມທັງເປັນການສ້າງກິດຈະກໍາ ເພື່ອສະເຫລີມສະຫລອງວັນສໍາຄັນຂອງຊາດ ເປັນຕົ້ນ: ວັນຍຶດອໍານາດ 23 ສິງຫາ, ວັນລັດຖະທໍາມະນູນ 15 ສິງຫາ ແລະ ວັນສໍາຄັນອື່ນໆ. ໂດຍການເຂົ້າຮ່ວມຂອງທ່ານ ຮອງລັດຖະມົນຕີ ກະຊວງກະສິກໍາ-ປ່າໄມ້ ພວງປາຣິສັກ ປຣະວົງວຽງຄໍາ.