ລາວ ຈະສືບຕໍ່ປົກປັກຮັກສາຊັບສິນທາງວັດທະນະທໍາ

ວັນທີ 7 ກັນຍານີ້, ທ່ານ ວັນສີ ກົວມົວ ຮອງລັດຖະມົນຕີກະຊວງ ຖວທ ໄດ້ເຂົ້າຮ່ວມກອງປະຊຸມສາກົນ ການປົກປັກຮັກສາຊັບສິນທາງວັດທະນະທໍາ, ການປ້ອງກັນການລັກລອບຄ້າຂາຍຊັບສິນທາງວັດທະນະທໍາ ແບບຜິດກົດໝາຍໃນອາຊຽນທີ່ຣາຊະອານາຈັກກຳປູເຈຍແບບທາງໄກ ພາຍໃຕ້ການເປັນປະທານຂອງທ່ານນາງ ເຜີ້ງ ສັກໂກນາ ລັດຖະມົນຕີກະຊວງວັດທະນະທຳ ແລະ ສິລະປະກຳແຫ່ງຣາຊາອະນາຈັກກຳປູເຈຍ ໂດຍມີບັນດາລັດຖະມົນຕີວັດທະນະທຳອາຊຽນ ເຂົ້າຮ່ວມ.

ທ່ານ ວັນສີ ກົວມົວ ກ່າວຕໍ່ກອງປະຊຸມວ່າ: ປັດຈຸບັນ, ການປ້ອງກັນການລັກລອບຄ້າຂາຍຊັບສິນທາງວັດທະນະທໍາ ແມ່ນສິ່ງທ້າທາຍໜຶ່ງໃນຂົງເຂດການຮ່ວມມືວັດທະນະທຳ ແລະ ສິລະປະໃນອາຊຽນ ແລະ ໃນໂລກ. ສໍາລັບ ສປປ ລາວ ມີຫລາຍກໍລະນີການລັກລອບພະພຸດທະຮູບຢູ່ວັດວາອາຮາມ ແລະ ສະຖານບູຮານ ໂດຍກຸ່ມຄົນບໍ່ດີຈຳນວນໜຶ່ງ ຊຶ່ງຊັບສິນທາງວັດທະນະທໍາ ທີ່ຖືກລັກໄປນັ້ນໄດ້ຖືກນໍາໄປໂຄສະນາ ແລະ ປະມູນລາຄາຂາຍຜ່ານທາງອອນລາຍເຊັ່ນ: ເຟສບຸກ, ຕິກຕອກ, ຢູທູບ ແລະ ຮູບແບບອອນລາຍ ອື່ນໆເຮັດໃຫ້ຫຍຸ້ງຍາກຕໍ່ການສືບຫາບຸກຄົນເຫລົ່ານັ້ນ. ບາງກໍລະນີວັດຖຸທີ່ເຈົ້າໜ້າທີ່ຈັບ ແລະ ຢຶດມາໄດ້ ຈໍານວນໜຶ່ງບໍ່ມີເອກະສານສະແດງເຖິງຜູ້ເປັນເຈົ້າຂອງກໍາມະສິດ ຊຶ່ງເປັນບັນຫາປະກອບສໍານວນ ເອກະ ສານທະບຽນບັນຊີວັດຖຸທີ່ໄດ້ຮັບການຢັ້ງຢືນຢ່າງຖືກຕ້ອງຕາມກົດໝາຍສົ່ງໃຫ້ຕໍາຫລວດພາຍໃນ ແລະ ຕໍາ ຫລວດສາກົນ ເພື່ອເປັນຫລັກຖານສືບຫາ ແລະ ແຈ້ງຄືນຫາເຈົ້າຂອງກໍາມະສິດໃນເວລາພົບເຫັນ. ເພື່ອແກ້ໄຂບັນຫາດັ່ງກ່າວ, ລັດຖະບານລາວ ໄດ້ປະກາດຫລາຍນິຕິກຳ ເພື່ອສົ່ງເສີມການປ້ອງກັນ ແລະ ປົກປັກຮັກສາການລັກລອບຄ້າຂາຍຊັບສິນມໍລະດົກທາງວັດທະນະທຳໃນຂອບເຂດທົ່ວປະເທດ ໂດຍໃນຕໍ່ໜ້າ, ຈະສືບຕໍ່ຄວາມຮັບຜິດຊອບຖ່າຍທອດມໍລະດົກວັດທະນະທໍາອັນລໍ້າຄ່າ ສູ່ອະນຸຊົນຮຸ່ນຕໍ່ໆໄປເພື່ອອະນຸລັກ, ສົ່ງເສີມ ແລະ ປົກປັກຮັກສາໃຫ້ຍືນຍົງຄົງໄວ້ໃນພາກພື້ນ; ຈະສືບຕໍ່ຮ່ວມກັນຢ່າງກິດຊິດຕິດແທດກັບບັນ ດາຄູ່ຮ່ວມພາຍນອກ ແລະ ອົງການປົກຄອງທ້ອງຖິ່ນສຶກສາແຫລ່ງມໍລະດົກ ແລະ ວັດຖຸບູຮານເພຶ່ອຂຶ້ນທະ ບຽນ, ບັນທຶກເຂົ້າໃນບັນຊີໃຫ້ຄົບຖ້ວນ ແລະ ຖືກຕ້ອງຕາມກົດໝາຍ; ສ້າງ ແລະ ປັບປຸງຖານຂໍ້ມູນ ເພື່ອສາມາດຮັບປະກັນໄດ້ວ່າ ສໍານວນເອກະສານຄົບຖ້ວນ ແລະ ວ່ອງໄວທັນເວລາໃນການສືບຖາມຕໍ່ການສະ ກັດກັ້ນການລັກລອບຄ້າຂາຍຊັບສິນທາງວັດທະນະທໍາແບບຜິດກົດໝາຍ.