ອາເມລິກາເລັ່ງປັບຂໍ້ກຳນົດ ໃຫ້ສັກວັກຊີນປ້ອງກັນໂຄວິດກະຕຸ້ນປີລະເຂັມ ຫລັງບໍ່ພົບການກາຍພັນຂອງເຊື້ອ

ແພດທຳນຽບຂາວເຜີຍກຽມໃຊ້ວັກຊີນປ້ອງກັນໂຄວິດ-19 ຄືໄຂ້ຫວັດໃຫຍ່ ເປັນການສັກຕາມລະດູການ ໂດຍເລີ່ມແຕ່ທ້າຍປີນີ້.

ທ່ານ ດຣ. ແອຊິ ຈາ ຫົວໜ້າທີມຕອບສະໜອງດ້ານໂຄວິດ-19 ຂອງທຳນຽບຂາວອາເມລິກາ ຂໍໃຫ້ຊາວອາເມລິກາທີ່ມີອາຍຸ 12 ປີຂຶ້ນໄປ ເລີ່ມເຂົ້າຮັບການສັກວັກຊີນປ້ອງກັນພະຍາດໂຄວິດ-19 ເຂັມກະຕຸ້ນ ເຊິ່ງເປັນສູດໃໝ່ທີ່ພັດທະນາຂຶ້ນສຳລັບຮັບມືເຊື້ອສາຍພັນໂອມິຄຣອນ BA.5 ໂດຍຈະເລີ່ມປັບຄວາມຖີ່ມາເປັນການສັກແບບແຕ່ລະປີແທນ.

ຂະນະທີ່ທ່ານ ດຣ. ແອນໂທນີ ເຟົາຊີ ຜູ້ອຳນວຍການສູນພະຍາດພູມແພ້ ແລະ ພະຍາດຕິດຕໍ່ແຫ່ງຊາດ ຄາດວ່າການສັກແບບແຕ່ລະປີຈະເລີ່ມແຕ່ລະດູໃບໄມ້ຫລົ່ນຂອງປີນີ້ ຄືກັບການສັກວັກຊີນໄຂ້ຫວັດໃຫຍ່ ເນື່ອງຈາກປັດຈຸບັນບໍ່ພົບການກາຍພັນທີ່ຕ່າງຈາກສາຍພັນເດີມແບບກ້າວກະໂດດ ຈຶ່ງຄາດວ່າຈະສາມາດສັກວັກຊີນປ້ອງກັນໂຄວິດແບບປີລະເທື່ອໄດ້ ໂດຍໃຊ້ວິທີປັບສູດໃນແຕ່ລະປີຕາມສາຍພັນທີ່ແພ່ລະບາດໃນເວລານັ້ນ.

ເຖິງຢ່າງໃດກໍຕາມ, ທ່ານ ດຣ. ເຟົາຊີ ຍອມຮັບວ່າ: ຖ້າເຊື້ອມີການກາຍພັນຫລາຍຂຶ້ນ ຈະຕ້ອງມາປັບແຜນການສັກໃໝ່ອີກ.

ໂດຍຫລ້າສຸດ ທາງລັດຖະບານອາເມລິກາຫາກໍສັ່ງຊື້ວັກຊີນເຂັມກະຕຸ້ນສູດໃໝ່ຫລາຍກວ່າ 170 ລ້ານໂດສ ຫລັງໄດ້ຮັບອະນຸມັດນຳໃຊ້ເປັນກໍລະນີສຸກເສີນຈາກຄະນະກຳມະການອາຫານ ແລະ ຢາ (FDA).

ສຳລັບຜູ້ຫາກໍໄດ້ຮັບເຊື້ອໂຄວິດ-19 ທາງສາທາລະນະສຸກອາເມລິກາແນະນຳໃຫ້ລໍຖ້າຢ່າງໜ້ອຍ 2 ເດືອນກ່ອນຈະເຂົ້າຮັບວັກຊີນກະຕຸ້ນສູດໃໝ່ນີ້.

ອ້າງອີງ:

https://edition.cnn.com/2022/09/06/health/covid-19-annual-booster/index.html

https://www.washingtonpost.com/health/2022/09/06/covid-booster-shot-flu-pandemic/