5 ຂໍ້ດີ – ຂໍ້ເສຍຂອງການຫລິ້ນເກມ.
ຖ້າເວົ້າເຖິງເກມ ໃນຄວາມຄິດຂອງຜູ້ໃຫຍ່ໆຫລາຍໆທ່ານອາດຈະເບິ່ງວ່າເປັນເລື່ອງໄຮ້ປະໂຫຍດ ແລະ ເສຍເວລາ ເຮັດໃຫ້ລູກຫລານເສຍເວລາໃນຊີວິດປະຈຳວັນ ບໍ່ວ່າຈະເປັນການທົບທວນບົດຮຽນ ຫລື ຊ່ວຍເຮັດວຽກເຮືອນຕ່າງໆ ເຮັດຢ່າງອື່ນນອກຈາກຫລິ້ນເກມຍັງມີປະໂຫຍດກ່ວາ, ແຕ່ຄວາມຈິງແລ້ວ ເກມນັ້ນມມີທັງຂໍ້ດີ ແລະ ຂໍ້ເສຍ ຫາກຫລິ້ນຢູ່ໃນເວລາທີ່ເໝາະສົມ ພໍດີພໍງາມ ກໍຈະເກີດປະໂຫຍດ ແລະ ພັດທະນາສະໝອງໄດ້ຄືກັນ. ມື້ນີ້ພວກເຮົາຈະມານຳສະເໜີຂໍ້ດີ – ຂໍ້ເສຍຂອງເກມມາໃຫ້ບັນດາທ່ານໄດ້ຮູ້ກັນ.
+ ຂໍ້ດີຂອງການຫລິ້ນເກມ :
- ການຫລິ້ນເກມສາມາດພັດທະນາສະໝອງໄດ້ຢ່າງຈະແຈ້ງ ເພາະເກມນັ້ນຝຶກໃຫ້ເຮົາຄິດວິເຄາະຕາມສະຖານະການຕ່າງໆ, ເບິ່ງເຖິງຄວາມເປັນໄປໄດ້ ແລະ ມີການຄາດການຂອງຮູບແບບເກມນັ້ນເປັນຂະບວນການຂັ້ນຕອນຄວາມຄິດ ຍິ່ງໄດ້ຝຶກສະໝອງໄປໃນໂຕເອງນຳອີກ ແລະ ໄດ້ຝຶກການສັງເກດແລ້ວໃຊ້ສະມາທິໃນການຫລິ້ນເກມເປັນຢ່າງດີ, ເພີ່ມ IQ ຄວາມສະຫລາດທາງສະຕິປັນຍາໄດ້ຄືກັນ.
- ປະສາດສຳຜັດກັບເກມ : ການຈັບຕ້ອງ ແລະ ສຳຜັດນັ້ນເພີ່ມຄວາມເພີດເພີນໃຫ້ແກ່ການຫລິ້ນເກມມີປະສິດທິພາບຫລາຍຂຶ້ນ ແລະ ນັ້ນກໍເປັນການຝຶກທັກສະຄວາມໄວຂອງນິ້ວມື ຫລື ຮ່າງກາຍສ່ວນຕ່າງໆຕາມເກມທີ່ຫລິ້ນ ແລ້ວອຸປະກອນທີ່ໃຊ້ຫລິ້ນເກມ ຍິ່ງສອດຄ່ອງຍິ່ງຫລິ້ນໄດ້ດີ ສາມາດພັດທະນາທັກສະຈົນກາຍເປັນນັກແຂ່ງເກມໄດ້ໃນອະນາຄົດນຳອີກ.
- ຝຶກພາສາໄປໃນໂຕ : ເກມຕ່າງໆນັ້ນສ່ວນຫລາຍຈະເປັນພາສາອັງກິດເປັນຫລັກ ຫາກທ່ານໄດ້ຫລິ້ນເປັນປະຈຳ ມັນເປັນການຝຶກ ແລະ ເປັນພາບຈື່ຈຳຂອງຄຳສັບ ຫລື ປະໂຫຍກທີ່ທ່ານເຫັນຕະຫລອດ ມັນຈະເປັນອັດຕະໂນມັດເມື່ອທ່ານເຂົ້າໃຈຄວາມໝາຍຂອງປະໂຫຍກນັ້ນວ່າແມ່ນຫຍັງ ເຊິ່ງຈະເຮັດໃຫ້ທ່ານຈື່ຄຳສັບໄດ້ຫລາຍຂຶ້ນ ແລະ ຄຳໃດທີ່ບໍ່ເຂົ້າໃຈກໍສາມາດເປີດຫາຄວາມໝາຍແປໄດ້ ທັງຍັງເປັນການຕໍ່ຍອດພາສາອັງກິດໄດ້ນຳອີກ.
- ແຂ່ງຂັນຢ່າງຈິງຈັງ ແລະ ການຫາລາຍໄດ້ຈາກການຫລິ້ນເກມ : ຫາກມີການຝຶກຝົນທຸກມື້ ແລະ ໝັ້ນໃຈໃນສີມືຂອງທ່ານ ກໍສາມາດສະໝັກແຂ່ງຂັນໃນລາຍການຕ່າງໆທີ່ໄດ້ຈັດຂຶ້ນ ນັ້ນສາມາດເພີ່ມປະສິດທິພາບຂອງຕົນເອງເມື່ອພົບກັບນັກແຂ່ງຂັນທີ່ມີສີມືເກັ່ງໆ ແລະ ເງິນລາງວັນທີ່ໄດ້ຈາກການແຂ່ງຂັນຕໍ່ລາຍການກໍບໍ່ແມ່ນໜ້ອຍໆ ການຫາລາຍໄດ້ຈາກການຫລິ້ນເກມປັດຈຸບັນມີຫລວງຫລາຍຊ່ອງທາງ ບໍ່ວ່າຈະເປັນການສະຕຣີມເກມ, ເຮັດຊ່ອງ YOUTUBE CHANNEL ຂອງຕົນເອງ ນີ້ກໍເປັນການສ້າງລາຍໄດ້ອີກຊ່ອງທາງໜຶ່ງທີ່ເປັນທີ່ນິຍົມໃນຕອນນີ້.
- ການເຂົ້າສັງຄົມ : ເກມເປັນສ່ວນໜຶ່ງທີ່ສາມາດສ້າງມະນຸດສຳພັນທີ່ດີໄດ້ ບໍ່ວ່າຈະເປັນການຫລິ້ນກັບໝູ່ ຫລື ກັບຄົນອື່ນໆ ໄດ້ມີການໂອ້ລົມແລກປ່ຽນຄວາມຄິດເຫັນຕ່າງໆໄດ້ຫລາກຫລາຍ ແລະ ເກມປັດຈຸບັນນີ້ສ່ວນຫລາຍກໍເປັນເກມສັງຄົມ ຕ້ອງພົບພໍ້ກັບຄົນອື່ນຕະຫລອດເວລາ ເກມທີ່ຕ້ອງຫລິ້ນເປັນທີມຈະເຮັດໃຫ້ທ່ານຝຶກຄວາມອົດທົນ, ເຂົ້າໃຈກັນ ແລະ ກັນ, ເຫັນອົກເຫັນໃຈ ແລະ ຄວາມສາມັກຄີໄດ້ນຳອີກ.
+ ຂໍ້ເສຍຂອງການຫລິ້ນເກມ :
- ສົ່ງຜົນເສຍຕໍ່ສາຍຕາ : ຫາກຫລິ້ນເກມຢ່າງໜັກ, ບໍ່ມີເວລາພັກສາຍຕາ ແນ່ນອນສິ່ງທີ່ຕາມມາແມ່ນຄວາມອິດເມື່ອຍອ່ອນເພຍຂອງດວງຕາທ່ານເອງ ແລະ ຫາກຫລິ້ນເປັນເວລາດົນຕິດຕໍ່ກັນຕະຫລອດ ຜົນທີ່ໄດ້ຮັບກໍຄື ສາຍຕາຈະບໍ່ດີແນ່ນອນ.
- ຫລິ້ນເກມຈົນເສຍການຮຽນ : ເວລາຫລິ້ນເກມທຸກຄົນຈະເພີດເພີນ ແລະ ຫລຸດເຂົ້າໄປຢູ່ໃນເກມຢ່າງບໍ່ຮູ້ໂຕ ຈົນບາງເທື່ອຫລິ້ນຈົນລືມເວລາເບິ່ງບົດຮຽນ, ໃຈຈົດຈໍ່ຢູ່ນຳເກມຕະຫລອດເວລາ ຈົນບໍ່ຄິດເຖິງສິ່ງອື່ນໃດ ເຮັດໃຫ້ການຮຽນອ່ອນ.
- ສຸຂະພາບຮ່າງກາຍ : ການຫລິ້ນເກມບາງເກມໃຊ້ເວລາດົນຫລາຍ ບາງຄົນຫລິ້ນເປັນມື້ເປັນຄືນ ບໍ່ໄດ້ເຮັດການເຮັດງານຫຍັງ ອົດຫລັບອົດນອນ ເພື່ອໃຫ້ໄປເຖິງຄວາມສຳເລັດຂອງການຫລິ້ນເກມໆນັ້ນ ຈຶ່ງເຮັດໃຫ້ຍອມອົດນອນເພື່ອຫລິ້ນເກມທີ່ຕົນເອງມັກ ແລະ ແຂ່ງຂັນກັບຄົນອື່ນຈົນບໍ່ໄດ້ພັກຜ່ອນ ແລະ ແນ່ນອນວ່າມັນສົ່ງຜົນກະທົບຕໍ່ຮ່າງກາຍຂອງທ່ານໂດຍກົງ ບາງຄົນເຖິງຂັ້ນເສຍຊີວິດກໍມີ.
- ຕື່ມເງິນກັບເກມເກີນເຫດຈຳເປັນ : ແນ່ນອນວ່າເກມສະໄໝນີ້ບາງເກມຕ້ອງໃຊ້ເງິນເຂົ້າສູ້ກັນຈຶ່ງຈະໄດ້ສູ້ກັບຄົນອື່ນໆທີ່ຕື່ມເງິນຄືກັນໄດ້, ບາງຄົນເຖິງຂັ້ນລັກເອົາເງິນຂອງຜູ້ປົກຄອງໄປໃຊ້ໃນການຫລິ້ນເກມໝົດກໍມີ.
- ການຄວບຄຸມອາລົມ : ເມື່ອໃດທີ່ຫລິ້ນເກມແລ້ວມັນບໍ່ເປັນດັ່ງໃຈຕົນເອງ ອາການຂອງຄົນຫລິ້ນເກມທີ່ເອີ້ນກັນແມ່ນ ອາການຫົວຮ້ອນ ບາງຄົນອາດຄວບຄຸມອາລົມຕົນເອງບໍ່ໄດ້ກໍຈະສະແດງອາລົມອອກມາໄດ້ຢ່າງຈະແຈ້ງດ້ວຍຄວາມໃຈຮ້າຍ, ອາລົມຫງິດຫງິດ, ໂວຍວາຍ ເປັນຕົ້ນ.
ສະນັ້ນແລ້ວ, ການຫລິ້ນເກມສົ່ງຜົນດີ ແລະ ບໍ່ດີຫລວງຫລາຍ, ແຕ່ຖ້າຫາກທ່ານມີການຈຳກັດເວລາການຫລິ້ນ, ໄຈ້ແຍກການຮຽນ ແລະ ຫລິ້ນເກມໃຫ້ໄປນຳກັນໄດ້ ແລະ ຢູ່ໃນສາຍຕາຂອງຜູ້ປົກຄອງໃນການຄວບຄຸມການຫລິ້ນຂອງລູກຫລານ ເກມບໍ່ມີຄວາມອັນຕະລາຍ ບັນຫາທີ່ເກີດຂຶ້ນນັ້ນແມ່ນຢູ່ກັບໂຕຂອງຜູ້ຫລິ້ນເອງ ຖ້ານຳໄປໃຊ້ເປັນປະໂຫຍດກໍຈະເກີດຜົນດີຕາມມາອີກຫລວງຫລາຍ.
