ປະຊາກອນສູງອາຍຸ ຢູ່ ເກົາຫລີໃຕ້ ຈະເພີ່ມຂຶ້ນຫລາຍທີ່ສຸດ

ໃນວັນ​ທີ 6​ ກັນຍາ​ 2022 ສຳນັກງານ ​ສະຖິຕິແຫ່ງ​ຊາດ ຂອງ ເກົາຫລີໃຕ້ ລາຍ​ງານ​ ຕົວ​ເລກຄາດ​ຄະເນຈຳນວນ​ ປະຊາກອນ​ສູງ​ອາຍຸ ​ຢູ່ ເກົາຫລີໃຕ້ 65 ປີ ​ຂຶ້ນ​ໄປ ຈະ​ກວມ​ເອົາ​ອັດຕາ​ສ່ວນ 36,7% ຂອງ​ປະຊາກອນ​ທັງ​ໝົດ​ໃນ​ປະ​ເທດ ພາຍ​ໃນ​ປີ 2044 ສົ່ງ​ຜົນ​ໃຫ້ ສ.​ເກົາຫລີ ອາດ​ກາຍ​ເປັນ​ປະ​ເທດທີ່​ມີ​ປະຊາກອນ ​ສູງ​ອາຍຸຫລາຍ​ທີ່​ສຸດໃນ​ໂລກ ລື່ນ​ກາຍ ​ຍີ່ປຸ່ນ ຄາດ​ວ່າຈະ​ມີ​ອັດຕາ​ສ່ວນ ​ດັ່ງກ່າວ ຢູ່​ລະດັບ 36,5% ພາຍ​ໃນ​ປີ​ດຽວ​ກັນ.

ຂໍ້ມູນດັ່ງກ່າວ ແມ່ນອີງໃສ່ທ່າ​ອຽງ ປະຊາກອນຂອງ ສະຫະປະຊາຊາດ (UN) ປະຈຳ​ປີ 2022 ແລະ ທ່າ​ອຽງປະຊາກອນ ຂອງເກົາຫລີໃຕ້ ຈາກສຳນັກງານ ​ສະຖິຕິ​ແຫ່ງ​ຊາດ ເຊິ່ງຄາດວ່າອັດຕາສ່ວນ ຂອງປະຊາກອນສູງ​ອາຍຸ ຂອງ ເກົາຫລີໃຕ້ ຈະ​ເພີ່ມ​ຂຶ້ນ 17,5% ​ໃນ​ປີ 2022 ຂຶ້ນ​ສູ່ ລະດັບ 34,4% ໃນປີ 2040 ແລະ 46,4%ໃນປີ 2070. ຂະນະ​ທີ່ ຍີ່ປຸ່ນ ຈະເພີ່ມຂຶ້ນຈາກ 29,9% ໃນປີ 2022 ຂຶ້ນ​ສູ່​ ລະດັບ 35,2%ໃນປີ 2040 ແລະ 38,7%ໃນປີ 2070.ດ້ານອັດຕາສ່ວນ ປະຊາກອນໃນ ໄວເຮັດວຽກຂອງ ເກົາຫລີໃຕ້ ຫລື ຜູ້ທີ່ມີອາຍຸ 15-64 ປີ ອາດ​ຫລຸດ​ລົງ ຈາກ 71% ໃນປີ 2022 ລົງ​ມາ​ທີ່​ລະດັບ 56,8% ໃນປີ 2040 ແລະ 46,1% ໃນປີ 2070, ຫລັງ​ຈາກ ​ເຄີຍ​ຢູ່​ລະດັບ ສູງສຸດ 73,4% ໃນປີ 2012