ໝໍຜ່າຕັດຍິງຖືພາ 6 ເດືອນ ສຸດທ້າຍຕ້ອງຫຍິບໃຫ້ກັບໄປຖືພາຕໍ່ ບອກເດັກຍັງບໍ່ໃຫຍ່ສົມບູນ
ຄອບຄົວຮຽກຮ້ອງ ໝໍຜ່າຕັດຍິງຖືພາ 6 ເດືອນ ສຸດທ້າຍຕ້ອງຫຍິບຄືນ ບອກເດັກຍັງບໍ່ໃຫຍ່ສົມບູນ ໃຫ້ກັບເຮືອນໄປຖືພາຕໍ່ ຫລ້າສຸດອາການໜັກ.
ໃນວັນທີ 2 ກັນຍາ 2022, ເວັບໄຊໜັງສືພິມ Hindustan Times ລາຍງານກໍລະນີ ໝໍຊາວອິນເດຍຜ່າຕັດຍິງຖືພາ 6 ເດືອນ ກ່ອນຫຍິບກັບຄືນ ໂດຍບໍ່ໄດ້ເອົາເດັກອອກມາ ອ້າງເຫດຜົນເລື່ອງເກີດກ່ອນກຳນົດ ເຮັດໃຫ້ຕໍ່ມາອາການຂອງຍິງຄົນນັ້ນເຂົ້າຂັ້ນວິກິດ.
ຢ້ອນກັບໄປເມື່ອວັນທີ 22 ສິງຫາ ຜູ້ຍິງຄົນໜຶ່ງຈາກເຂດກາຣີມຄັນ ໃນລັດອຳສຳ ປະເທດອິນເດຍ ມີອາການເຈັບທ້ອງຢ່າງກະທັນຫັນ ຂະນະຖືພາໄດ້ 6 ເດືອນ, ຜົວນາງຈຶ່ງພາໄປໂຮງໝໍເມືອງກາຣີມຄັນ ເຊິ່ງໝໍທີ່ຮັບຜິດຊອບຄື ດຣ. ເອເຄ ບິສວາສ ໝໍອາວຸໂສຄົນນີ້ຕັດສິນໃຈຜ່າຕັດໃຫ້ຄົນເຈັບ ທັງທີ່ຕາມກຳນົດເກີດຄືວັນທີ 9 ທັນວາ ຫລື ອີກປະມານ 3 ເດືອນເຄິ່ງ.
ແລະ ລະຫວ່າງການຜ່າຕັດ ໄດ້ເກີດເລື່ອງບໍ່ຄາດຝັນຂຶ້ນ ດຣ. ເອເຄ ຕັດສິນໃຈຫຍິບແຜ ໂດຍບໍ່ມີການເກີດເດັກອອກມາ ໃຫ້ເຫດຜົນນຳຄອບຄົວວ່າ: ເດັກໃນທ້ອງຍັງບໍ່ໃຫຍ່ເຕັມທີ່ ແລະ ຂໍໃຫ້ຄົນເຈັບນອນພັກຢູ່ໂຮງໝໍຕໍ່ອີກ. ຜ່ານໄປ 10ວັນ ໃນວັນທີ 31 ສິງຫາ ນາງໄດ້ຮັບອະນຸຍາດເມືອເຮືອນໄດ້ ແຕ່ສຸຂະພາບພັດອາການໜັກຈົນໜ້າເປັນຫ່ວງ ເລີ່ມມີເລືອດໄຫລອອກມາ.
ປະຊາຊົນທີ່ຮູ້ຂ່າວຕ່າງຮູ້ສຶກບໍ່ພໍໃຈ ພວກເຂົາລວມຕົວປະທ້ວງຢູ່ໜ້າໂຮງໝໍ ແຕ່ໝໍຜູ້ຖືກກ່າວຫາຍັງເກັບຕົວຢູ່ພາຍໃນຫ້ອງພັກ. ກະທັ້ງຜ່ານໄປໜຶ່ງຊົ່ວໂມງຈຶ່ງຍອມອອກມາປາກົດຕົວຕໍ່ໜ້າປະຊາຊົນ ແລະ ຍອມຮັບວ່າ: ລາວຫຍິບແຜຄືນເພາະເດັກນ້ອຍໃນທ້ອງເກີດກ່ອນກຳນົດ.
ສ່ວນຜູ້ອຳນວຍການໂຮງໝໍ ລະບຸວ່າ: ໄດ້ຈັດຕັ້ງທີມສອບສວນກ່ຽວກັບເລື່ອງນີ້ແລ້ວ ໂດຍຈະສອບຖາມຈາກທຸກຄົນທີ່ກ່ຽວຂ້ອງໃນເລື່ອງນີ້ ລວມທັງຄົນເຈັບ ແລະ ສະມາຊິກໃນຄອບຄົວຂອງນາງນຳ ແລະ ຂໍໃຫ້ຄອບຄົວສົ່ງເລື່ອງຮ້ອງຮຽນເປັນລາຍລັກອັກສອນ ຢືນຢັນວ່າຈະດຳເນີນຕາມຄວາມເໝາະສົມຖ້າພົບວ່າຂໍ້ກ່າວຫາເປັນຄວາມຈິງ.
ຜູ້ອຳນວຍການໂຮງໝໍເນັ້ນວ່າ: ຍັງກັງວົນກ່ຽວກັບສຸຂະພາບຂອງແມ່ ແລະ ລູກໃນທ້ອງ “ພາຍນອກຄົນເຈັບເບິ່ງປົກກະຕິ ແຕ່ເຮົາຕ້ອງກວດຮ່າງກາຍຂອງນາງຢ່າງລະອຽດອີກ, ທີມແພດພິເສດກຳລັງເບິ່ງແຍງເລື່ອງນີ້ຢູ່ ແລະ ຂ້າພະເຈົ້າໄດ້ໂອ້ລົມນຳຄົນເຈັບແລ້ວ ຖ້ານາງມີສະພາບແຊກຊ້ອນອື່ນໆ ນອກຈາກການຜ່າຕັດ ທີມຂອງພວກເຮົາຈະເບິ່ງແຍງທັງໝົດ”.
ທັງນີ້, ອ້າຍຂອງຄົນເຈັບເປີດເຜີຍວ່າ: ດຣ. ເອເຄ ບິສວາສ ໄດ້ສັນຍາວ່າຈະເປັນຜູ້ຈ່າຍຄ່າປິ່ນປົວທັງໝົດ.
