Liz Trust ດຳລົງຕຳແໜ່ງນາຍົກລັດຖະມົນຕີອັງກິດຄົນໃໝ່

ວັນທີ 5 ກັນຍາ 2022, ທາງການອັງກິດປະກາດຜົນການເລືອກຕັ້ງຮອບສຸດທ້າຍຢ່າງເປັນທາງການແລ້ວ ໂດຍນາງ Liz Trust ລັດຖະມົນຕີຕ່າງປະເທດຄົນປັດຈຸບັນ ໄດ້ຮັບໄຊຊະນະເໜືອທ່ານ Rishi Sunak ອະດີດລັດຖະມົນຕີການເງິນທີ່ມີຄະແນນນຳມາເປັນອັນດັບ 1 ໃນການເລືອກຕັ້ງ 5 ຮອບທຳອິດ ສົ່ງຜົນໃຫ້ນາງດຳລົງຕຳແໜ່ງຜູ້ນຳພັກ Conservatives ແລະ ນາຍົກລັດຖະມົນຕີອັງກິດຄົນໃໝ່.

ໂດຍນາງ Lis Trust ໄດ້ຮັບຄະແນນສະໜັບສະໜູນເຖິງ 81.326 ຄະແນນ ຄິດເປັນ 57,4% ຂອງສະມາຊິກທີ່ມາໃຊ້ສິດເລືອກຕັ້ງ. ຂະນະທີ່ທ່ານ  Rishi Sunak ມີຄະແນນສຽງສະໜັບສະໜູນ 60.399 ຄະແນນ ຄິດເປັນ 42,6% ເຊິ່ງໃນການເລືອກຕັ້ງຜູ້ນຳຄົນໃໝ່ນີ້ ມີສະມາຊິກພັກ Conservatives ອອກມາໃຊ້ສິດເລືອກຕັ້ງສູງເຖິງ 82,6%.

ຜົນການເລືອກຕັ້ງໃນຮອບສຸດທ້າຍນີ້ ເຮັດໃຫ້ນາງ Liz Trust ກາຍເປັນຜູ້ນຳພັກ Conservatives ແລະ ນາຍົກລັດຖະມົນຕີອັງກິດທີ່ເປັນຜູ້ຍິງຄົນທີ 3 ໃນປະຫວັດສາດການເມືອງຂອງປະເທດນີ້ ໂດຍຄາດວ່ານາງຈະເຂົ້າຮັບຕຳແໜ່ງຜູ້ນຳຄົນໃໝ່ຕໍ່ຈາກນາຍົກລັດຖະມົນຕີ ບໍຣິສ ຈອນສັນ ຢ່າງເປັນທາງການໃນວັນທີ 6 ກັນຍານີ້ ແລະ ຢູ່ຕໍ່ຈົນຄົບວາລະຂອງທ່ານ ຈອນສັນ.

ຕາມກຳນົດ, ອັງກິດຈະຈັດການເລືອກຕັ້ງທົ່ວໄປຄັ້ງຕໍ່ໄປຂຶ້ນບໍ່ເກີນວັນທີ 24 ມັງກອນ 2025. ເຖິງຢ່າງໃດກໍຕາມ, ຜູ້ຊະນະການເລືອກຕັ້ງຄັ້ງນີ້ອາດສະເໜີໃຫ້ມີການຍຸບສະພາ ແລະ ເລືອກຕັ້ງກ່ອນກຳນົດດັ່ງກ່າວໄດ້ ເພື່ອຢຸດບັນຫາທີ່ອາດຈະເກີດຂຶ້ນພາຍໃນລັດຖະສະພາ.