ຕຳຫລວດນຳຈັບຄົນຮ້າຍ 2 ຄົນ ກໍ່ເຫດໄລ່ແທງປະຊາຊົນໃນປະເທດການາດາ ເຮັດໃຫ້ມີຄົນເສຍຊີວິດ 10 ຄົນ ບາດເຈັບ 15 ຄົນ

ເວລາ 5:30 ນາທີ ຂອງວັນທີ 4 ກັນຍາ 2022 ເກີດເຫດຄົນຮ້າຍ 2 ຄົນ ກໍ່ເຫດໄລ່ແທງປະຊາຊົນໃນ the James Smith Cree Nation ເຊິ່ງຢູ່ໃນແຂວງ ຊັສແຄດເຊວັນ ຂອງປະເທດການາດາ, ຕຳຫລວດເປີດເຜີຍຂໍ້ມູນໃນເວລາຕໍ່ມາ ວ່າມີຄົນຮ້າຍ 2 ຄົນ ຄື: ທ້າວ ດາມຽນ ແລະ ທ້າວ ໄມ ແຊນເດີສັນ ໄດ້ໄລ່ແທງປະຊາຊົນດ້ວຍວີທີການສຸ່ມ ແຈກຢາຍກໍ່ເຫດ 13 ຈຸດ ເຮັດໃຫ້ມີຄົນເສຍຊີວິດແລ້ວ 10 ຄົນ ບາດເຈັບ 15 ຄົນ

ພາຍຫລັງໄດ້ຮັບແຈ້ງເຫດເຈົ້າໜ້າທີ່ຕຳຫລວດໄດ້ປະກາດແຈ້ງເຕືອນໃຫ້ປະຊາຊົນທີ່ຢູ່ໃກ້ຈຸດເກີດເຫດຫາບ່ອນຫລົບໄພ ກ່ອນຈະຍົກລະດັບປະກາດເຕືອນໄພສະຖານະການຄວບຄຸມພື້ນທີ່ທັງໝົດ ແລະ ມີແນວໂນ້ມອາດກໍ່ເຫດຊ້ຳໃນຈຸດອື່ນໆອີກ ມາຮອດປັດຈຸບັນຍັງບໍ່ສາມາດຈັບຕົວຄົນຮ້າຍໄດ້

ທ່ານ ຈັສຕິນ ທຣູໂດ ນາຍົກລັດຖະມົນຕີການາດາ ອອກຖະແຫລ່ງຂ່າວເຖິງເຫດການດັ່ງກ່າວວ່າ: ເປັນເລື່ອງທີ່ເປັນຕາຢ້ານ ແລະ ເຮັດໃຫ້ເສົ້າໃຈ ໂດຍລັດຖະບານກຳລັງຕິດຕາມສະຖານະການຢ່າງໃກ້ຊິດ, ນີ້ແມ່ນຄວາມຮຸນແຮງທີ່ເກີດຂຶ້ນໂດຍບໍ່ມີເຫດຜົນ ແລະ ບໍ່ມີຄຳໃດທີ່ຈະອະທິບາຍຄວາມສູນເສຍທີ່ເກີດຂຶ້ນໄດ້