ສປປ ເກົາຫລີ ອອກໂປສເຕີ ຕໍ່ຕ້ານອາເມລິກາຊຸດໃໝ່
ລັດຖະບານພຽງຢາງເຜີຍແຜ່ໂປສເຕີໂຄສະນາຊວນເຊື່ອຕໍ່ຕ້ານອາເມລິກາຊຸດໃໝ່ໃນອາທິດນີ້ ທີ່ມີເນື້ອໃນມຸ່ງໂຈມຕີອາເມລິກາ ແລະ ມະຕິຂວ້ຳບາດຄັ້ງໃໝ່ຂອງສະພາຄວາມໝັ້ນຄົງແຫ່ງສະຫະປະຊາຊາດ.
+ ສະພາຄວາມໝັ້ນຄົງ ສປຊ ລົງມະຕິເປັນເອກະພາບ ຂວ້ຳບາດ ສປປ ເກົາຫລີ ໜັກຂຶ້ນ
+ ສປປ ເກົາຫລີ ຂູ່ຍິງລູກສອນໄຟຖະຫລົ່ມ ພື້ນທີ່ໃກ້ເກາະກວມຂອງອາເມລິກາ
ສຳນັກຂ່າວຕ່າງປະເທດລາຍງານຈາກນະຄອນຫລວງເຊອຸນ ປະເທດ ສ.ເກົາຫລີ ໃນວັນທີ 20 ສິງຫາວ່າ: ສຳນັກຂ່າວກາງເກົາຫລີ (KCNA) ເຜີຍແຜ່ໂປສເຕີໂຄສະນາຊວນເຊື່ອຕໍ່ຕ້ານອາເມລິກາຊຸດໃໝ່ເຖິງ 6 ພາບໃນອາທິດນີ້. ພຽງ 2 ອາທິດຫລັງສະພາຄວາມໝັ້ນຄົງແຫ່ງສະຫະປະຊາຊາດ (UNSC) ອອກມາດຕະການຂວ້ຳບາດຊຸດໃໝ່ຕໍ່ ສປປ ເກົາຫລີ ແລະ ບັນຍາກາດເຄັ່ງຕຶງທີ່ເປັນການສາດສົງຄາມນ້ຳລາຍໃສ່ກັນຢ່າງດຸເດືອດໃນຕົ້ນເດືອນນີ້ ລະຫວ່າງປະທານາທິບໍດີ ໂດນັນ ທຣຳ ກັບລັດຖະບານພຽງຢາງຂອງທ່ານ ກິມ ຈອງອຶນ ລວມທັງຄຳຂູ່ຂອງຜູ້ນຳສູງສຸດ ສປປ ເກົາຫລີ ໃນການຍິງລູກສອນໄຟໂຈມຕີເກາະກວມ.
ທັງນີ້, ໂປສເຕີທັງໝົດມີເນື້ອໃນຄ້າຍຄືກັນ ຄືການໂຈມຕີອາເມລິກາ ແລະ ການສະແດງຄວາມບໍ່ພໍໃຈຢ່າງໜັກຕໍ່ມາດຕະການຂວ້ຳບາດ ໂດຍພາບຢູ່ໂປສເຕີໃບໜຶ່ງສະແດງໃຫ້ເຫັນລູກສອນໄຟຫລາຍລຳລອຍສູ່ແຜ່ນດິນຂອງອາເມລິກາທີ່ກຳລັງລຸກເປັນໄຟ, ພ້ອມຄຳວ່າ: “ແຜ່ນດິນໃຫຍ່ຂອງອາເມລິກາຢູ່ພາຍໃຕ້ໄລຍະການຍິງລູກສອນໄຟ”. ຂະນະທີ່ໂປສເຕີແບບຕໍ່ມາສະແດງພາບລູກສອນໄຟຈຳນວນຫລາຍລອຍອອກຈາກທຸງຊາດ ສປປ ເກົາຫລີ ໄປທຳລາຍອາຄານສະພາຄອງເກຣດ ຢູ່ນະຄອນຫລວງວໍຊິງຕັນ ແລະ ຈີກທຸງຊາດອາເມລິກາຂາດ ພ້ອມຂໍ້ຄວາມວ່າ: “ນີ້ຄືຄຳຕອບຂອງເຮົາ !”. ສຳລັບມາດຕະການຂວ້ຳບາດຄັ້ງໃໝ່ຂອງ UNSC ທີ່ອາເມລິກາເປັນຜູ້ຊຸກຍູ້, ສ່ວນໂປສເຕີອີກແບບໜຶ່ງເປັນລົດຕັງແບບລູກສອນໄຟທີ່ກຳລັງແລ່ນໄປທາງໜ້າ ພ້ອມຂໍ້ຄວາມໂຈມຕີການຂວ້ຳບາດຂອງ UNSC ແລະ ອາເມລິກາ ແລະ ຂໍ້ຄວາມວ່າ: “ບໍ່ມີໃຜສາມາດຢຸດການກ້າວໄປຂ້າງໜ້າຂອງເຮົາໄດ້ !”.
