ໄວຣັດໄຂ້ຫວັດໃຫຍ່ສາຍພັນໃໝ່ລະບາດ ເຮັດໃຫ້ລາຄາເປັດໄກ່ຢູ່ມຽນມາຕົກຕໍ່າ
ການແຜ່ລະບາດຂອງເຊື້ອໄວຣັສໄຂ້ຫວັດໃຫຍ່ສາຍພັນໃໝ່ຊະນິດ A (H1N1) 2009 ຢູ່ມຽນມາ ສົ່ງຜົນເຮັດໃຫ້ລາຄາເປັດໄກ່ຢູ່ນະຄອນຫລວງຢາງກຸ້ງຫລຸດລົງເຄິ່ງໜຶ່ງ, ຂະນະທີ່ຈຳນວນຜູ້ເສຍຊີວິດຈາກການຕິດເຊື້ອມີ 27 ຄົນ.
ສຳນັກຂ່າວຊິນຮົວຂອງທາງການຈີນລາຍງານວ່າ: ຈາກການສຳຫລວດລາຄາເປັດໄກ່ໃນຕະຫລາດຂອງມຽນມາພົບວ່າ: ໄກ່ໂຕໜຶ່ງ 1,6 ກິໂລ ປັດຈຸບັນມີລາຄາ 1.700 ຈາດ (ປະມານ 10.000 ກີບ) ຈາກລາຄາປົກກະຕິທີ່ເຄີຍຂາຍກ່ອນໜ້ານີ້ 3.200 ຈາດ (ປະມານ 20.000 ກີບ) ແລະ ຫລຸດລົງຈາກລາຄາສູງສຸດທີ່ເຄີຍຂາຍກ່ອນໜ້ານີ້ເຖິງ 50%.
+ ຈຳນວນຜູ້ເສຍຊີວິດຈາກພະຍາດ ໄຂ້ຫວັດໃຫຍ່ສາຍພັນໃໝ່ ຢູ່ມຽນມາເພີ່ມເປັນ 10 ຄົນ
+ ມຽນມາຮຽກຮ້ອງປະຊາຊົນ ຢ່າແຕກຕື່ນໄວຣັສໄຂ້ຫວັດໝູ
ຂະນະທີ່ກະຊວງສາທາລະນະສຸກ ແລະ ກິລາລາຍງານວ່າ: ຈຳນວນຜູ້ເສຍຊີວິດຈາກການຕິດເຊື້ອໄວຣັດໄຂ້ຫວັດໃຫຍ່ສາຍພັນໃໝ່ຊະນິດ A (H1N1) 2009 ໃນປະເທດ ວັນທີ 18 ສິງຫາ ເພີ່ມຂຶ້ນມາຢູ່ 27 ຄົນ ຫລັງມີຄຳຢືນຢັນຜູ້ຕິດເຊື້ອລາຍໃໝ່. ຫລ້າສຸດພົບຜູ້ຕິດເຊື້ອແລ້ວທັງໝົດ 277 ຄົນ ນັບແຕ່ເຊື້ອໄວຣັດແຜ່ລະບາດໃນວັນທີ 21 ກໍລະກົດ. ເຖິງຢ່າງໃດກໍດີ, ຍັງບໍ່ພົບເຈົ້າໜ້າທີ່ສາທາລະນະສຸກຄົນໃດຕິດເຊື້ອຈາກການໃຫ້ບໍລິການຜູ້ປ່ວຍ.
ກະຊວງດັ່ງກ່າວເຕືອນໃຫ້ປະຊາຊົນປະຕິບັດຕາມຄຳແນະນຳຢ່າງເຄັ່ງຂັດ ເພື່ອປ້ອງກັນບໍ່ໃຫ້ຕິດເຊື້ອ ລວມທັງຖ້າພົບວ່າມີອາການປ່ວຍ ໃຫ້ໄປພົບແພດຢູ່ສຸກສາລາໃກ້ທີ່ສຸດ ເພື່ອປິ່ນປົວທັນທີ.
