ປັດຈຸບັນມີ 95% ຂອງຄົວເຮືອນ ໃນຂອບເຂດທົ່ວປະເທດທີ່ໃຊ້ໄຟຟ້າແບບຖາວອນ ແລະ ຄາດວ່າຮອດປີ 2030 ສາມາດບັນລຸໄດ້ 100%
ວັນທີ 2 ກັນຍາ 2022 ນີ້ ທ່ານ ປອ ດາວວົງ ພອນແກ້ວ ລັດຖະມົນຕີກະຊວງ ພະລັງງານ ແລະ ບໍ່ແຮ່ ລາຍານໃຫ້ຮູ້ວ່າ: ມາຮອດປັດຈຸບັນ ສປປ ລາວ ມີແຫຼ່ງຜະລິດພະລັງງານໄຟຟ້າທັງໝົດ 90 ແຫ່ງ, ມີກຳລັງຕິດຕັ້ງ 10 ພັນກວ່າເມັກກາວັດ ແລະ ສາມາດຜະລິດພະລັງງານໄຟຟ້າໄດ້ຫຼາຍກວ່າ 50 ພັນລ້ານກິໂລວັດໂມງຕໍ່ປີ, ໃນນີ້ມາຈາກພະລັງງານໄຟຟ້ານໍ້າຕົກ 77 ແຫ່ງ, ພະລັງງານແສງຕາເວັນ 8 ແຫ່ງ, ຊີວະມວນ 4 ແຫ່ງ ແລະ ຖ່ນຫີນ 1 ແຫ່ງ ສາມາດສະໜອງໄຟຟ້າຮັບໃຊ້ໄດ້ 100% ຂອງເທສະບານແຂວງ, ນະຄອນຫຼວງ; 100% ຂອງເທສະບານເມືອງ, ນະຄອນ; 93% ຂອງຈໍານວນບ້ານໃນທົ່ວປະເທດ ແລະ ຄອບຄົວທີ່ໄດ້ຊົມໃຊ້ໄຟຟ້າແບບຖາວອນແລ້ວກວມເຖິງ 95% ໃນປີ 2020, ປີ2025 ເພີ່ມຂຶ້ນເປັນ 98%, ຄາດວ່າຮອດປີ 2030 ສາມາດບັນລຸໄດ້ 100% ຂອງຄົວເຮືອນທັງໝົດໃນຂອບເຂດທົ່ວປະເທດ.
ໃນອະນາຄົດ ສປປ ລາວ ມີແຜນການພັດທະນາກໍ່ສ້າງແຫຼ່ງຜະລິດພະລັງງານໄຟຟ້າ ຈາກທ່າແຮງບົ່ມຊ້ອນ ແລະ ມີຄວາມອຸດົມສົມບູນທາງດ້ານຊັບພະຍາກອນທຳມະຊາດ ໂດຍສະເພາະຜະລິດພະລັງງານໄຟຟ້ານໍ້າຕົກ. ຕາມສຶກສາເບື້ອງຕົ້ນ ສປປ ລາວ ມີຄວາມສາມາດຜະລິດໄຟຟ້າຈາກນໍ້າທັງໝົດ 26.000 ເມັກກາວັດ ໄປພ້ອມໆກັບການກໍ່ສ້າງແຫຼ່ງຜະລິດພະລັງງານໄຟຟ້າ, ລັດຖະບານ ລາວ ຍັງສົ່ງເສີມການນໍາໃຊ້ພາຫານະທີ່ຂັບເຄື່ອນດ້ວຍພະລັງງານໄຟຟ້າຕື່ມອີກ.
ຄາດໝາຍສູ້ຊົນຮອດປີ 2025 ສໍາລັບພາຫະນະນໍາໃຊ້ໄຟຟ້າໃຫ້ໄດ້ຢ່າງໜ້ອຍ 1% ຫລື ປະມານ 20.000 ຄັນ (ໃນນັ້ນ ລົດຈັກ 8.000 ຄັນ, ລົດເມ-ລົດບັນທຸກຂະໜາດນ້ອຍ 150 ຄັນ ແລະ ລົດສ່ວນບຸກຄົນ 11.850 ຄັນ) ແລະ ກໍານົດແຜນພັດທະນາສະຖານີສາກຮອດປີ 2025 ໃຫ້ສາມາດຕິດຕັ້ງໄດ້ຢ່າງໜ້ອຍຈໍານວນ 50 ສະຖານີ ໂດຍການຫັນປ່ຽນ ສະຖານີເຕີມນໍ້າມັນມາເປັນສະຖານີສາກລົດ EV ຕາມເສັ້ນທາງຫລວງ ແລະ ຕາມຕົວເມືອງໃຫຍ່ ແລະ ແຜນພັດທະນາຮອດປີ 2030 ໃຫ້ຕິດຕັ້ງໄດ້ 100 ສະຖານີ ໃນຂອບເຂດທົ່ວປະເທດ.
ສປປ ລາວ ກັບບັນດາປະເທດອ້ອມຂ້າງ ແລະ ຢູ່ໃນພາກພື້ນ ໃນນີ້ເດັ່ນກວ່າໝູ່ແມ່ນການຮ່ວມມືແລກປ່ຽນຊື້-ຂາຍພະລັງງານໄຟຟ້າ 4 ປະເທດ ລາວ-ໄທ-ມາເລເຊຍ ແລະ ສິ່ງກະໂປ ທີ່ເລີ່ມດຳເນີນການປຶກສາຫາລືມາແຕ່ປີ 2014 ແລະ ໃນປີ 2017 ໂຄງການໄລຍະທີ 1 ເພື່ອສົ່ງກະແສໄຟຟ້າໃຫ້ ມາເລເຊຍຜ່ານສາຍສົ່ງຂອງໄທ ໄດ້ຮັບການຈັດຕັ້ງປະຕິບັດ, ຕໍ່ມາຫຼ້າສຸດໃນກາງປີ 2022 ນີ້ສຳເລັດການສົ່ງພະລັງງານໃຫ້ສິງກະໂປ ໃນປະລິມານ 100 ເມັກກາວັດ.
ນອກຈາກນີ້, ສປປ ລາວ ຍັງມີສັນຍາຊື້-ຂາຍໄຟຟ້າກັບ 5 ປະເທດຄື: ສສ ຫວຽດນາມ, ສປ ຈີນ, ຣາຊະອານາຈັກໄທ, ຣາຊະອານາຈັກ ກຳປູເຈຍ ແລະ ສາທາລະນະລັດ ມຽນມາ.
ພາບ-ຂໍ້ມູນຈາກ: ສູນຂ່າວພະລັງງານ ແລະ ບໍ່ແຮ່
