ສັງຄົມສະແດງຄວາມຄິດເຫັນຢາກໃຫ້ພາກສ່ວນກ່ຽວຂ້ອງຊອກວິທີແກ້ໄຂບັນຫາອາຫານ ແລະ ພືດຜັກທີ່ຢຶດໄດ້ໃຫ້ເໝາະສົມກວ່າເກົ່າ

ທ່າມກາງເຂົ້າຍາກໝາກແພງ ການທຳລາຍອາຫານການກິນທີ່ເຈົ້າໜ້າທີ່ຢຶດມາໄດ້ໂດຍການຝັງ ຫຼື ຈູດນັ້ນກາຍເປັນກະແສສັງຄົມ ໃນທາງທີ່ບໍ່ເຫັນດີເຫັນພ້ອມຢ່າງຍິ່ງ ທັງນີ້ກໍຍ້ອນວ່າ ປະຊາຊົນລາວໄດ້ຮັບຄວາມຍາກລຳບາກຈາກ ໂດຍສະເພາະຜູ້ທີ່ມີລາຍຮັບຕໍ່າ ແຕ່ຄ່າອາຫານການກິນຖີບຕົວສູງຂຶ້ນກາຍເຄິ່ງ ໂດຍສ່ວນຫລາຍແມ່ນຢາກໃຫ້ຊອກວິທີແກ້ໄຂບັນຫາທີ່ດີກວ່າເກົ່າ ເພື່ອໃຫ້ເກີດປະໂຫຍດສູງສຸດດີກວ່າຈະໄປທຳລາຍຖິ້ມ ດັ່ງນີ້ເປັນຕົ້ນ.

ເຖິງຢ່າງໃດກໍຕາມອັນໜັ້ນເປັນຄວາມຄິດເຫັນຈາກສ່ວນໜຶ່ງຂອງສັງຄົມ ແຕ່ເຮົາກໍຕ້ອງຫັນມາເບິ່ງນະໂຍບາຍ ແລະ ຂໍ້ຫ້າມດ້ານການນຳເຂົ້າພືດຜັກທັນຍາຫານ ທີ່ ສປປ ລາວ ຜະລິດໄດ້ນັ້ນ ເປັນບັນຫາໜຶ່ງທີ່ລັດຖະບານກຳລັງເລັ່ງແກ້ໄຂ, ເພາະການນຳເຂົ້າດັ່ງກ່າວ ເປັນປັດໄຈຕົ້ນຕໍທີ່ເຮັດໃຫ້ການຂະຫຍາຍ ແລະ ພັດທະນາການຜະລິດພາຍໃນຊັກຊ້າ ເນື່ອງຈາກການນຳເຂົ້າສິນຄ້າດັ່ງກ່າວແມ່ນ ມີລາຄາຖືກກວ່າ ພືດຜັກທີ່ຜະລິດພາຍໃນປະເທດ ເຊິ່ງມີຕົ້ນທຶນສູງ.

ດັ່ງນັ້ນ ປະຊາຊົນຈຶ່ງນິຍົມຂອງນອກທີ່ລາຄາຖືກກວ່າ ຈຶ່ງເປັນຊ່ອງວ່າງໃຫ້ບັນດາພໍ່ຄ້າແມ່ຄ້າສວຍໂອກາດ ລັກລອບນຳເຂົ້າ ໂດຍໃຊ້ວິທີໜີພາສີ ຫຼື ບາງກໍລະນີ ເຈົ້າໜ້າທີ່ບາງຄົນໃຫ້ທ່າ ໂດຍພໍ່ຄ້າຈ່າຍຄ່າຜ່ານນອກລະບົບ ກໍສາມາດນຳສິນຄ້າເຂົ້າມາປະເທດໄດ້. ຕາມການສຳຫຼວດຫຼັງສຸດນີ້ ການນຳເຂົ້າພືດຜັກຈາກປະເທດໄທເຂົ້າມາສະເພາະນະຄອນຫຼວງວຽງຈັນບໍ່ຫຼຸດ 60 ໂຕນຕໍ່ມື້.

ເພາະສະນັ້ນ, ການແກ້ໄຂບັນຫາດັ່ງກ່າວ ທາງເຈົ້າໜ້າທີ່ ແລະພາກສ່ວນທີ່ກ່ຽວຂ້ອງຮັບຮູ້ດີວ່າຄວນເຮັດແນວໃດ ແຕ່ທ້າທາຍຢູ່ຂອດການຈັດຕັ້ງປະຕິບັດຕົວຈິງ, ບັນຫາທີ່ພົບພໍ້ຫລາຍກວ່າໝູ່ກໍແມ່ນການຕິດຕາມກວດກາ ໂດຍສະເພາະ ເມື່ອດ່ານປະເພນີເປີດບໍລິການ ການລັກລອບການນຳເຂົ້າກໍຍິ່ງມີທ່າອ່ຽງເພີ່ມຂຶ້ນ ຫຼື ອີກກໍລະນີໜຶ່ງ ແມ່ນການຮັບເງິນປິດປາກຂອງເຈົ້າໜ້າທີ່ບາງຈຳນວນທີ່ຂາດຈັນຍາບັນ ແລະ ເມື່ອມີການຈັບໄດ້ໄລ່ທັນກໍຈະນຳມາຈູດ ຫຼື ຝັງດິນ.

ເມື່ອເປັນເຊັ່ນນັ້ນ ມວນຊົນຈຳນວນຫຼາຍຈຶ່ງມີຄຳເຫັນວ່າ ການຝັງ ຫຼື ຈູດສິນຄ້າ ກະສິກຳທີ່ຜິດກົດໝາຍດັ່ງກ່າວ ບໍ່ໄດ້ຊ່ວຍແກ້ໄຂບັນຫາໄດ້ແຕ່ຢ່າງໃດ ແຕ່ເປັນການທຳລາຍຊັບພະຍາກອນໄປລ້າໆ, ຄວນເນັ້ນ ໜັກໃສ່ການແກ້ໄຂບັນຫາທີ່ຕົ້ນເຫດ ໂດຍການບັງຄັບໃຊ້ລະບຽບກົດໝາຍໃຫ້ຜົນສັກສິດ ຄຽງຄູ່ກັບການຍົກສູງຄວາມອາດາສາມາດ ແລະຈັນຍາບັນຂອງເຈົ້າໜ້າທີ່.

ບໍ່ວ່າຈະເບິ່ງໃນແງ່ມຸມໃດ ການທຳລາຍຊັບພະຍາກອນ ໂດຍສະເພາະຜົນຜະລິດທີ່ເປັນອາຫານເຊິ່ງກຳລັງອຶດຢາກໃນປັດຈຸບັນ ເປັນວິທີການທີ່ຄວນໄດ້ຮັບການທົບທວນຄືນເຖິງຄວາມເໝາະສົມ. ການສ້າງຈິດສຳນຶກກ່ຽວກັບການນຳເຂົ້າທີ່ຜິດກົດໝາຍ ຫຼື ຕໍ່ກັບການກະທຳໃດທີ່ບໍ່ຖືກຕ້ອງນັ້ນ ຫຼາຍປະເທດທີ່ພັດທະນາ ປະຕິບັດກໍຄື ການປັບໃໝເປັນເງິນສົດ ຫຼື ຈັບເຂົ້າຄຸກ ຕໍ່ຜູ້ກະທຳຜິດ ຫຼາຍກວ່າຈະທຳລາຍຊັບພະຍາກອນ ເພື່ອເຕືອນສະຕິປະຊາຊົນ.

ໜຶ່ງໃນບູລິສິດທີ່ສຳຄັນຂອງລັດຖະບານແມ່ນເລັ່ງການຜະລິດພາຍໃນທົດແທນການນຳເຂົ້າ ໝາຍວ່າ ສິນຄ້າກະສິກຳ ເປັນຕົ້ນພືດພັນທັນຍາຫານ, ທາດຊີ້ນ, ປາ ທີ່ພວກເຮົາສາມາດຜະລິດພາຍໃນປະເທດ ຄວນຈຳກັດການນຳເຂົ້າ ແລ້ວເລັ່ງການຊຸກຍູ້ສົ່ງເສີມການຜະລິດພາຍໃນໃຫ້ເຂັ້ມແຂງ, ຖ້າຫາກຖານການຜະລິດໃຫຍ່ຂຶ້ນ ຂະແໜງການທີ່ກ່ຽວຂ້ອງ ໂດຍສະເພາະການຜະລິດ ປຸ໋ຍ, ອົງປະກອບຕ່າງໆ ຂະຫຍາຍຕົວ ກໍຈະເຮັດໃຫ້ການຜະລິດພາຍໃນມີຕົ້ນທຶນທີ່ຖືກລົງ ນຳໄປສູ່ການຄໍ້າປະກັນສະບຽງອາຫານ ແລະລາຄາທີ່ຖືກລົງ.