ອັດຕາເງິນເຟີ້ສີລັງກາໃນເດືອນສິງຫາ ເພີ່ມຂຶ້ນເກີນ 64%

ຂ່າວຕ່າງປະເທດລາຍງານ ເມື່ອວັນທີ 1 ກັນຍາທີ່ຜ່ານມານີ້, ທະນາຄານພັດທະນາອາຊີ (ADB) ໄດ້ອອກຖະແຫຼງການອະນຸມັດສິນເຊື່ອສຸກເສີນເປັນວົງເງິນ 200 ລ້ານໂດລາ ໃຫ້ແກ່ສີລັງກາ ເພື່ອຍົກລະດັບຄວາມໝັ້ນຄົງທາງດ້ານອາຫານ ແລະ ໃຫ້ຄວາມຊ່ວຍເຫຼືອແກ່ປະຊາຊົນພາຍໃນປະເທດ ອອກຈາກວິກິດຄວາມທຸກຍາກ ໂດຍສະເພາະແມ່ນເດັກນ້ອຍ ແລະ ແມ່ຍິງ.

ຂະນະທີ່ສຳນັກງານສະຖິຕິແຫ່ງຊາດຂອງສີລັງກາ ໄດ້ລາຍງານດັດຊະນີລາຄາຜູ້ບໍລິໂພກ (CPI) ຊຶ່ງເປັນໂຕເລກທາງສະຖິຕິຂັ້ນພື້ນຖານທີ່ໃຊ້ເພື່ອຄຳນວນອັດຕາເງິນເຟີ້ປະກົດວ່າ ສະຖິຕິຂອງສີລັງກາເມື່ອເດືອນສິງຫາທີ່ຜ່ານມາຢູ່ທີ່ 64,3% ເພີ່ມຂຶ້ນຈາກສະຖິຕິ 60,8% ເມື່ອເດືອນກໍລະກົດທີ່ຜ່ານມາ. ທັງນີ້,ດັດຊະນີ CPI ຂອງສີລັງກາເພີ່ມຂຶ້ນຢ່າງຕໍ່ເນື່ອງຈາກ 7,6% ເມື່ອທຽບແບບລາຍປີໃນເດືອນຕຸລາ 2021 ຂຶ້ນມາເປັນເກືອບ 40% ເມື່ອເດືອນພຶດສະພາທີ່ຜ່ານມາ ແລະ ເພີ່ມຂຶ້ນຢ່າງຕໍ່ເນື່ອງຈົນເຖິງປັດຈຸບັນ ຂະນະທີ່ເງິນຣູປີສີລັງກາອ່ອນຄ່າລົງກວ່າເຄິ່ງໜຶ່ງ ເມື່ອທຽບກັບສະກຸນເງິນໂດລານັບຕັ້ງແຕ່ຕົ້ນປີນີ້.

ເຖິງຢ່າງໃດກໍຕາມ, ການວິເຄາະໂດຍລວມຂອງມະຫາວິທະຍາໄລ ຈອນ ຮອບກິນ (Johns Hopkins) ຂອງອາເມຣິກາໄດ້ເປີດເຜີຍເມື່ອເດືອນກໍລະກົດທີ່ຜ່ານມາລະບຸວ່າ ອັດຕາເງິນເຟີ້ຂອງສີລັງກາໃນຂະນະນີ້ຢູ່ທີ່ 128% ສູງເປັນອັນດັບສອງຂອງໂລກຮອງຈາກຊິມບັນເວ ຊຶ່ງມີສະຖິຕິຢູ່ທີ່ 365%.

ຂ່າວ: ປະຊາຊົນ