ກະຊວງສາທາລະນະສຸກປະເທດໄທເຜີຍວ່າ: ວັກຊີນ ໂຄວິດເຂັມກະຕຸ້ນສາມາດປ້ອງກັນການຕິດເຊື້ອຂັ້ນຮຸນແຮງ ແລະ ເສຍຊີວິດຈາກສາຍພັນ BA.4-BA.5.

ໃນວັນທີ 1 ກັນຍາ 2022 ດຣ ໂອພາສ ການກະວິນພົງ ຫົວໜ້າກົມຄວບຄຸມພະຍາດປະເທດໄທ ໃຫ້ຮູ້ວ່າ: ສະຖານະການພະຍາດໂຄວິດ-19 ຂອງປະເທດໄທມີທິດທາງຫລຸດລົງ ສ່ວນການສັກວັກຊິນປ້ອງກັນໂຄວິດເຂັມທຳອິດກວມເອົາ 82.3% ເຂັມສອງ 77.2% ແລະ ເຂັມກະຕຸ້ນ 45.6%  ໂດຍຜູ້ສູງອາຍຸ 60 ປີ ຂຶ້ນໄປ ສັກເຂັມກະຕຸ້ນໄດ້ 50.6% ໂດຍ ສູນປະເມີນປະສິດທິພາບ ແລະ ປະສິດທິຜົນວັກຊິນ ກົມຄວບຄຸມພະຍາດ ຮ່ວມກັບ ຄະນະວິຊາການສູນປະຕິບັດສຸກເສີນທາງການແພດ ແລະ ສາທາລະນະສຸກ ກໍລະນີພະຍາດໂຄວິດ-19 ໄດ້ຕິດຕາມປະເມີນປະສິດທິຜົນຂອງວັກຊິນໂຄວິດຈາກການໃຊ້ໃນປະເທດໄທຢ່າງຕໍ່ເນື່ອງ.

ຜົນໄດ້ຮັບຂອງການນໍາໃຊ້ຕົວຈິງໃນລະຫວ່າງເດືອນພຶດສະພາ-ເດືອນກໍລະກົດ 2022 ທີ່ເປັນການລະບາດຂອງໂອມິຄອນສາຍພັນ ຍ່ອຍ BA.4-BA.5 ສະແດງໃຫ້ເຫັນວ່າການສັກຢາເຂັມກະຕຸ້ນຈະເພີ່ມປະສິດຕິຜົນໃນການປ້ອງກັນການຕິດເຊື້ອຂັ້ນຮຸນແຮງຄື ອາການ ປອດອັກເສບ ແລະ ໃສ່ທໍ່ຊ່ວຍຫາຍໃຈ ຈາກ 60% ໃນຜູ້ທີ່ໄດ້ຮັບ 2 ເຂັມ ເທົ່າກັບ 83% ແລະ 100% ໃນຜູ້ທີ່ໄດ້ຮັບ 3 ແລະ 4 ເຂັມຕາມລໍາດັບ ແລະ ປ້ອງກັນການເສຍຊີວິດຈາກ 72% ໃນຜູ້ທີ່ໄດ້ຮັບ ຄົບ 2 ເຂັມ ເທົ່າກັບ 93% ແລະ 100% ໃນຜູ້ທີ່ໄດ້ຮັບ 3 ແລະ 4 ເຂັມ ຕາມລໍາດັບ.

ສຳລັບກຸ່ມຜູ້ສູງອາຍຸ 60 ປີຂຶ້ນໄປ ປ້ອງກັນປອດອັກເສບໃສ່ທໍ່ຊ່ວຍຫາຍໃຈໃນຜູ້ທີ່ໄດ້ຮັບວັກຊິນຄົບ 3 ເຂັມໄດ້ 80% , ຕ່ຳກວ່າກຸ່ມອາຍຸ 18-59 ປີ ທີ່ປ້ອງກັນໄດ້  89% ແຕ່ຈະເພີ່ມຂຶ້ນເປັນ 100% ເມື່ອໄດ້ຮັບຄົບ 4 ເຂັມ ທັງສອງກຸ່ມອາຍຸ ການສັກວັກຊິນເຂັມກະຕຸຸ້ນ 3 ເຂັມຂຶ້ນໄປ ຈະມີປະສິດຕິຜົນໃນການປ້ອງກັນການປ່ວຍໜັກ ແລະ ເສຍຊີວິດໃນລະດັບສູງ ຫຼາຍກ່ວາ 80% ໄດ້ດົນເຖິງ 6 ເດືອນ ເຖິງແມ່ນວ່າຈະສັກຢາເຂັມກະຕຸ້ນແລ້ວກໍຍັງສາມາດຕິດເຊື້ອໄດ້ ແຕ່ບໍ່ຮ້າຍແຮງ ຫລື ເສຍຊີວິດ