ເຊລຊີ ຄວ້າ ໂອບາເມຢອງ-ຊາກາເຣຍ ເສີມທີມແບບເປັນຄູ່

ເຊລຊີ ເສີມທີມຈົນເຖິງນາທີສຸດທ້າຍ ເມື່ອຄວ້າທັງ ປີແອ ເອເມີຣິກ ໂອບາເມຢອງ ແລະ ເດນິສ ຊາກາເຣຍ ມາຮ່ວມ ທີມແບບເປັນຄູ່.

ເຊລຊີ ຍອດທີມແຫ່ງພຣີເມຍລີກ ອັງກິດ ປິດສາກຕະຫລາດນັກເຕະລະດູການນີ້ຢ່າງຕື່ນເຕັ້ນຫົວໃຈ ດ້ວຍການຄວ້າ ໂອບາເມຢອງ ດາວຍິງທີມຊາດກາບອງ ຂອງບາເຊໂລນາ ແລະ ເດນິສ ຊາກາເຣຍ ກອງກາງຂອງ ຢູເວນຕຸສ ມາເສີມທີມ 2 ຄົນລວດ.

ບີບີຊີ ສື່ຊື່ດັງຂອງອັງກິດລາຍງານວ່າ ໂອບາເມຢອງ ຍ້າຍມາຢູ່ກັບ ເຊລຊີ ດ້ວຍຄ່າຕົວ 10,3 ລ້ານປອນ ໂດຍເຊັນສັນຍາເປັນເວລາ 2 ປີ ແລະ ເຊລຊີ ຍັງແຖມ ມາກອສ ອາລອນໂຊ ກອງຫລັງຊາວສະເປນໄປໃຫ້ ບາເຊໂລນາ ອີກຫນຶ່ງຄົນນຳອີກ.

ຂະນະທີ່ ຊາກາເຣຍ ອາຍຸ 25 ປີ ຍ້າຍມາຈາກ ຢູເວນຕຸສ ດ້ວຍສັນຍາຢືມຕົວເປັນເວລາ 1 ລະດູການ ພ້ອມເງື່ອນໄຂຊື້ຂາດ ຫາກສ້າງຜົນງານໄດ້ຢ່າງຕໍ່ເນື່ອງ.