5 ພຶດຕິກຳທຳລາຍສະໝອງ
ໃນສັງຄົມສະໄໝນີ້ມີການປ່ຽນແປງຮູບແບບຂອງການໃຊ້ຊີວິດທີ່ຕ່າງອອກໄປຈາກເດີມຂ້ອນຂ້າງຫລາຍ ທັງພຶດຕິກຳການໃຊ້ຊີວິດປະຈຳວັນ ຫລື ແມ້ແຕ່ອາຫານການກິນ ເຊິ່ງພຶດຕິກຳບາງພຶດຕິກຳ ຫລື ອາຫານບາງຢ່າງທີ່ປ່ຽນໄປຕາມຍຸກສະໄໝນີ້ອາດກໍ່ໃຫ້ເກີດຜົນເສຍຕໍ່ສະໝອງໂດຍທີ່ເຮົາບໍ່ຮູ້ໂຕ ມື້ນີ້ທາງເພຈໄດ້ນຳເອົາ 5 ພຶດຕິກຳທຳລາຍສະໝອງມາຝາກ.
- ບໍ່ກິນເຂົ້າເຊົ້າ
ເນື່ອງຈາກວ່າຍຸກສະໄໝເປັນຍຸກແຫ່ງເທັກໂນໂລຊີ ແລະ ການແຂ່ງຂັນ ເຮັດໃຫ້ຄົນໃນຍຸກນີ້ຕ້ອງຟ້າວຟັ່ງຕະຫຼອດເວລາເພື່ອເເຂ່ງຂັນກັບເວລາ ຈຶ່ງເຮັດໃຫ້ເຂົ້າເຊົ້າຖືກເບິ່ງຂ້າມໄປ ຄົນດື່ມກາເຟແທນເຂົ້າເຊົ້າກັນຫລາຍ ຫລື ບາງຄົນບໍ່ກິນຫຍັງເລີຍໃນຕອນເຊົ້າ ແລ້ວຖ້າກິນມື້ທ່ຽງເລີຍ ເຊິ່ງສິ່ງນີ້ເອງຈະເຮັດໃຫ້ສະໝອງບໍ່ໄດ້ຮັບພະລັງງານ ແລະ ສານອາຫານທີ່ພຽງພໍຕໍ່ການໃຊ້ໃນຊີວິດປະຈຳວັນ ຖ້າຫາກເຮັດແບບນີ້ຕິດຕໍ່ກັນເປັນເວລາດົນ ໃນອານາຄົດຈະເຮັດໃຫ້ເກີດເປັນພະຍາດຫລົງລືມໄດ້
- ການອົດນອນ
ການອົດຫລັບອົດນອນຈະສົ່ງຜົນໃຫ້ການຮຽນຮູ້ຂອງເຮົາຊ້າລົງ ເພາະຈະເຮັດໃຫ້ການເຮັດວຽກຂອງສະໝອງສ່ວນຕ່າງໆເຮັດວຽກໄດ້ຢ່າງບໍ່ປົກກະຕິ Prefrontal Cortex ຖ້າເຮັດວຽກບໍ່ເປັນປົກກະຕິ ຈະສະແດງອອກມາໃນຮູບແບບຂອງການທີ່ຈະເຮັດໃຫ້ປະສິດທິພາບໃນການຕັດສິນໃຈຫລຸດລົງ ຫລື ເມື່ອພົບສິ່ງໃໝ່ໆ ຈະເຮັດໃຫ້ຂະບວນການຮຽນຮູ້ຂອງເຮົາຖົດຖອຍລົງ ເຂົ້າໃຈຫຍັງໄດ້ຍາກຂຶ້ນ.
- ກິນອາຫານທີ່ມີລົດຫວານຫລາຍຈົນເກີນໄປ
ການກິນອາຫານລົດຫວານຫລາຍຈົນເກີນໄປຈະເຮັດໃຫ້ສະໝອງສ່ວນທີ່ຊື່ວ່າ ຮິບໂປແຄມປັດ (Hippocampus) ເຊິ່ງເປັນສະໝອງສ່ວນທີ່ເຮັດໜ້າທີ່ກ່ຽວກັບການຮຽນຮູ້ ແລະ ການຈື່ຈຳຖືກຂັດຂວາງ ແລະ ຢັບຢັ້ງການເຮັດວຽກຂອງຮໍໂມນເລັບຕິນ (Leptin) ສົ່ງຜົນໃຫ້ເຮົາຮຽນຮູ້ ແລະ ຕອບສະໜອງຕໍ່ສິ່ງຕ່າງໆໄດ້ຊ້າລົງ ສະໝອງຈະຈື່ຈຳຫຍັງໄດ້ບໍ່ຄ່ອຍດີ ຮ່າງກາຍຈະເມື່ອຍຊາ ແລະ ເມື່ອຍລ້າ.
- ສະໝອງຂາດການຝຶກຝົນ
ອະໄວຍະວະທີ່ຊື່ວ່າ ສະໝອງ ກໍຄືກັບອະໄວຍະວະອື່ນໆໃນຮ່າງກາຍຂອງເຮົາ ຄືກັນກັບ ແຂນ, ຂາ, ຫົວໃຈ ຫາກເຮົາມີການອອກກຳລັງກາຍ ແລະ ໃຊ້ງານມັນຢູ່ສະເໝີມັນກໍ່ຈະແຂງແຮງ ແລະ ເຮົາຈະສາມາດໃຊ້ງານມັນໄດ້ຢ່າງມີປະສິດທິພາບ ຖ້າຫາກເຮົາບໍ່ຄ່ອຍໄດ້ໃຊ້ວ່າມັນ ແຂນ-ຂາເຮົາກໍ່ຈະຝໍ່ຫລື ນ້ອຍລົງ ເຮັດໃຫ້ເຮົາບໍ່ຄ່ອງແຄ່ວໃນການຢິບຈັບ ຫລື ໄປມາ ດັ່ງນັ້ນຖ້າຫາກເຮົາບໍ່ຢາກທີ່ຈະໃຫ້ສະໝອງຂອງເຮົາຝໍ່ລົງ ເຮົາກໍ່ຄວນທີ່ຈະອອກກຳລັງກາຍສະໝອງໂດຍການຄິດ ແລະ ລອງເຮັດຫຍັງໃໝ່ໆ ເພື່ອໃຫ້ສະໝອງໄດ້ໃຊ້ງານຢູ່ສະເໝີ ແລະ ສ້າງເສັ້ນໃຍສະໝອງເພີ່ມຫລາຍຂຶ້ນ.
- ຢູ່ຄົນດຽວຫລາຍເກີນໄປ
ເນື່ອງຈາກມະນຸດເປັນສັດສັງຄົມ ເພາະສະນັ້ນການທີ່ເຮົາອອກໄປພົບປະຄົນທາງນອກ ມີປະຕິສຳພັນກັບຜູ້ຄົນໃໝ່ໆໃນສະພາບແວດລ້ອມຕ່າງໆ ຈະເປັນການຊ່ວຍພັດທະນາສະໝອງເຮົາໃຫ້ແຂງແຮງຂຶ້ນໄດ້ ແຕ່ໃນສັງຄົມປະຈຸບັນເປັນສັງຄົມທີ່ຟ້າວຝັ່ງ ຜູ້ຄົນຕ້ອງເຮັດວຽກແຂ່ງກັບເວລາ ເມື່ອເຮັດວຽກແລ້ວໆກໍ່ຟ້າວເມືອເຮືອນ ເຮັດໃຫ້ໂອກາດໃນການພົບປະໂອ້ລົມບຸກຄົນຕ່າງໆຫຼຸດໜ້ອຍລົງ ເຮົາຢູ່ຄົນດຽວຫລາຍຂຶ້ນ ມື້ພັກກໍ່ໜ້ອຍ ແລະ ທັງບໍ່ໄດ້ອອກໄປພົບເຈີສະຖານທີ່ໃໝ່ໆ ເຊິ່ງສິ່ງນີ້ເຮັດໃຫ້ສະໝອງຂອງເຮົາເກີດການເສື່ອມຖອຍ ແລະ ມີແນວໂນ້ມທີ່ຈະເຮັດໃຫ້ເກີດອາການຫລົງລືມ ຫລາຍກວ່າຄົນທີ່ອອກໄປພົບປະຜູ້ຄົນຢູ່ສະເໝີ.
ນີ້ເປັນ 5 ພຶດຕິກກຳທີ່ໃຜຫລາຍຄົນອາດຈະຫລົງເຮັດ ຫລື ອາດຈະເຮັດເປັນກິດຈະວັດປະຈຳວັນໄປແລ້ວ ຕາມສະພາບແວດລ້ອມ ແລະ ສັງຄົມທີ່ປ່ຽນແປງໄປ ເຊິ່ງຖ້າຫາກວ່າທຸກທ່ານອ່ານມາຈົນຮອດນີ້ ກໍ່ຄົງຈະພໍຮູ້ແລ້ວແມ່ນບໍວ່າ ພຶດຕິກຳໃດທີ່ເຮົາເຮັດແລ້ວສົ່ງຜົນເສຍຕໍ່ສະໝອງ ຖ້າເຊັ່ນນັ້ນເຮົາກໍ່ຄວນຫລີກເວັ້ນພຶດຕິກຳເຫລົ່ານັ້ນ ເພື່ອຮັກສາສະໝອງຂອງເຮົາໃຫ້ແຂງແຮງ ແລະ ໃຊ້ການໄດ້ຢ່າງຍາວນານ ແລະ ມີປະສິດທິພາບ.
