ເຮົາບໍ່ດີພໍ! ທູເຄິນ ຍອມຮັບຕອນນີ້ ເຊວຊີ ກາຍເປັນທີມທີ່ງ່າຍໃນການເອົາຊະນະ ຫລັງເສຍນອກບ້ານ 2 ເກມຕິດແລ້ວ
ໂທມັສ ທູເຄິນ ຜູ້ຈັດການທີມຂອງ ເຊວຊີ ຊີ້ໃຫ້ເຫັນວ່າຊົ່ວໂມງນີ້ ສິງບູຣ ສາມາດເສຍຄູ່ແຂ່ງໄດ້ງ່າຍໆ ຫລັງຈາກບຸກໄປພ່າຍໃຫ້ ເຊົາແຮມຕັນ 1-2, ໂດຍກ່າວວ່າເປັນອີກເກມທີ່ທີມເຮັດຜົນງານໄດ້ບໍ່ດີພໍ.
ເຊວຊີ ເລີ່ມຕົ້ນເກມໄດ້ດີ ແລະ ຍິງຂຶ້ນນຳ 1-0 ໃນນາທີ 23 ຈາກການຍິງຂອງ ລາຮີມ ສະເຕີລິງ, ແຕ່ຫລັງຈາກນັ້ນ ພຽງ 5 ນາທີ ເຊົາແຮມຕັນ ໄລ່ຕີສະເໝີຈາກ ໂຣມິໂອ ລາເວຍ ກ່ອນພິກຂຶ້ນນຳ ແລະ ຊະນະຈາກການຍິງຂອງ ອາດາມ ອາມສະຕຣອງ ໃນນາທີ 45 ເຊິ່ງເປັນການເສຍ 2 ນັດຕິດໃນລີກຂອງ “ສິງບູຣ”.
“ພວກເຮົາຫລິ້ນບໍ່ໄດ້ດີພໍທີ່ຈະຊະນະເກມນອກບ້ານ. ການທີ່ເຮົາຫລິ້ນໃນລະດັບນີ້ພຽງແຕ່ 20-25 ນາທີ ແມ່ນບໍ່ພຽງພໍທີ່ຈະເຮັດໃຫ້ເກມມີສົມດູນ”
“ມັນຄືກັບເກມທີ່ພວກເຮົາໄດ້ຫລິ້ນກັບ ລີດສ (ເຊວຊີ ເສຍ 0-3 ໃນວັນອາທິດທີ 21 ສິງຫາ), ພວກເຮົາຕ້ອງເຂົ້າໃຈ ແລະ ຊອກຫາວິທີແກ້ໄຂບັນຫານີ້. ພວກເຮົາເສຍສະມາທິໄດ້ງ່າຍ, ຫລູດຈາກແຜນການ ແລະ ຂາດຄວາມຕໍ່ເນື່ອງ, ມັນງ່າຍທີ່ສຸດທີ່ຈະເອົາຊະນະພວກເຮົາໃນປັດຈຸບັນນີ້,” ຜູ້ຈັດການທີມຊາວເຢຍລະມັນໄດ້ກ່າວ.
ປັດຈຸບັນ ເຊວຊີ ຢູ່ໃນອັນດັບທີ 8 ຂອງ ຕາຕະລາງ ພຣີເມຍ ມີ 7 ຄະແນນຈາກ 5 ເກມ.
