ເດີນໜ້າ “ຂ້າ” ລູກດຽວ ຟີລິບປິນເກັບແກ້ງຄ້າຢາ 7 ວັນ 80 ສົບ
ການປາບປາມຢາເສບຕິດຢູ່ນະຄອນຫລວງມະນິລາ ເມືອງຫລວງຂອງຟີລິບປິນ ພົບກັບອາທິດນອງເລືອດທີ່ສຸດຄັ້ງໜຶ່ງ ເມື່ອຕຳຫລວດວິສາມັນູ້ຕ້ອງສົງໄສສູງເຖິງ 80 ຄົນພາຍໃນອາທິດດຽວ.
+ ຕຳຫລວດຟີລິບປິນວິສາມັນ ຜູ້ຄ້າຢາວັນດຽວ 32 ຄົນ
+ ຟີລິບປິນເດີນໜ້າກວາດລ້າງຢາເສບຕິດ
ສຳນັກຂ່າວຕ່າງປະເທດລາຍງານຈາກນະຄອນຫລວງມະນິລາ ປະເທດຟີລິບປິນ ໃນວັນທີ 18 ສິງຫາວ່າ: ສຳນັກງານຕຳຫລວດນະຄອນຫລວງມະນິລາລາຍງານຜົນຂອງປະຕິບັດການກວາດລ້າງອາດຊະຍາກຳ ໂດຍສະເພາະກ່ຽວຂ້ອງກັບຢາເສບຕິດ ທີ່ເປັນການລົງພື້ນທີ່ໃນຄືນວັນທີ 10 ສິງຫາວ່າ: ເຈົ້າໜ້າທີ່ວິສາມັນຜູ້ຕ້ອງສົງໄສຢ່າງໜ້ອຍ 13 ຄົນ ເພີ່ມຈຳນວນຜູ້ເສຍຊີວິດຈາກປະຕິບັດການກວາດລ້າງຢາເສບຕິດໃນເມືອງຫລວງຂອງຟີລິບປິນເປັນຢ່າງໜ້ອຍ 80 ຄົນ ສະເພາະໃນອາທິດນີ້ພຽງອາທິດດຽວ ແລະ ມີຜູ້ຖືກຈັບກຸມອີກຫລາຍກວ່າ 200 ຄົນ.
ສະຖານະການທີ່ເກີດຂຶ້ນຖືເປັນໜຶ່ງໃນອາທິດນອງເລືອດທີ່ສຸດຂອງຟີລິບປິນ ນັບແຕ່ປະທານາທິບໍດີ ໂຣດຣິໂກ ດູເຕີເຕ ຮັບຕຳແໜ່ງຜູ້ນຳປະເທດໃນກາງປີຜ່ານມາ ແລະ ຮຽກສຽງປະນາມຢ່າງໜັກຈາກກຸ່ມການເມືອງຝ່າຍຊ້າຍ. ເຖິງຢ່າງໃດກໍຕາມ, ພົນເອກ ໂຣນັນ ໂຣຊາ ຜູ້ບັນຊາການສຳນັກງານຕຳຫລວດແຫ່ງຊາດຂອງຟີລິບປິນ ກ່າວປົກປ້ອງທ່ານ ດູເຕີເຕ ວ່າ: ປະທານາທິບໍດີບໍ່ໄດ້ສັ່ງການໂດຍກົງໃຫ້ຕຳຫລວດວິສາມັນຄົນຮ້າຍໃຫ້ໄດ້ຫລາຍທີ່ສຸດ. ຂະນະທີ່ສຳນັກງານຕຳຫລວດບໍ່ມີນະໂຍບາຍໃນເລື່ອງນີ້ແບບສະເພາະເຈາະຈົງ, ແຕ່ຜູ້ນຳຟີລິບປິນກ່າວພຽງວ່າ: ສະຖານະການສົງຄາມຢາເສບຕິດໃນປະເທດຢູ່ໃນຂັ້ນວິກິດ ແລະ ບໍ່ອາດຫລຸດຜ່ອນໄດ້ ແລະ ຜູ້ຕ້ອງສົງໄສທີ່ຖືກວິສາມັນທັງໝົດລ້ວນແຕ່ຂັດຂືນການຈັບກຸມຂອງເຈົ້າໜ້າທີ່ທັງໝົດ.
ສ່ວນລາຍງານຂອງລັດຖະບານລະບຸວ່າ: ຕຳຫລວດຢ່າງໜ້ອຍ 80 ຄົນ ແລະ ທະຫານອີກ 300 ຄົນເສຍຊີວິດໃນປະຕິບັດການປາບປາມຢາເສບຕິດທີ່ດຳເນີນມາແຕ່ກາງປີຜ່ານມາ, ສ່ວນຜົນສຳຫລວດຄວາມຄິດເຫັນຊາວຟີລິບປິນໃນທ້າຍເດືອນພຶດສະພາຜ່ານມາ ລະບຸວ່າ: 78% ພໍໃຈທີ່ລັດໃຊ້ມາດຕະການຂັ້ນເດັດຂາດໃນການປາບປາມຢາເສບຕິດ ແລະ ອາດຊະຍາກຳພາຍໃນປະເທດ.
