ປາກິດສະຖານເສຍຫາຍຈາກນ້ຳຖ້ວມໃຫຍ່ ບໍ່ຕໍ່າກວ່າ 1 ໝື່ນລ້ານໂດລາ
ປາກິດສະຖານຕີລາຄາຄວາມເສຍຫາຍຈາກນ້ຳຖ້ວມໃຫຍ່ເບື້ອງຕົ້ນບໍ່ຕໍ່າກວ່າ 1 ໝື່ນລ້ານໂດລາ ເລັ່ງນຳເຂົ້າຜົນຜະລິດທາງກະສິກຳຈາກອິນເດຍ ຢ້ານເກີດວິກິດຂາດເຂີນອາຫານຄັ້ງໃຫຍ່ ຫລັງເນື້ອທີ່ 1 ໃນ 3 ຂອງປະເທດຈົມໃຕ້ນ້ຳ.
ທ່ານ ອະຊານ ອິກບາລ ລັດຖະມົນຕີກະຊວງການພັດທະນາ ແລະ ການວາງແຜນຂອງປາກິດສະຖານເປີດເຜີຍຕົວເລກຄວາມເສຍຫາຍຈາກເຫດການອຸທົກກະໄພຄັ້ງໃຫຍ່ໃນປະເທດ ຈາກການຕີລາຄາເບື້ອງຕົ້ນຄາດວ່າບໍ່ຕໍ່າກວ່າ 1 ໝື່ນລ້ານໂດລາ. ປັດຈຸບັນສົ່ງຜົນກະທົບຕໍ່ປະຊາຊົນແລ້ວ 33 ລ້ານກວ່າຄົນ ເຊິ່ງມີອັດຕາຫລາຍກວ່າ 15% ຂອງປະຊາກອນທັງໝົດໃນປະເທດ.
ທ່ານ ອິກບາລ ກ່າວວ່າ: ປາກິດສະຖານອາດຕ້ອງໃຊ້ເວລາຢ່າງໜ້ອຍ 5 ປີໃນການຟື້ນຟູປະເທດ ແລະ ສິ່ງທີ່ກຳລັງຈະເກີດຂຶ້ນຕາມມາໃນໄລຍະເວລາອັນໃກ້ ຄືການຂາດເຂີນຢ່າງຮຸນແຮງ ເຊິ່ງຈະຕໍ່ເນື່ອງຍາວນານໄປຫລາຍເດືອນ.
ໂດຍຂໍ້ມູນຫລ້າສຸດຈາກສຳນັກງານແກ້ໄຂໄພພິບັດແຫ່ງຊາດປາກິດສະຖານ (NDMA) ລະບຸວ່າ: ຝົນທີ່ຕົກລົງມາຢ່າງຕໍ່ເນື່ອງນັບແຕ່ກາງເດືອນມິຖຸນາ ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 1.136 ຄົນ ໃນຈຳນວນນັ້ນມີເດັກລວມຢູ່ນຳປະມານ 386 ຄົນ ແລະ ມີຜູ້ໄດ້ຮັບບາດເຈັບອີກຫລາຍກວ່າ 1.634 ຄົນ. ອີກທັງນ້ຳຖ້ວມຍັງທຳລາຍໂຄງລ່າງພື້ນຖານຕ່າງໆຂອງປະເທດຈຳນວນຫລາຍ ລວມທັງຂົວຫລາຍກວ່າ 130 ແຫ່ງ ແລະ ອາຄານບ້ານເຮືອນລ້ານຫລັງ.
ທ່ານ ມິຟຕາ ອິສມາອິລ ລັດຖະມົນຕີກະຊວງການເງິນຂອງປາກິດສະຖານ ໄດ້ອອກມາເປີດເຜີຍເຖິງສະຖານະການການຂາດເຂີນອາຫານໃນປະເທດວ່າ: ລັດຖະບານກຳລັງພິຈາລະນາຈະນຳເຂົ້າຜັກຈາກປະເທດໃກ້ຄຽງ ຄືອິນເດຍ ທ່າມກາງລາຄາອາຫານທີ່ເພີ່ມຂຶ້ນ ເນື່ອງຈາກຜົນຜະລິດທາງກະສິກຳເສຍຫາຍເປັນຈຳນວນຫລາຍຈາກນ້ຳຖ້ວມ ແລະ ປະສົບບັນຫາເລື່ອງການຂົນສົ່ງ ເຖິງວ່າປາກິດສະຖານ ແລະ ອິນເດຍຈະບໍ່ໄດ້ເຮັດການຄ້າກັນມາເປັນເວລາດົນຈາກຄວາມຂັດແຍ່ງທາງການເມືອງລະຫວ່າງສອງປະເທດ. ຂະນະດຽວກັນກໍຈະຊອກຫາການນຳເຂົ້າອາຫານຈາກແຫລ່ງອື່ນໆເພີ່ມຕື່ມເຊັ່ນ: ຕວກກີ ແລະ ອີຣານ.
ເຖິງຢ່າງໃດກໍຕາມ, ການນຳເຂົ້າອາຫານຈາກຕ່າງປະເທດຍັງມີອຸປະສັກ ເນື່ອງຈາກປາກິດສະຖານກຳລັງປະສົບບັນຫາເສດຖະກິດມາກ່ອນໜ້ານີ້ ຈາກອັດຕາເງິນເຟີ້ເພີ່ມຂຶ້ນຢ່າງຮຸນແຮງ, ຄ່າເງິນອ່ອນລົງ ແລະ ການຂາດດູນໃນບັນຊີ ໂດຍຈາກການເປີດເຜີຍໃນໄລຍະຜ່ານມາພົບວ່າ: ປາກິດສະຖານມີເງິນສຳຮອງພຽງພໍສຳລັບການນຳເຂົ້າໃນປະເທດພຽງ 1 ເດືອນ.
ລັດຖະບານປາກິດສະຖານພະຍາຍາມຊອກຫາການຊ່ວຍເຫລືອຈາກນາໆຊາດເພື່ອຜ່ານຜ່າວິກິດຄັ້ງນີ້ໂດຍໄວທີ່ສຸດ ເຖິງວ່າຈະໄດ້ຮັບການຊ່ວຍເຫລືອມາແດ່ແລ້ວຈາກປະເທດຕ່າງໆເຊັ່ນ: ອາເມລິກາ, ອັງກິດ, ສະຫະລັດອາຣັບເອມິເຣດ, ແຕ່ລັດຖະບານລະບຸວ່າ: ຍັງຕ້ອງການເງິນເພີ່ມອີກ.
ອ້າງອີງ:
https://www.reuters.com/…/initial-economic-losses…/
https://edition.cnn.com/…/pakistan-flood…/index.html
