ຖືກຈັບຊໍ້າເຖົ້າ! ຊາຍໄວ 88 ປີ ຖືກຈັບ ຖານມີຢາເສບຕິດໃນຄອບຄອງ
ສະຫາຍ ພັຕ ແສງຄໍາ ຜົ້ງສາລີ ຮອງຫົວໜ້າພະແນກຕໍາຫຼວດ ປກສ ເມືອງລອງ ແຂວງຫຼວງນໍ້າທາ ໃຫ້ຮູ້ວ່າ: ໃນກາງເດືອນ ສິງຫາ 2022 ທາງເຈົ້າໜ້າທີພະແນກຕໍາຫຼວດ ປກສ ເມືອງລອງ ໄດ້ສົມທົບກັບຫ້ອງການຕໍາຫຼວດ ບໍລິການປະຊາຊົນ ກຸ່ມບ້ານຊຽງກົກ ແລະ ກຸ່ມບ້ານທາດ ລົງຕິດຕາມເປົ້າໝາຍຢາເສບຕິດ ສາມາດກັກຜູ້ຖືກຫາໄດ້ 3 ຄົນ.
– ທ້າວ ຕານ້ອຍ ອາຍຸ 88 ປີ ປະຊາຊົນ ບ້ານປຸງຊາຍ ຖືກກັກຕົວ ໃນວັນທີ 16 ສິງຫາ 2022 ພ້ອມຢາບ້າ 32 ເມັດ
– ທ້າວ ລູວະ ອາຍຸ 58 ປີ ປະຊາຊົນ ບ້ານສົມປານໃຕ້, ຖືກກັກຕົວ ວັນທີ 16 ສິງຫາ 2022 ພ້ອມຢາບ້າ 36 ເມັດ
– ທ້າວ ອາແມ໋ ຫຼື (ເຊແມ໋) ອາຍຸ 45 ປີ ປະຊາຊົນ ບ້ານຄົກຫີນ, ຖືກກັກຕົວ ວັນທີ 19 ສິງຫາ 2022 ພ້ອມຢາບ້າ 22 ເມັດ.
ທັງ 3 ເປັນພົນລະເມືອງ ເມືອງລອງ ແຂວງຫຼວງນໍ້າທາ
ຜ່ານການສອບສວນຂອງເຈົ້າໜ້າທີ ຜູ້ຖືກຫາທັງ 3 ໄດ້ຮັບສາລະພາບວ່າ: ຢາເສບຕິດດັ່ງກ່າວ ແມ່ນຂອງຕົນເອງແທ້.
ປັດຈຸບັນ ຜູ້ຖືກຫາທັງ 3 ຄົນ ພ້ອມຂອງກາງຢາເສບຕິດ ປະເພດຢາບ້າ ຈໍານວນ 90 ເມັດ ໄດ້ມອບໝາຍໃຫ້ ພະແນກຕ້ານ ແລະ ສະກັດກັ້ນຢາເສບຕິດ ປກສ ແຂວງ ດໍາເນີນການສືບສວນ-ສອບສວນ ເພື່ອຂະຫຍາຍຜົນຫາກຸ່ມແກ້ງມາລົງໂທດຕາມລະບຽບກົດໝາຍ.
