ມາຮູ້ຈັກກັບ “ອັນໂຕນີ” ປີກຈອມເລື້ອຍຄົນໃໝ່ ແຫ່ງ ໂອແທຣບຟອດ ຂອງ ແມນເຊັສເຕີ ຢູໄນເຕັດ

ໃນທີ່ສຸດ ອັນໂຕນີ ປີກຂອງ ອາແຈັກ ກໍ່ໄດ້ບິນເຖິງເມືອງແມນເຊັສເຕີ ໃນວັນຈັນທີ່ຜ່ານມາ ເພື່ອເຂົ້າຮັບການກວດຮ່າງກາຍ ກ່ອນທີ່ຈະເຊັນສັນຍາເປັນດາວເຕະຄົນໃໝ່ຂອງ ແມນເຊັສເຕີ ຢູໄນເຕັດ.

ຫາກບໍ່ມີຫຍັງຜິດພາດ, ເອຣິກ ເທນຮາກ ຜູ້ຈັດການທີມຂອງ ແມນຢູ ຈະໄດ້ນັກເຕະໃຫມ່ຄົນທີ 5 ເຂົ້າຮ່ວມສະໂມສອນຫລັງຈາກ ໄທເລີ ມາລາເຊຍ, ຄຣິສເຕຍ ອີຣິກເຊນ, ລິຊານໂດຣ ມາຕິເນສ ແລະ ຄາເຊມິໂຣ, ໃນຂະນະທີ່ຜູ້ຮັກສາປະຕູຂອງ ນິວຄາສເຊິນ ມາຕິນ ດູຣບຣາກາ ກໍ່ໃກ້ຈະເຂົ້າສູ່ໂຮງລະຄອນແຫ່ງຄວາມຝັນ ອີກຄົນໜຶ່ງເຊັ່ນກັນ.

ໃນກໍລະນີຂອງ ອັນໂຕນີ ປີກຂວາ ອາຍຸ 22 ປີ ຖືວ່າເປັນຄ່າຕົວທີ່ແພງມະຫາສານ ເນື່ອງຈາກສື່ຕີຂ່າວວ່າ ອາແຈັກ ຂູດຮີດເມັດເງິນຈາກ ແມນເຊັສເຕີ ຢູໄນເຕັດ ສູງເຖິງ 100 ລ້ານເອີໂຣ. ໂດຍໃນຈຳນວນນີ້ມີການລະບຸວ່າ ເຊົາ ເປົາໂລ ຕົ້ນສັງກັດເກົ່າໃນບ້ານເກີດຂອງ ອັນໂຕນີ ຈະໄດ້ຮັບສ່ວນແບ່ງຈຳນວນໜຶ່ງອີກດ້ວຍ.

ຕໍ່ກັບເມັດເງິນ 100 ລ້ານ​ເອີ​ໂຣ, ຖ້າ​ຕົວ​ເລກທີ່ແທ້​ຈິງ​ບໍ່​ຜິດໄປຈາກນີ້, ອັນ​ໂຕ​ນີ ຈະ​ກາຍ​ເປັນ​ນັກເຕະ​ທີ່​ແພງ​ທີ່​ສຸດ​ອັນ​ດັບ​ສອງ​ຂອງ ແມນ​ເຊັສ​ເຕີ ຢູ​ໄນ​ເຕັດ ຖັດຈາກ ​ພອລ ປັອກບາ ດາວ​ເຕະ​ຊາວ​ຝຣັ່ງ ​ແລະ ແຮລີ ​ແມັກ​ໄກວ ​ກອງ​ຫລັງ​ທີມຊາດ​ອັງກິດ.

ຂະນະດຽວກັນ, ເຂົາຈະກາຍເປັນນັກເຕະທີ່ແພງທີ່ສຸດອັນດັບ 4 ໃນພຣີເມຍລີກ ຮອງຈາກ ແຈັກ ກຣີລິສ, ປັອກບາ ແລະ ໂຣເມອູ ລູກາກູ.

ປະຫວັດຂອງ ອັນໂຕນີ

ອັນໂຕນີ ເກີດໃນເມືອງ ເຊົາ ເປົາໂລ ແລະ ເຂົ້າຮ່ວມທີມໃນບ້ານເກີດຕັ້ງແຕ່ເມື່ອອາຍຸ 10 ປີ ໃນປີ 2010.

ຫລັງຈາກນັ້ນກໍ່ໃຊ້ເວລາຢູ່ອາແຄນດາມີ່ ເຊົາ ເປົາໂລ ດົນເຖິງ 8 ປີ, ປີກຂວາຈອມລີລາກໍ່ໄດ້ຖືກເລື່ອນຂຶ້ນມາຫລິ້ນໃຫ້ກັບທີມຊຸເໃຫຍ່ທໍາອິດໃນປີ 2018. ໃນເດືອນກັນຍາຂອງປີນັ້ນ, ເຂົາໄດ້ເຊັນສັນຍາກັບທີມດ້ວຍເວລາ 5 ປີ ຈົນເຖິງລະດູຮ້ອນປີ 2023.

ຫລັງຈາກນັ້ນອີກສອງເດືອນ ເຂົາກໍ່ໄດ້ເປີດຕົວຄັ້ງທໍາອິດກັບທີມຊຸດໃຫຍ່ໃນຖານະຕົວຕົວສຳຮອງ ໃນເກມກັບ ເກຣມີໂອ 1-1, ຈົນມາເຖິງລະດູການ 2018/19, ເຂົາໄດ້ເລີ່ມຕົ້ນເປັນຕົວຈິງເກມທໍາອິດ ແລະ​ ໄດ້​ສ້າງ​ຊື່​ໃຫ້​ຕົນ​ເອງ​ໂດຍ​ການສອຍ​ຕາໜ່າງ​ໄປ 4 ​ເມັດ ກັບອີກ 6 ແອສຊິສ ໃນການແຂ່ງຂັນທັງໝົດ.

ຈົນໃນທີ່ສຸດຜົນງານຂອງເຂົາກັບສະໂມສອນ ສົ່ງຜົນໃຫ້ເຂົາຕິດທີມຊາດບຣາຊິນ ຊຸດອາຍຸ 23 ປີ, ເຊິ່ງ ອັນໂຕນີ ຍິງໄດ້ 5 ປະຕູຈາກການລົງຫລີ້ນ 12 ນັດກ່ອນທີ່ຈະຖືກທີມຊາດຊຸດໃຫຍ່ຮຽກຕົວໄປຮ່ວມທັບ.

ມາເຖິງເດືອນກຸມພາ 2020, ອາແຈັກ ໄດ້ດຶງຕົວເຂົ້າມາຮ່ວມທີມດ້ວຍຄ່າຕົວທີ່ເປັນສະຖິຕິລີກຂອງລີກໃນເວລານັ້ນ.

ແລະ ໃນລະດູການທໍາອິດຂອງລາວໃນລີກໂຮນລັງ, ອັນໂຕນີ ສ້າງຊື່ສຽງດ້ວຍ 10 ປະຕູ ບວກກັບ 10 ແອສຊິສໃນທຸກການແຂ່ງຂັນ. ນອກຈາກນີ້ ລະດູການທີ່ຜ່ານມາ ຍັງໄດ້ຍິງໄປເຖິງ 12 ປະຕູ ແລະ 10 ແອສຊິສ, ຂະນະທີ່ລະດູການນີ້ເຂົາໄດ້ຍິງໄປແລ້ວ 2 ເມັດ ກ່ອນທີ່ຈະຂາດຊ້ອມກັບທີມ ເພື່ອບີບໃຫ້ທີມປ່ອຍຕົວ.

ໃນລະດັບຊາດ, ອັນໂຕນີ ໄດ້ຕິດທີມຊາດໄປແລ້ວ 9 ນັດ, ເຊິ່ງທັງຫມົດການແຂ່ງຂັນບານໂລກຂອງປີນີ້ທັງໝົດ. ອີກທັງເຂົາຍັງໄດ້ຫລຽນຄໍາໃນການແຂ່ງຂັນກິລາໂອລິມປິກ 2021 ທີ່ໂຕກຽວ, ເຊິ່ງເຂົາໄດ້ແອສຊິສຊ່ວຍໃຫ້ທີມ ເອົາຊະນະສະເປນໄດ້ 2-1 ໃນຮອບຊິງຊະນະເລີດ.

“ຖ້າ ອັນໂຕນີ ຍ້າຍ, ມັນຈະເປັນການສູນເສຍສໍາລັບ ອາແຈັກ ເພາະໃນທີມຕອນນີ້ບໍ່ມີໃຜສາມາດທົດແທນຕໍາແຫນ່ງຂອງເຂົາໄດ້. ເຂົາເປັນນັກເຕະລະດັບສູງສຸດ,” ໂຄ໋ດຊາວໂຮນລັງໄດ້ກ່າວເຖິງຜູ້ຫລີ້ນຂອງຕົນໃນຊ່ວງຕົ້ນປີນີ້.

ແລະ ສຸດທ້າຍທັງສອງຈະໄດ້ຮ່ວມງານກັນອີກຄັ້ງໃນຖິ່ນ ໂອແທຣຟຟອດ ໂດຍຄາດວ່າ ອັນໂຕນີ ຈະມີສ່ວນຮ່ວມກັບທັບ ແມນເຊັສເຕີ ຢູໄນເຕັດ ໃນນັດທໍາອິດກັບ ອາເຊນອລ ໃນທ້າຍອາທິດນີ້ ເນື່ອງຈາກນັດນັດທີ່ບຸກໄປຢາມ ເລສເຕີ ຊິຕີ້ ໃນວັນພະຫັດນີ້ ອາດຈະໄວເກີນໄປ ເນື່ອງຈາກເອກະສານຍັງບໍ່ແລ້ວທັນເວລາ.