ຈົ່ງເອົາຊະນະສິ່ງລົບກວນ ແລະ ກັບມາໃຫ້ຄວາມສຳຄັນກັບເປົ້າໝາຍຂອງທ່ານ.

ການທີ່ຄົນເຮົາຈະປະສົບຄວາມສຳເລັດນັ້ນຍ່ອມຕ້ອງພົບກັບອຸປະສັກຫລວງຫລາຍ ໂດຍສະເພາະສິ່ງຕ່າງໆທີ່ຄອຍກວນໃຈ ແລະ ຂັດຂວາງຢູ່ສະເໝີ ແລະ ຍິ່ງເວລາຂອງເຮົາມີຈຳກັດ ການປ່ອຍໃຫ້ຕົນເອງຖືກລົບກວນຈຶ່ງເຮັດໃຫ້ເຮົາໄປເຖິງເປົ້າໝາຍໄດ້ຊ້າລົງ. ຖ້າທ່ານຢາກປະສົບຄວາມສຳເລັດ ທ່ານຕ້ອງໃຫ້ຄວາມສຳຄັນກັບສິ່ງທີ່ຈຳເປັນແທ້ໆ ລອງມາເບິ່ງກັນວ່າເຮົາຈະເຮັດແນວໃດໄດ້ແດ່.

• ເລືອກສະເພາະສິ່ງທີ່ຈຳເປັນ : ຢ່າປ່ອຍໃຫ້ກິດຈະກຳ ຫລື ພາລະກິດມະຫາສານຄອບງຳທ່ານ ທ່ານບໍ່ຈຳເປັນຕ້ອງເຮັດທຸກຢ່າງ ແລະ ບໍ່ຈຳເປັນຕ້ອງຕອບຮັບຄຳຂໍທຸກຢ່າງ, ເວລາທີ່ມີຈຳກັດຄວນທີ່ຈະໃຊ້ມັນຢ່າງກຸ້ມຄ່າ. ທ່ານຕ້ອງເລືອກແດ່ວ່າອັນໃດມີຄວາມສຳຄັນກັບທ່ານຫລາຍທີ່ສຸດ ຫລື ມີຄວາມຈຳເປັນຫລາຍທີ່ສຸດ, ແຕ່ເຄັດລັບອີກຢ່າງໜຶ່ງທີ່ເຮົາຢາກຈະບອກທ່ານໄວ້ກໍຄື ສິ່ງທີ່ສຳຄັນມັກຈະບໍ່ຮີບດ່ວນ ແລະ ສິ່ງທີ່ຮີບດ່ວນກໍມັກຈະບໍ່ແມ່ນວຽກທີ່ສຳຄັນຫລາຍພໍປານໃດ ນັ້ນໝາຍຄວາມວ່າທ່ານບໍ່ຕ້ອງຫົວຫຍຸ້ງໄປກັບການຈັດການວຽກທີ່ທັງຮີບດ່ວນ ແລະ ສຳຄັນໄປພ້ອມໆກັນ. ຈື່ໄວ້ວ່າ ເລືອກ ແລະ ຈັດລຽງລຳດັບຄວາມສຳຄັນໃຫ້ຖືກຕ້ອງ ແລ້ວທ່ານຈະບໍ່ເສຍເວລາໄປກັບສິ່ງທີ່ໄຮ້ປະໂຫຍດເລີຍ.
• ວາງແຜນ : ການເອົາຊະນະສິ່ງກວນໃຈນັ້ນບໍ່ແມ່ນເລື່ອງງ່າຍ ຖ້າທ່ານບໍ່ວາງແຜນໃຫ້ດີ. ການວາງແຜນຈະຊ່ວຍໃຫ້ທ່ານຮູ້ໂຕວ່າຄວນເຮັດຕອນໃດ ແລະ ຄວນພັກຕອນໃດ ອີກຢ່າງກໍຄື ທ່ານຄວນຈະບອກໃຫ້ຄົນອື່ນໆຮູ້ນຳວ່າຕອນໃດທີ່ທ່ານບໍ່ວ່າງ, ຢ່າໃຫ້ພວກເຂົາມາກວນໃຈທ່ານຈົນບໍ່ໄດ້ເຮັດວຽກ ແລ້ວຄ່ອຍບອກວ່າຕອນໃດທີ່ທ່ານສະດວກທີ່ຈະລົມນຳ ຖ້າທ່ານຈັດການບ່ອນນີ້ໄດ້ມັນຈະຊ່ວຍໃຫ້ວຽກຂອງທ່ານຄ່ອງແຄ້ວຫລາຍຍິ່ງຂຶ້ນ.
• ເປັນຝ່າຍສະໜັບສະໜຸນ : ທ່ານອາດຈະມີໂຄງການທີ່ຕ້ອງຮັບຜິດຊອບຫລວງຫລາຍເຕັມໄປໝົດ ຈົນສຸດທ້າຍທ່ານກໍພົບວ່າໂຕເອງເມື່ອຍເກີນໄປ ທັງວຽກກໍບໍ່ແລ້ວຈັກຢ່າງ ມັນເຖິງເວລາທີ່ທ່ານຈະຕ້ອງປ່ຽນບົດບາດຈັກເລັກໜ້ອຍແລ້ວ. ສິ່ງທີ່ເຮົາຈະແນະນຳກໍຄື ການເປັນຝ່າຍສະໜັບສະໜຸນ ທ່ານບໍ່ຈຳເປັນຕ້ອງຮັບຜິດຊອບວຽກທຸກວຽກ, ແຕ່ທ່ານສາມາດມີສ່ວນຮ່ວມກັບໂຄງການເຫລົ່ານັ້ນໄດ້, ຄອຍຊ່ວຍເຫລືອ, ແນະນຳຢູ່ເບື້ອງຫລັງ ມັນຈະເຮັດໃຫ້ທ່ານບໍ່ເມື່ອຍເກີນໄປ ແລະ ຍັງມີເວລາໄປເອົາໃຈໃສ່ກັບເປົ້າໝາຍຂອງຕົນເອງໄດ້ເຕັມທີ່ນຳອີກ.