ເວສແຮມ ຖະແຫລງຄວ້າ ລູຄັສ ປາເກຕາ ເຊັນສັນຍາ 5 ປີ ຄ່າຕົວສູງທີ່ສຸດຂອງສະໂມສອນ
ເວສແຮມ ຢູໄນເຕັດ ຖະແຫລງຂ່າວຢືນຢັນຄວ້າ ລູຄັສ ປາເກຕາ ກອງກາງທີມຊາດບຣາຊິລ ດ້ວຍຄ່າຕົວເປັນສະ ຖິຕິໃຫມ່ສະໂມສອນ ເຊັນສັນຍາ 5 ປີ ພ້ອມເງື່ອນໄຂຂະຫຍາຍເພີ່ມອີກ 1 ປີໃນອະນາຄົດ.
ລາຍງານລະບຸວ່າ ເວສແຮມ ຈ່າຍຄ່າຕົວໃຫ້ ລີຢົງ ທັນທີ 36,6 ລ້ານປອນ ຂະນະທີ່ເງື່ອນໄຂສ່ວນຕ່າງໃນຂໍ້ຕົກ ລົງນັ້ນອາດເຮັດ ໃຫ້ຄ່າຕົວພຸ່ງຂຶ້ນໄປສູງສຸດເຖິງ 51 ລ້ານປອນ ທຳລາຍສະຖິຕິເກ່ົາທີ່ສະໂມສອນເຄີຍຊື້ ເຊບາສຕຽງ ອັລແລ ເມື່ອປີ 2019 ດ້ວຍຄ່າຕົວ 45 ລ້ານປອນ.
ປາເກຕາ ເປີດເຜີຍວ່າ : ‘‘ ຂ້ອຍຫວັງວ່າມັນຈະເປັນການເລີ່ມຕົ້ນສູ່ເສັ້ນທາງທີ່ສະໜຸກສະໜານ ແລະ ຫວັງວ່າໄລຍະເວລາ ຂອງຂ້ອຍກັບສະໂມສອນຈະປະສົບຄວາມສຳເລັດ ຂ້ອຍຕື່ນເຕັ້ນທີ່ໄດ້ໃສ່ເສື້ອເວສກແຮມ ແລະ ຈະໄດ້ສະແດງໃຫ້ແຟນບານ ເຫັນວ່າຂ້ອຍເຮັດຫຍັງໄດ້ແດ່ເພື່ອຊ່ວຍຫມູ່ຮ່ວມທີມ ແລະ ສະໂມສອນ ’’.
ສຳລັບ ປາເກຕາ ອາຍຸ 25 ປີ ເລີ່ມຕົ້ນອາຊີບນັກເຕະກັບ ຟລາແມັງໂກ ໃນລີກບ້ານເກີດ ກ່ອນຍ້າຍມາເອຊີ ມິລານ ທີມແຫ່ງອິຕາລີ ເມື່ອປີ 2019 ແຕ່ບໍ່ປະສົບຄວາມສຳເລັດ ຈົນຕ້ອງຍ້າຍໄປລີຢົງເມື່ອປີ 2020 ໂດຍນັກເຕະຕິດທີມຊາດໄປແລ້ວ 33 ນັດ.
