NASA ຍົກເລີກປ່ອຍຈະຫລວດ ໃນພາລະກິດ Artemis I ຈາກບັນຫາ ອຸນຫະພູມເຄື່ອງຈັກບໍ່ຜ່ານການທົດລອງ
ອົງການ NASA ຕັດສິນໃຈເລື່ອນການປ່ອຍຈະຫລວດຂຶ້ນສູ່ດວງຈັນໄລຍະທຳອິດອອກໄປ ຫລັງບໍ່ສາມາດແກ້ໄຂບັນຫາອຸນຫະພູມຂອງເຄື່ອງຈັກໄດ້ທັນ.
ອົງການບໍລິຫານການບິນ ແລະ ອະວະກາດແຫ່ງຊາດອາເມລິກາ ຫລື ນາຊາ (National Aeronautics and Space Administration – NASA) ປະກາດຍົກເລີກການປ່ອຍຈະຫລວດໃນພາລະກິດ Artemis I ທີ່ມີກຳນົດຈະປ່ອຍອອກຈາກສູນອະວະກາດເຄນເນດີ ລັດຟໍຣິດາ ໃນວັນທີ 29 ສິງຫາ 2022 ລະຫວ່າງເວລາ 19:33 ຫາ 21:33 ໂມງ ຕາມເວລາປະເທດລາວ.
ກ່ອນການປ່ອຍຈະຫລວດທີ່ມີຊື່ວ່າ: Space Launch System (SLS) ຈະເລີ່ມຂຶ້ນ, ທາງ NASA ໄດ້ມີການທົດລອງໃນຂັ້ນຕອນສຸດທ້າຍ ແຕ່ພົບວ່າເກີດບັນຫາອຸນຫະພູມຂອງເຄື່ອງຈັກໂຕທີ 3 ຈາກເຄື່ອງຈັກທັງໝົດ 4 ໂຕ ບໍ່ຢູ່ໃນລະດັບທີ່ເໝາະສົມ ແລະ ຄາດວ່າຈະບໍ່ສາມາດແກ້ໄຂໄດ້ທັນເວລາ ຈຶ່ງໄດ້ປະກາດເລື່ອນພາລະກິດນີ້ອອກໄປກ່ອນ.
ສຳລັບໂຄງການ Artemis ນັ້ນເປັນແຜນການສຳຫລວດດວງຈັນໃນສະຕະວັດທີ 21 ມີເປົ້າໝາຍໃນການສົ່ງມະນຸດຂຶ້ນໄປສູ່ດວງຈັນອີກ ໂດຍໃນພາລະກິດທຳອິດ Artemis I ນັ້ນ ຈະເປັນການນຳເອົາຍານອະວະກາດທີ່ມີຊື່ວ່າ: Orion ຂຶ້ນໄປ ເພື່ອທົດລອງການຢູ່ໃນສະພາບແວດລ້ອມອະວະກາດ ໂດຍຍັງບໍ່ສົ່ງມະນຸດຂຶ້ນໄປກັບຍານ ແລະ ຕັ້ງເປົ້າວ່າຈະໃຊ້ເວລາຢູ່ເທິງອະວະກາດທັງໝົດ 42 ວັນ 3 ຊົ່ວໂມງ 20 ນາທີ ສຳລັບການເດີນທາງ 2,1 ລ້ານກິໂລແມັດ ກ່ອນຈະກັບສູ່ໂລກໃນວັນທີ 10 ຕຸລາ 2022.
ເຖິງຢ່າງໃດກໍຕາມ, ການທີ່ພາລະກິດໃນຄັ້ງນີ້ຖືກເລື່ອນ ເຮັດໃຫ້ກຳນົດການຕ່າງໆຈະຊັກຊ້າອອກໄປ ໂດຍຄາດວ່າຈະມີການປ່ອຍຈະຫລວດອີກໃນວັນທີ 22 ກັນຍາ ຫລື ວັນທີ 5 ກັນຍາ ຖ້າສາມາດແກ້ໄຂບັນຫາໄດ້ທັນ ແລະ ສະພາບອາກາດເອື້ອອຳນວຍ. ແຕ່ຖ້າບໍ່ສາມາດແກ້ໄຂບັນຫາທັງໝົດຈົນພ້ອມຈະປ່ອຍຈະຫລວດໄດ້ພາຍໃນວັນທີ 5 ກັນຍາ ຈະເຮັດໃຫ້ພາລະກິດຖືກເລື່ອນໄປເປັນເດືອນຕຸລາ.
ອ້າງອີງ:
https://www.space.com/artemis-1-moon-rocket-launch-scrub
https://www.nasa.gov/specials/artemis-i/
