ແຟນບານ ວິລລາ ຮຽກຮ້ອງສະໂມສອນປົດ ເຈີຣາດ ອອກຈາກຜູ້ຈັດການທີມ

ຄວັນຫລົງຫລັງຈາກທີ່ ແອສຕັນ ວິລລາ ພາຍໃຕ້ການຄຸມທີມຂອງ ສະຕີເວັນ ເຈີຣາດ ພາດທ່າເສຍໃຫ້ ເວສແຮມ ຢູໄນເຕັດ ຄາຖິ່ນ ວິລລາ ພາດ 0-1 ເມື່ອວັນອາທິດທີ່ຜ່ານມາ ເຮັດໃຫ້ຈົນເຖິງຕອນນີ້ ວິລລາ ລົງສະໜາມໄປແລ້ວ 4 ນັດ ຊະນະ 1 ນັດ ແລະ ເສຍ 3 ມີພຽງ 3 ຄະແນນ ຢູ່ອັນດັບ 15 ຂອງຕາຕະລາງ.

ຈາກຄວາມປະລາໄຊນັດດັ່ງກ່າວ ເດລີ ເມລ ລາຍງານວ່າ : ແຟນບານຂອງ ແອສຕັນ ວິລລາ ອອກອາການບໍ່ພໍໃຈຜົນງານຂອງ ເຈີຣາດ ຢ່າງຫນັກ ແລະ ພາກັນອອກມາລະບາຍຄວາມໃນໃຈຜ່ານສັງຄົມອອນລາຍ ວ່າຕ້ອງການໃຫ້ສະໂມສອນປົດ ສະເຕີເວັນ ເຈີຣາດ ອອກຈາກຕຳແໜ່ງຜູ້ຈັດການທີມໂດຍໄວທີ່ສຸດ.

‘‘ ຂໍຮ້ອງໄລ່ ເຈີຣາດ ອອກໄປຕອນນີ້ເລີຍ ’’.

‘‘  ບັນຫາຂອງ ເຈີຣາດ ຄືຂາດລະບົບການຫລິ້ນຫລັກ ແລະ ບໍ່ກ້າຈະພັກນັກເຕະຕົວຫລັກເພື່ອໃຫ້ນັກເຕະຜົນງານລົງຫລິ້ນ ບັນຫາມັນຈະແຈ້ງຫລາຍ ແຕ່ລາວພັດເບິ່ງບໍ່ເຫັນ ’’.

‘‘  ລາວມີນັກເຕະແບບ ບູເອນເດຍ, ໄບລີ ແລະ ຄູຕິນໂຢ ຢູ່ໃນທີມແທ້ໆ ແຕ່ບໍ່ມີແວວວ່າຍິງປະຕູໄດ້ເລີຍ ຂ້ອຍຮູ້ວ່າສະຖິ ຕິບອກວ່າເຮົາໄດ້ຄະແນນຫລາຍເມື່ອມີ ອິງ ແລະ ວັດກິນ ຫລິ້ນນຳກັນ ແຕ່ລະບົບນີ້ບໍ່ຖືກຕ້ອງ ’’.

‘‘  ລາວຄືຢາພິດ ລາວຄິດແຕ່ເລື່ອງຂອງຕົນເອງ ຂ້ອຍຫມັ້ນໃຈວ່າລາວຈະລະເບີດອາລົມໃນຫ້ອງແຕ່ງຕົວ ຂ້ອຍບໍ່ເຫັນ ຄວາມເປັນຈິດຫນຶ່ງໃຈດຽວຂອງທີມນີ້ອີກຕໍ່ໄປແລ້ວ ’’.

‘‘  ຫາກສະໂມສອນຕ້ອງການສ້າງຮອຍຍິ້ມໃຫ້ກັບແຟນບານ ຕ້ອງໄລ່ ເຈີຣາດ ອອກຕອນນີ້ເລີຍ ’’.

ສຳລັບຕາຕະລາງ 2 ນັດຕໍ່ໄປໃນລີກຂອງ ແອສຕັນ ວິລລາ ຖືວ່າຫນັກໜາສາຫັດ ເພາະຈະຕ້ອງບຸກໄປຢາມ ອາເຊນອລ ແລະ ຕ້ອນຮັບການມາຢາມຂອງ ແມນເຊສເຕີ ຊິຕີ.