Moderna ຟ້ອງ Pfizer-BioNTech ກ່າວຫາຮຽນແບບເຕັກໂນໂລຊີ mRNA ພັດທະນາວັກຊີນປ້ອງກັນໂຄວິດ-19
Moderna ກ່າວຫາ Pfizer-BioNTech ຮຽນແບບເຕັກໂນໂລຊີ mRNA ພັດທະນາວັກຊີນປ້ອງກັນໂຄວິດ-19 ຍື່ນຟ້ອງໃນອາເມລິກາ ແລະ ເຢຍລະມັນຂໍ້ຫາລະເມີດລິຂະສິດ, ຂະນະທີ່ Pfizer ປະຫລາດໃຈ ຊີ້ເຕັກໂນໂລຊີດັ່ງກ່າວພັດທະນາໂດຍ Pfizer ແລະ BioNTech ເອງ.
ບໍລິສັດຜູ້ພັດທະນາວັກຊີນປ້ອງກັນໂຄວິດ-19 ລາຍໃຫຍ່ຄື Moderna ອອກເອກະສານຂ່າວໃນວັນທີ 26 ສິງຫາ ລະບຸວ່າ: ທາງບໍລິສັດຈະຍື່ນຟ້ອງຕໍ່ສານໃນອາເມລິກາ ແລະ ເຢຍລະມັນຕໍ່ບໍລິສັດ Pfizer ແລະ BioNTech ໃນຄວາມຜິດຂໍ້ຫາລະເມີດລິຂະສິດເຕັກໂນໂລຊີ mRNA ໃນການນຳເອົາມາຜະລິດວັກຊີນປ້ອງກັນໂຄວິດ-19.
ທ່ານ ສຕີເຟນ ບານເຊລ ຜູ້ບໍລິຫານຂອງ Moderna ລະບຸວ່າ: ການດຳເນີນຄະດີໃນຄັ້ງນີ້ເປັນໄປເພື່ອປົກປ້ອງນະວັດຕະກຳ mRNA ທີ່ Moderna ລົງທຶນຫລາຍພັນລ້ານໂດລາ ເພື່ອຄິດຄົ້ນເຕັກໂນໂລຊີດັ່ງກ່າວໄລຍະຫລາຍສິບປີຜ່ານມາ.
ທ່ານ ຊານນອນ ຄລິນເຈີ ປະທານເຈົ້າໜ້າທີ່ຝ່າຍກົດໝາຍຂອງ Moderna ລະບຸວ່າ: Moderna ເຊື່ອວ່າ Pfizer ແລະ BioNTech ຮຽນແບບສິ່ງທີ່ Moderna ຄິດຄົ້ນຂຶ້ນມາ ແລະ ນຳໄປໃຊ້ໂດຍບໍ່ໄດ້ຮັບອະນຸຍາດ.
ຖະແຫລງການຂອງ Moderna ລະບຸວ່າ: Moderna ໄດ້ພັດທະນາເຕັກໂນໂລຊີ mRNA ນັບແຕ່ປີ 2010-2016 ເຊິ່ງໃນໄລຍະຜ່ານມາ Moderna ເລືອກຈະບໍ່ດຳເນີນການທາງກົດໝາຍໃນໄລຍະການລະບາດຂອງໂຄວິດ-19 ທີ່ໂລກມີຄວາມຕ້ອງການວັກຊີນສູງ ຈົນສະຖານະການໂຄວິດເຂົ້າສູ່ໄລຍະໃໝ່ ທີ່ການເຂົ້າເຖິງວັກຊີນປ້ອງກັນໂຄວິດ-19 ບໍ່ເປັນບັນຫາອີກຕໍ່ໄປ ຈຶ່ງຕັດສິນໃຈເດີນໜ້າຟ້ອງ.
Moderna ຢືນຢັນວ່າ: ການຟ້ອງຈະບໍ່ກ່ຽວຂ້ອງກັບວັກຊີນທີ່ໃຊ້ໃນ 92 ປະເທດ ພາຍໃຕ້ໂຄງການ COVAX ແລະ ຈະບໍ່ຍື່ນຟ້ອງເພື່ອໃຫ້ຖອນວັກຊີນປ້ອງກັນໂຄວິດຂອງ Pfizer ແລະ BioNTech ອອກຈາກຕະຫລາດ, ແຕ່ມີເປົ້າໝາຍເພື່ອໃຫ້ບໍລິສັດເອກະຊົນຄື Pfizer ແລະ BioNTech ເຄົາລົບສິດໃນຊັບສິນທາງປັນຍາຂອງ Moderna.
ເຖິງຢ່າງໃດກໍຕາມ, ບໍລິສັດ Pfizer ລະບຸວ່າ: ຮູ້ສຶກປະຫລາດໃຈຕໍ່ການຟ້ອງນີ້ ໂດຍອອກຖະແຫລງການປະຕິເສດຂໍ້ກ່າວຫາຂອງ Moderna. ພ້ອມເນັ້ນວ່າ: ວັກຊີນປ້ອງກັນໂຄວິດ-19 ຂອງ Pfizer ພັດທະນາຂຶ້ນດ້ວຍເຕັກໂນໂລຊີ mRNA ທີ່ເປັນກຳມະສິດຂອງ BioNTech ກ່ອນຈະສະແດງຄວາມໝັ້ນໃຈວ່າ: ວັກຊີນປ້ອງກັນໂຄວິດ-19 ຂອງ Pfizer ແລະ BioNTech ພັດທະນາມາຈາກຊັບສິນທາງປັນຍາຂອງຕົນເອງ ແລະ ຈະດຳເນີນການຕໍ່ສູ້ຄະດີຕໍ່ໄປ.
ອ້າງອີງ:
https://investors.modernatx.com/…/Moderna…/default.aspx
https://www.nbcnews.com/…/moderna-sues-pfizer-biontech…
https://www.straitstimes.com/…/moderna-sues-pfizer…
https://www.channelnewsasia.com/…/moderna-sues-pfizer…
