ວິທີເບິ່ງແຍງຮັກສາເມື່ອນໍ້າຖ້ວມເຮືອນ

ຄວາມເສຍຫາຍຫລັງຈາກນໍ້າຖ້ວມ ເປັນປັນຫາສໍາຄັນທີ່ຕ້ອງຈັດການເຊັ່ນ ການສ້ອມແປງ, ການວາງແຜນປ້ອງກັນ, ການເບິ່ງແຍງຮັກສາ ເພື່ອກຽມພ້ອມຮັບມື ແລະ ຫລຸດຄວາມເສຍຫາຍຈາກປັນຫານໍ້າຖ້ວມໃນອີກເທື່ອໜ້າ, ແຕ່ມີສິ່ງທີ່ຕ້ອງເຮັດຫລັງຈາກນໍ້າຖ້ວມເຮືອນດັ່ງນີ້:

– ກວດເຊັກລະບົບໄຟຟ້າໃຫ້ແນ່ໃຈກ່ອນເປີດໃຊ້ງານ

ອັນຕະລາຍທີ່ມາພ້ອມກັບນໍ້າຖ້ວມແມ່ນໄຟຟ້າຮົ່ວ, ໄຟຟ້າດູດ ເພາະບໍ່ມີຄວາມຮູ້ຄວາມຊ່ຽວຊານ ຕ້ອງໃຫ້ຊ່າງມາກວດສອບ ຫລື ຫາກພົບວ່າລະບົບໄຟຟ້າ ເຊັ່ນ ເບກເກີຍັງເປີດໃຊ້ງານຢູ່ ຫລື ບໍ່, ຖ້າເປີດຢູ່ ໃຫ້ຮີບປິດ ພ້ອມກັບໃສ່ຖົງມື ຫລື ຜ້າແຫ້ງເພື່ອປ້ອງກັນໄຟດູດ, ອຸປະກອນ ຫລື ເຄື່ອງໃຊ້ໄຟຟ້າທີ່ຖືກນໍ້າຖ້ວມ, ຖ້າໄຟບໍ່ລັດວົງຈອນ ກໍອາດຈະແປງກັບມາໃຊ້ໄດ້.

– ເຟີນີເຈີທີ່ເຮັດຈາກໄມ້ບໍ່ຄວນເອົາໄປຕາກແດດ

ສໍາລັບປະຕູ ແລະ ເຄື່ອງໃຊ້ທີ່ເຮັດຈາກໄມ້ທີ່ຖືກນໍາຖ້ວມ ອາດຈະອົມນໍ້າ, ໂພງ ແມ່ນບໍ່ໃຫ້ເອົາໄປຕາກແດດ ເພາະຈເຮັດໃຫ້ໄມ້ໂກ່ງ ຫລື ຄົດງໍໄດ້ ຄວນເປີດລົມໃສ່ ຫລື ຕາກໃນຮົ່ມຈົນກວ່າຈະແຫ້ງ.

– ບໍ່ຟ້າວທາສີເຮືອນໃໝ່

ນໍ້າຖ້ວມມັກຈະມີຮອຍເປື້ອນ ແລະ ຄາບຕ່່າງໆຢູ່ແລ້ວ ລວມໄປເຖິງຝາເຮືອນຍັງມີຄວາມປຽກຊຸ່ມຢູ່ ຖ້າທາສີໃໝ່ທັບໃນຕອນທີ່ຝາບໍ່ທັນແຫ້ງດີ ຈະເຮັດໃຫ້ສີຫລຸດອອກມາໄດ້ງ່າຍ ເຮັດໃຫ້ສິ້ນເປືອງງົບປະມານ, ຄວນອະນາໄມໃຫ້ສະອາດ ແລະ ປ່ອຍໃຫ້ແຫ້ງປະມານ 2-3 ເດືອນ.

– ລະວັງສັດມີພິດ

ຫລັງຈາກນໍ້າລົງ, ການເຂົ້າໄປສໍາຫລວດພາຍໃນເຮືອນ ຄວນລະວັງ ງູ, ຂີ້ເຂັບ, ແມງງອດ… ໃນບໍລິເວນທີ່ເປັນມຸມ, ບ່ອນອັບຊື້ນຕ່າງໆພາຍໃນເຮືອນ.

– ລະວັງເພດານພັງລົງມາ

ຫາກບ້ານຖືກນໍ້າຖ້ວມສູງຈົນຮອດເພດານເຮືອນ ເພດານທີ່ເຮັດຈາກແຜ່ນຢິບຊໍາຈະອົມນໍ້າ, ຄວນສັງເກດໃຫ້ດີກ່ອນທີ່ຈະເຂົ້າໄປ ເພາະອາດຈະເຮັດໃຫ້ເປັນອັນຕະລາຍໄດ້.

ສໍາລັບເຮືອນທີ່ຢູ່ໃນພື້ນທີ່ສ່ຽງທີ່ຈະເກີດນໍ້າຖ້ວມ ຄວນວາງແຜນຮັບມືນໍ້າຖ້ວມໄວ້ແຕ່ຕົ້ນ ແລະ ຖ້າເກີດເຫດການນໍ້າຖ້ວມຂຶ້ນມາ ຈຶ່ງຈະສາມາດຮັບມືໄດ້ທັນເວລາ.