ບັງກລາເດັດ ປັບຫຼຸດມື້ຮຽນ ແລະ ເວລາເຮັດວຽກລົງເພື່ອປະຢັດພະລັງງານ

ຂ່າວຕ່າງປະເທດລາຍງານ ວັນທີ 24 ສິງຫາ 2022 ທີ່ຜ່ານມາວ່າ: ທ່ານ ຊີດ ຮາສິນາ ນາຍົກລັດຖະມົນຕີ ຂອງ ບັງກລາເດັດ ໄດ້ມີຄຳສັ່ງໃຫ້ໂຮງຮຽນໃນປະເທດພັກຮຽນເພີ່ມອີກອາທິດລະ 2 ວັນຈາກປັດຈຸບັນ ຈົນກວ່າຈະມີການປ່ຽນແປງ.

ຂະນະທີ່ເວລາການເຮັດວຽກຂອງສະຖານທີ່ລັດຖະບານຈະປັບມາຢູ່ທີ່ລະຫວ່າງ 8:00 ໂມງເຖິງ 15:00 ໂມງ ຕາມເວລາທ້ອງຖິ່ນຈາກປົກກະຕິຢູ່ທີ່ລະຫວ່າງ 9:00 ໂມງເຖິງ 17:00 ໂມງຕາມເວລາທ້ອງຖິ່ນ ມີຜົນບັງຄັບໃຊ້ນັບຕັ້ງແຕ່ວັນທີ 24 ສິງຫາ 2022 ເປັນຕົ້ນໄປ ຈົນກວ່າຈະມີຄຳສັ່ງປ່ຽນແປງ ໃນສ່ວນຂອງສະຖານປະກອບການເອກະຊົນຂໍໃຫ້ເຈົ້າຂອງກິດຈະການພິຈາລະນາປ່ຽນແປງເວລາ ແລະ ມື້ເຮັດວຽກຕາມຄວາມ ເໝາະສົມຂອງກິດຈະການຕົວເອງ. ການເຄື່ອນໄຫວດັ່ງກ່າວຖືວ່າເປັນຄວາມພະຍາຍາມຄັ້ງຫລ້າສຸດ ຂອງລັດຖະບານບັງກລາເດັດ ໃນການປະຢັດພະລັງງານທ່າມກາງວິກິດເສດຖະກິດ ຊຶ່ງໄດ້ຮັບຜົນກະທົບ ແລະ ຄວາມກົດດັນຈາກສະຖານະການໂລກທີ່ເຄັ່ງຕຶງ ສົ່ງຜົນໃຫ້ລັດຖະບານບັງກລາເດັດປັບຂຶ້ນລາຄານ້ຳມັນ 51,7% ໃນເວລາດຽວກັນ ເມື່ອໄລຍະຕົ້ນເດືອນທີ່ຜ່ານມາ.