ສານລົງໂທດຈຳຄຸກຊາຍສັນຊາດຫວຽດນາມ 2 ປີກວ່າ ຖານສໍ້ໂກງຕັ້ງກຸ່ມການເປຍຫວຍແລ້ວບໍ່ເອົາເງິນໃຫ້ລູກຫວຍ
ຂ່າວໜັງສືພິມຄວາມສະຫງົບລາຍງານໃຫ້ຮູ້ວ່າ: ວັນທີ 16 ສິງຫາ 2022 ຜ່ານມານີ້ ອົງການໄອຍະການປະຊາຊົນ ນະຄອນຫຼວງວຽງຈັນ ໄດ້ຕັດສິນຄະດີ ຈໍາເລີຍຊື່ ທ້າວ ຟາມຫິວຮຸຍ ອາຍຸ 34 ປີ ສັນຊາດ ຫວຽດນາມ, ອາຊີບຄ້າຂາຍ, ພັກເຊົາຢູ່ບ້ານໂພນຕ້ອງ ສະຫວາດ ເມືອງຈັນທະບູລີ ນະຄອນຫຼວງວຽງຈັນ ຖືກເຈົ້າຫນ້າທີ່ຈັບຕົວໄປດໍາເນີນຄະດີໃນຂໍ້ຫາການສໍ້ໂກງຊັບ ພົນລະເມືອງຍ້ອນຈໍາເລີຍໄປເກັບເງິນຫວຍແທນແຟນສາວ ແຕ່ແຟນສາວບໍ່ນໍາເງິນດັ່ງກ່າວໄປຈ່າຍລູກຫວຍຕາມກໍານົດ, ຜູ້ກ່ຽວຖືກຄະນະສານອາຍາສານປະຊາຊົນ ນະຄອນຫຼວງວຽງຈັນ ຕັດສິນລົງໂທດຈໍາຄຸກ 2 ປີກວ່າ ພ້ອມທັງປັບໃໝ ແລະ ໃຫ້ໄຊ້ແທນຄ່າເສຍຫາຍຄືນໂຈດທາງແພ່ງ.
ທ້າວ ຟາມຫົວຮຸຍ (ຈຳເລີຍ) ໄດ້ກະທໍາຜິດໃນສະຖານການສໍ້ໂກງຊັບຕາມປະມວນກົດໝາຍອາຍາ ມາດຕາ 233 ເຊິ່ງແຕະຕ້ອງຕໍ່ກໍາມະສິດຂອງບຸກຄົນອື່ນ ແລະ ເຮັດໃຫ້ສັງຄົມບໍ່ມີຄວາມສະຫງົບ ແລະ ການກະທໍາຂອງຈໍາເລີຍຍັງເປັນການກະທໍາຜິດໂດຍເຈດຕະນາເນື່ອງຈາກວ່າພວກຈໍາເລີຍໄດ້ຕົວະຍົວະຫຼອກລວງ ນາງ ຫງວຽນທິລານຢຸງ (ໂຈດທາງແພ່ງ) ເຂົ້າຫຼິ້ນຫວຍນໍາແຕ່ພໍຮອດກໍານົດເວລາໂຈດທາງແພ່ງເອົາຫວຍພວກຈໍາເລີຍແມ່ນບໍ່ຊໍາລະໃຫ້ແກ່ໂຈດທາງແພ່ງ.
ສ່ວນນາງ ເລທິໝີເຮືອງ ຫົວຫນ້າອົງການໄອຍະ ການປະຊາຊົນ ນະຄອນຫຼວງວຽງຈັນໄດ້ຖະແຫຼງ ແລະ ສັ່ງຟ້ອງນາງ ເລທິໝີເຟືອງ (ຜູ້ຖືກຫາ) ຂຶ້ນສານຕາມຄໍາສັ່ງຟ້ອງຜູ້ຖືກຫາຂຶ້ນສານສະບັບເລກທີ 1523/ ອຍກ.ນວ, ລົງວັນທີ 3 ພະຈິກ 2021 ແຕ່ໃນເວລາອອກໝາຍຮຽກໃຫ້ຜູ້ກ່ຽວເຂົ້າມາຮັບຊາບຄໍາສັ່ງຟ້ອງຜູ້ຖືກຫາຂຶ້ນສານນັ້ນນາງເລທິຫນີເຟືອງ ໄດ້ເອົາຕົວຫຼົບໜີ ຕາມການຢັ້ງຢືນຂອງນາຍບ້ານໂພນຕ້ອງສະຫວາດ ເມືອງຈັນທະບູລີ ສະບັບເລກທີ 143/ຫປບ.ພຕສວ, ລົງວັນທີ 23 ກຸມພາ 2022 ຈຶ່ງໄດ້ອອກຄໍາສັ່ງຈັບຕົວຜູ້ກ່ຽວຕາມລະບຽບກົດໝາຍ.
ດ້ວຍເຫດຜົນ ແລະ ຫຼັກຖານດັ່ງກ່າວ, ຄະນະສານ ອາຍາສານປະຊາຊົນນະຄອນຫຼວງວຽງຈັນ ຈຶ່ງເຫັນຄວນຕັດສິນລົງໂທດຕັດອິດສະລະພາບ ທ້າວ ຟາມຫິວຮຸຍ ຈຳຄຸກ 2 ປີ 2 ເດືອນ ກັບ 27 ວັນ ແລະ ປັບໃໝ 10.000.000 ກີບ ພ້ອມທັງໃຫ້ໄຊ້ແທນເງິນຄືນໃຫ້ແກ່ໂຈດທາງແທ່ງຈໍານວນ 20.700.000 ກີບ.
ຂ່າວ:ໜັງສືພິມຄວາມສະຫງົບ
