ເພີ່ມພື້ນທີ່ສີຂຽວ ດ້ວຍການປູກຜັກກິນເອງ

ໃນຊ່ວງສິນຄ້າແພງແບບນີ້ ຫລາຍຄົນອາດຈະຫັນມາປູກຜັກກິນເອງ ເພາະນອກຈາກຈະສະອາດ, ສົດ, ໃໝ່ ແລະ ປອດສານພິດແລ້ວ, ຍັງຊ່ວຍປະຢັດຄ່າໃຊ້ຈ່າຍໄດ້ອີກດ້ວຍ.

ພືດຜັກແບບໃດ ປູກງ່າຍ, ໃຫຍ່ໄວ?

ສໍາລັບມືໃໝ່ຮຽນປູກອາດຈະເລີ່ມຕົ້ນຈາກການເລືອກພືດຜັກທີ່ມີອາຍຸສັ້ນ, ປູກງ່າຍ,​ ສາມາດປູກໄດ້ທຸກສະພາບອາກາດ ຫລື ຜັກທີ່ສາມາດປູກໄດ້ຕະຫລອດປີ, ວິທີນີ້ຈະເຮັດໃຫ້ເຮົາປະຢັດຄ່າໃຊ້ຈ່າຍໃນການຊື້ອາຫານ ແລະ ໝົດຄວາມກັງວົນເລື່ອງສານປົນເປື້ອນ ເພາະຜັກທີ່ປູກເອງຈະປອດໄພກວ່າ ແລະ ດີຕໍ່ຮ່າງກາຍແນ່ນອນ.

ຜັກທີ່ປູກງ່າຍ ໃຫຍ່ໄວ ກິນດີ ກໍຈະເປັນພືດຜັກທີ່ຫລາຍຄົນນິຍົມນໍາມາປຸງແຕ່ງອາຫານໄດ້ຫລາກຫລາຍເຊັ່ນ:

– ໝາກເຜັດ: ເປັນພືດທີ່ລ້ຽງງ່າຍ, ມັກດິນທີ່ບໍ່ແໜ້ນ ພຽງແຕ່ເອົາແກ່ນໝາກເຜັດໄປກ້າໃສ່ໃນພາຊະນະທີ່ຈະປູກ ຫລັງຈາກນັ້ນກໍຖ້າປະມານ 7 ມື້ ກໍຈະມີເບ້ຍໝາກເຜັດໃຫຍ່ຂຶ້ນມາຫລັງຈາກນັ້ນກໍໝັ່ນຫົດນໍ້າ, ພູນດິນ ແລະ ໃສ່ດິນເປັນປະຈໍາຈົນກວ່າຈະອອກໝາກ, ພຽງເທົ່ານີ້ກໍມີໝາກເຜັດໄວ້ກິນຕະຫລອດປີ.

– ຫອມປ້ອມ ກ່ອນອື່ນຕ້ອງກ້າແກ່ນກ່ອນ ໂດຍການນໍາເອົາແກ່ນຜັກຫອມປ້ອມໄປແຊ່ນໍ້າໄວ້ປະມານ 3 ຊົ່ວໂມງ ຕາກລົມໃຫ້ແຫ້ງ ແລະ ນໍາໄປຄົນໃສ່ຂີ້ຊາຍ ຫລື ຂີ້ເຖົ່າ ແລ້ວຈຶ່ງນໍາໄປໃສ່ໃນພາຊະນະທີ່ຈະປູກ ພ້ອມກັບເອົາເຟືອງມາປົກໜ້າດິນໄວ້ເພື່ອບໍ່ໃຫ້ເສຍຄວາມຊຸ່ມ ແລະ ຫົດນໍ້າໃຫ້ຊຸ່ມມື້ລະ 2 ເທື່ອ (ເຊົ້າ-ແລງ), ຖ້າ 40-45 ມື້ ກໍພ້ອມນໍາມາປຸງອາຫານແລ້ວ.

– ຫອມບົ່ວໃບ ນໍາເອົາຕົ້ນຫອມບົ່ວທີ່ເປັນຕົ້ນ ມາຕັດເອົາສ່ວນທີ່ມີຮາກຍາວປະມານ 2-3 ຊັງຕີແມັດ, ແລ້ວຈຶ່ງນໍາໄປປັກໃສ່ດິນທີ່ກຽມໄວ້,​ ຫົດນໍ້າເລັກໜ້ອຍ ພຽງເທົ່ານີ້ກໍຈະມີຫອມບົ່ວໄວ້ກິນໄດ້ຍາວນານ.

– ຜັກສະລັດ ຄວນໃສ່ດິນໃນຖາດ ພ້ອມກັບຫົດນໍ້າໃຫ້ຊຸ່ມ ແລ້ວຈຶ່ງນໍາເອົາແກ່ຜັກສະລັດໄປປູກ, ຖ້າປະມານ 5-7 ມື້ ກໍຈະມີເບ້ຍອ່ອນຂຶ້ນມາ ຫລັງຈາກນັ້ນຈຶ່ງນໍາເອົາເບ້ຍສະລັດອ່ອນນັ້ນໄປປູກອີກເທື່ອໜຶ່ງ ໂດຍໃສ່ຂຸມລະ 1 ຕົ້ນ ແລະ ຖົມດິນໃຫ້ແໜ້ນ, ຖ້າອີກປະມານ 40-45 ມື້ ສະລັດກໍພ້ອມກິນແລ້ວ.