ກຳປູເຈຍຫ້າມນຳເຂົ້າແປ້ງເດັກຈາກໄທ-ມາເລເຊຍຊົ່ວຄາວ ເຫດພົບສ່ວນປະສົມແຮ່ໄຍຫິນ

ສຳນັກງານຄຸ້ມຄ້ອງຜູ້ບໍລິໂພກຂອງກຳປູເຈຍສັ່ງຫ້າມນຳເຂົ້າ ແລະ ຈຳໜ່າຍສິນຄ້າປະເພດແປ້ງທາໂຕເດັກຈາກບາງປະເທດ ຫລັງຈາກກວດພົບສ່ວນປະສົມຂອງແຮ່ໄຍຫິນ ເຊິ່ງເປັນອັນຕະລາຍຕໍ່ສຸຂະພາບ ແລະ ເປັນສານເຮັດໃຫ້ເກີດມະເຮັງ.

ວັນທີ 23 ສິງຫາ 2022, ສຳນັກງານຄຸ້ມຄອງຜູ້ບໍລິໂພກ ການແຂ່ງຂັນ ແລະ ປາບປາມການຫລອກລວງ ຫລື Consumer Protection, Competition and Fraud Repression (CCF) ຂອງປະເທດກຳປູເຈຍ ປະກາດໃຫ້ຢຸດການນຳເຂົ້າ ແລະ ຈຳໜ່າຍສິນຄ້າປະເພດແປ້ງທາໂຕສຳລັບເດັກຫລາຍຍີ່ຫໍ້ຈາກຫລາຍປະເທດ ເນື່ອງຈາກກວດພົບວ່າມີສ່ວນປະສົມຂອງແຮ່ໄຍຫິນ.

CCF ລະບຸໃນຖະແຫລງການວ່າ: ສິນຄ້າທີ່ມີສ່ວນປະສົມຂອງແຮ່ໄຍຫິນດັ່ງກ່າວ ຈຳໜ່າຍພາຍໃຕ້ຊື່ຍີ່ຫໍ້ຕ່າງໆເຊັ່ນ: ຈອນສັນ ແອນ ຈອນສັນ ລຸ້ນ Baby Powder, ຈອນສັນ ແອນ ຈອນສັນ ລຸ້ນ Blossom Baby powder, D-Nee, Kodomo, ແປ້ງເຢັນເກສັດ ແລະ ເບບີ້ມາຍ ລຸ້ນ Natural’N Mild ເຊິ່ງທັງໝົດນີ້ເປັນສິນຄ້າທີ່ຜະລິດໃນປະເທດໄທ.

ສຳລັບສິນຄ້າປະເພດດຽວກັນຈາກປະເທດມາເລເຊຍທີ່ເຂົ້າຂ່າຍຫ້າມຈຳໜ່າຍເຊັ່ນກັນ ໄດ້ແກ່ ແປ້ງເດັກຍີ່ຫໍ້ Pureen ແລະ Laffair Be Love.

ທາງ CCF ຊີ້ແຈງວ່າ: ສິນຄ້າປະເພດເຄື່ອງສຳອາງຈະຕ້ອງປອດຈາກສ່ວນປະສົມທີ່ເປັນແຮ່ໄຍຫິນ ເນື່ອງຈາກເປັນສານທີ່ເຮັດໃຫ້ເກີດອັນຕະລາຍຮ້າຍແຮງຕໍ່ສຸຂະພາບຂອງຜູ້ຊົມໃຊ້. ອີກທັງຍັງເປັນສານເຮັດໃຫ້ເກີດມະເຮັງ. ພ້ອມກ່າວວ່າ: ສິນຄ້າປະເພດແປ້ງເດັກເຫລົ່ານີ້ຈະຕ້ອງເປັນສິນຄ້າທີ່ປອດແຮ່ໄຍຫິນໂດຍເດັດຂາດ.

ນອກຈາກນີ້, ທາງ CCF ຍັງສັ່ງໃຫ້ບໍລິສັດຜູ້ນຳເຂົ້າ ແລະ ຈັດຈຳໜ່າຍຮຽກຄືນສິນຄ້າເຫລົ່ານີ້ອອກຈາກຕະຫລາດ ແລະ ໃຫ້ເວລາ 2 ອາທິດໃນການເກັບຕົວຢ່າງຈາກສິນຄ້າທີ່ມີສ່ວນປະສົມແຮ່ໄຍຫິນເພື່ອນຳໄປວິເຄາະໂດຍຫ້ອງແລັບທີ່ໄດ້ມາດຕະຖານລະດັບນາໆຊາດ ແລະ ເປັນທີ່ຍອມຮັບວ່າມີຄວາມເປັນກາງ ໂດຍບໍ່ມີຄວາມກ່ຽວຂ້ອງກັບບໍລິສັດຜູ້ຜະລິດ ແລະ ບໍລິສັດຜູ້ຈຳໜ່າຍ.