ຈັບໄດ້ໄລ່ທັນ ຊາຍໜຸ່ມທີ່ລັກສາຍຕະຂ່າຍ ໄຟຟ້າເຍືອງທາງ ມາດໍາເນີນຄະດີ ເຄີຍລັກ ມາແລ້ວ 2 ຄັ້ງ
ຂ່າວ ປກສ ນະຄອນຫລວງວຽງຈັນ ລາຍງານໃຫ້ຮູ້ວ່າ: ວັນທີ 23 ສິງຫາ 2022 ຜ່ານມາປກສ ກຸ່ມບໍ່ໂອ ສົມທົບຈັບຜູ້ຖືກສົງໄສຊື່ທ້າວ ໄພສິດ ອາຍຸ 35 ປີ ອາຊີບ ກໍາມະກອນ ພັກເຊົາຢູ່ບ້ານໂພນສະຫວ່າງ ເມືອງສີສັດຕະນາກ ໃນຂໍ້ຫາລັກຊັບ (ລັກສາຍຕະຂ່າຍໄຟຟ້າເຍືອງທາງ) ຢູ່ເຂດຖະໜົນບ້ານທ່ານາ ນໍ້າໜັກ 6 ກິໂລກຣາມ ມູນຄ່າ 5 ລ້ານກວ່າກີບ ພາຍຫຼັງຈັບຕົວແລ້ວ ໄດ້ພາຕົວມາ ປກສ ກຸ່ມບໍ່ໂອ ເພື່ອສອບຖາມເອົາຂໍ້ມູນເບື້ອງຕົ້ນ.
ເບື້້ອງຕົ້ນ ທ້າວໄພສິດ ຮັບສາລະພາບວ່າ: ໄດ້ລັກສາຍຕະຂ່າຍໄຟຟ້າເຍືອງທາງ ມາແລ້ວ 2 ຄັ້ງ ຄື: ໃນວັນທີ 19 ສິງຫາ 2022 ເວລາ 24:00 ໂມງ ໄປລັກຕັດເອົາສາຍຕະຂ່າຍໄຟຟ້າເຍືອງທາງເຂດບ້ານທ່ານາ ດ້ວຍວິທີເອົາຄີມໃຫຍ່ມາໜີບຕັດເອົາ ແຕ່ບໍ່ຮູ້ວ່າຍາວຈັກແມັດ ນໍ້າໜັກ 6 ກິໂລກຣາມ ພາຍຫຼັງໄດ້ແລ້ວກໍນໍາໄປຂາຍຢູ່ຮ້ານຮັບຊື້-ຂາຍເຫຼັກເສດຢູ່ບ້ານໜອງໄຮ ໄດ້ເງິນຈໍານວນ 540.000 ກີບ ກໍ່ນໍາໃຊ້ຈ່າຍໝົດ ແລະ ຄັ້ງທີສອງໃນວັນທີ 21 ສິງຫາ 2022 ເວລາ 24:00 ໂມງ ໄດ້ໄປລັກເອົາສາຍຕະຂ່າຍໄຟຟ້າເຍືອງທາງຢູ່ຈຸດເກົ່າຕື່ມອີກໄດ້ສາຍໄຟຍາວປະມານ 10 ແມັດ ແຕ່ບໍ່ທັນໄດ້ປອກ ຈາກນັ້ນ ກໍນຳຊຸກເຊື່ອງໄວ້ຫ້ອງເເຖວ ຢູ່ບ້ານໂຄກນິນ ເມືອງສີສັດຕະນາກ. ປະຫວັດຜ່ານມາ ທ້າວ ໄພສິດ ໄດ້ພົວພັນເສບຢາເສບຕິດຈົນເຖິງປະຈຸບັນ.
ຕົກມາຮອດວັນທີ 23 ສິງຫາ 2022 ເຈົ້າໜ້າທີ່ ປກສ ກຸ່ມບໍ່ໂອ ໄດ້ສືບຄົ້ນຫາ ພົບເຫັນ ຈຶ່ງຈັບຕົວມາດຳເນີນຄະດີຕາມກົດໝາຍ.
ປັດຈຸບັນ ທ້າວ ໄພສິດ ແລະ ເຄື່ອງຂອງກາງທີ່ເກັບກູ້ຄືນມາໄດ້ ປກສ ກຸ່ມ ບໍໂອ ສົ່ງມອບໃຫ້ກອງບັນຊາການ ປກສ ເມືອງຫາດຊາຍຟອງ ດຳເນີນຄະດີ.
