23 ສິງຫາ ສັນຍາລັກໄຊຊະນະສາມບາດຄ້ອນຍຸດທະສາດ
ໂດຍ: ທິດກໍ່າ
ວັນທີ 23 ສິງຫາ ໄດ້ຫວນຢ້ອນມາຄົບຮອບ 47 ປີອີກວາລະໜຶ່ງ. ຫາກຕັ້ງໂຈດກັນວ່າ 23 ສິງຫາ ມີຄວາມໝາຍແນວໃດຕໍ່ການຢຶດອຳນາດໃນປີ 1975 ຈົນກ້າວສູ່ການໂຄ້ນລົ້ມອຳນາດການປົກຄອງເກົ່າ ພາຍໃຕ້ການປົກຄອງໃນລະບອບສັກດີນາ ແລ້ວປະກາດສ້າງຕັ້ງເປັນປະເທດໃໝ່, ລະບອບໃໝ່ ລະບອບປະຊາທິປະໄຕປະຊາຊົນຕາມເສັ້ນທາງສັງຄົມນິຍົມ ຄືປະເທດສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975.
ການປະກາດເປັນປະເທດສາທາລະນະລັດ ປະຊາທິປະໄຕ ປະຊາຊົນລາວ ເປັນໄຊຊະນະຄັ້ງປະຫວັດສາດອັນຍິ່ງໃຫຍ່ໃນຂະບວນການປະຕິວັດປົດປ່ອຍຊາດ ພາຍໃຕ້ການນຳພາຂອງພັກປະຊາຊົນປະຕິວັດລາວທີ່ໄດ້ນຳພາຕໍ່ສູ້ມາຫລາຍທົດສະຫວັດ ເຊິ່ງໄຊຊະນະດັ່ງກ່າວແມ່ນຍ້ອນການນຳໃຊ້ 3 ບາດຄ້ອນຍຸດທະສາດແບບບົວບໍ່ຊ້ຳນ້ຳບໍ່ຂຸ້ນຄື: ການຕໍ່ສູ້ດ້ວຍການເມືອງ, ການຕໍ່ສູ້ດ້ວຍກຳລັງການທະຫານ ແລະ ການຕໍ່ສູ້ດ້ວຍຂະບວນການລຸກຮື້ຂຶ້ນໂຄ້ນລົ້ມອຳນາດການປົກຄອງເກົ່າຂອງມວນຊົນຜູ້ຮັກຊາດຢູ່ທີ່ນະຄອນຫລວງວຽງຈັນ ແລະ ໃນຂອບເຂດທົ່ວປະເທດ.
ໃນ 3 ປັດໄຈນີ້ ຖ້າຈະໃຫ້ອະທິບາຍຢ່າງລະອຽດນັ້ນກໍຄື ການຕໍ່ສູ້ທາງດ້ານການເມືອງນັ້ນກໍແມ່ນໃຊ້ຮູບການເຈລະຈາສອງຝ່າຍລະຫວ່າງກຳລັງແນວລາວຮັກຊາດກັບຝ່າຍວຽງຈັນ ພາຍໃຕ້ເນື້ອໃນທີ່ຫລາກຫລາຍ ແລະ ມີຫລາຍໆຄັ້ງຈົນກ້າວໄປເຖິງການຕົກລົງເຊັນສັນຍາຮ່ວມກັນບົນພື້ນຖານຄວາມຖືກຕ້ອງປອງດອງຊາດເປັນຫລັກ. ໄປຄຽງຄູ່ກັບການຕໍ່ສູ້ທາງດ້ານການເມືອງ ແລ້ວຍັງການຕໍ່ສູ້ທາງດ້ານການທະຫານເປັນຫົວໃຈຫລັກ ເພື່ອໃຊ້ວິທີການໜູນໜີບໃຫ້ສັດຕູປະລາໄຊ ແລະ ຕົກຢູ່ໃນທ່າຮັບ ສ້າງເງື່ອນໄຂໃຫ້ຝ່າຍກຳລັງຮັກຊາດຢືນຢູ່ທ່າມີໄຊໃນຫລາຍໆບັ້ນຮົບ.
ສ່ວນການຕໍ່ສູ້ທາງດ້ານຂະບວນການລຸກຮື້ຂຶ້ນຂອງມວນຊົນຜູ້ຮັກຊາດນັ້ນກໍແມ່ນໃຊ້ວິທີການປຸກລະດົມມວນຊົນ ກໍຄືປະຊາຊົນບັນດາເຜົ່າຜູ້ຮັກຊາດເຊັ່ນ: ນັກຮຽນ, ນັກສຶກສາ, ປັນຍາຊົນພໍ່ຄ້າຊາວຂາຍ ແລະ ປະຊາຊົນພາກັນລຸກຮື້ຂຶ້ນເດີນຂະບວນປະທ້ວງຂັບໄລ່ໄຖຫົວ ແລະ ລຶບລ້າງອຳນາດການປົກຄອງເກົ່າຢ່າງສິ້ນເຊີງ ຈົນມາຮອດວັນທີ 23 ສິງຫາ 1975 ຈຶ່ງເປັນວັນຢຶດອຳນາດໃນທົ່ວປະເທດ ແລະ ມາຮອດວັນທີ 2 ທັນວາ 1975 ກອງປະຊຸມສະພາປະຊາຊົນສູງສຸດທົ່ວປະເທດຄັ້ງທີໜຶ່ງໄດ້ປະກາດສ້າງຕັ້ງປະເທດໃໝ່, ອຳນາດການປົກຄອງໃໝ່ ຄືສາທາລະນະລັດ ປະຊາທິປະໄຕ ປະຊາຊົນລາວ ຢ່າງມີໄຊ ແລະ ສະຫງ່າຜ່າເຜີຍ. ມາຮອດປັດຈຸບັນນີ້ ສປປ ລາວ ເຮົາກໍມີອາຍຸໄດ້ 47 ປີ ວັນທີ 23 ສິງຫາ ກໍຍັງກາຍເປັນສັນຍາລັກແຫ່ງໄຊຊະນະໃນການຢຶດອຳນາດມາມືປະຊາຊົນນັບແຕ່ມື້ນັ້ນເປັນຕົ້ນມາ.
