ລົງກວດ 3 ວັນພົບເຫັນຜູ້ລະເມີດ ດັດແປງໄຟຕາ ຕິດດອກໄຟສະປອດໄລ ຫຼື ດອກແອວອີດີ ໃສ່ໜ້າລົດ ຫຼື ຫຼັງຄາລົດ.ຈໍານວນ 60 ກວ່າຄັນ
ພັຕ ສຸນີ ໄຊຍະວົງ ຮອງຫົວຫນ້າພະແນກຕໍາຫຼວດ ຜູ້ຊີ້ນໍາກອງຕໍາຫຼວດຈະລາຈອນ ເມືອງໄຊທານີ ລາຍານຜ່ານໜັງສືພິມຄວາມສະຫງົບ ວັນທີ 22 ສິງຫາ 2022 ຜ່ານມານີ້ວ່າ:
ກອງບັນຊາການ ປກສ ເມືອງໄຊທານີ ມອບໃຫ້ກອງຕໍາຫຼວດຈະລາຈອນເມືອງ ເລັ່ງໃສ່ກວດກາການດັດແປງສະພາບເຕັກນິກລົດ ເປັນຕົ້ນແມ່ນລົດໃຫຍທີ່ດັດແປງໄຟຕາ, ຕິດດອກໄຟສະປອດໄລ ຫຼື ດອກແອວອີດີ ໃສ່ໜ້າລົດ ຫຼື ຫຼັງຄາລົດ.
ລະຫວ່າງວັນທີ 17-19 ສິງຫາ 2022 ໄດ້ຕັ້ງຈຸດກວດກາຢູ່ 3 ຈຸດຄື: ເສັ້ນທາງເລກ 10 ເຂດບ້ານໄຮ່-ທ່າງ່ອນ, ເສັ້ນທາງ 450 ປີ ແລະ ເສັ້ນທາງເລກທີ 13 ໃຕ້ ເຂດຫຼັກ 18 ເພື່ອກວດກາລົດທີ່ຕິດດອກໄຟສະປອດໄລ ຫຼື ດອກແອວອີດີ.
ຜ່ານການລົງປະຕິບັດໜ້າທີ່ໃນ 3 ວັນ ພົບເຫັນຜູ້ລະເມີດຈໍານວນ 60 ກວ່າຄັນ, ເຈົ້າໜ້າທີ່ຈຶ່ງໄດ້ສຶກສາອົບຮົມ ແລະ ເຮັດບົດບັນທຶກກ່າວເຕືອນໃຫ້ປົດດອກໄຟສະປອດໄລ ຫຼື ເອວອີດີອອກ ພາຍໃນ 30 ວັນ, ຖ້າວ່າພົບເຫັນໃນຄັ້ງຕໍ່ໄປຈະໃຊ້ມາດຕະການປັບໃຫມຕາມລະບຽບກົດໝາຍ; ນອກຈາກນີ້, ຍັງກວດກາຍານພາຫະນະທີ່ບໍ່ຕິດ ປ້າຍທະບຽນ, ດັດແປງສະພາບເຕັກນິກລົດ, ບໍ່ເສຍຄ່າທໍານຽມທາງ, ບໍ່ກວດກາເຕັກນິກລົດ, ລົດບໍ່ມີເອກະສານ ແລະອື່ນໆ.
ໂອກາດດຽວກັນ, ພັຕ ສຸນີ ໄຊຍະວົງ ຍັງຮຽກຮ້ອງມາຍັງພະນັກງານ, ທະຫານ-ຕໍາຫຼວດ, ພໍ່-ແມ່ ປະຊາຊົນຜູ້ໃຊ້ລົດ-ໃຊ້ຖະໜົນ ຢູ່ພາຍໃນເມືອງໄຊທານີ ຈົ່ງເອົາໃຈໃສ່ປະຕິບັດກົດລະບຽບຈະລາຈອນຢ່າງເຂັ້ມງວດ ໂດຍສະເພາະ ແມ່ນການດັດແປງໄຟຕາລົດດ້ວຍການນໍາເອົາດອກໄຟສະປອດໄລ ຫຼື ດອກເອວອີ ດີມາຕິດໃສ່ລົດນັ້ນ ແມ່ນບໍ່ຖືກຕ້ອງຕາມລະບຽບ ເພາະເວລາສັນຈອນໄປ-ມາໃນຍາມຄໍ່າຄືນ ໄຟຕາລົດ ຂອງທ່ານອາດເຮັດໃຫ້ລົດຄັນອື່ນທີ່ຂີ່ສວນທາງກັບລົດຂອງທ່ານແນມບໍ່ເຫັນ ຫຼື ເຫຼື້ອມຕາ, ສ່ຽງຕໍ່ການເກີດອຸບັດເຫດໄດ້ງ່າຍ.
ສະນັ້ນ, ຫາກທ່ານໃດມີດອກໄຟສະປອດໄລຕິດຢູ່ໜ້າລົດ ຫຼື ຫຼັງຄາລົດ ບັນດາທ່ານຄວນປົດອອກ ເພື່ອບໍ່ເປັນການລົບກວນ ແລະ ສ້າງຄວາມເດືອດຮ້ອນໃຫ້ແກ່ລົດຄັນອື່ນໆທີ່ຂີ່ສວນທາງ ມາ ແລະ ຍັງເປັນການປ້ອງກັນບໍ່ໃຫ້ລົດຄັນອື່ນ ຫຼື ລົດຂອງຕົນເອງເກີດອຸບັດຕິເຫດໃນຍາມຄໍ່າຄືນ.
ທີ່ມາ: ປ້ອງກັນຄວາມສະຫງົບ
