ຕວກກີ ອັດຕາເງິນເຟີ້ເພີ່ມຂຶ້ນທີ່ລະດັບເກືອບ 80%

ສຳນັກຂ່າວຕ່າງປະເທດລາຍງານວັນທີ 21 ສິງຫາ 2022 ທີ່ຜ່ານມາວ່າ: ທະນາຄານກາງຕວກກີໄດ້ປະກາດວ່າ ໄດ້ປັບຫລຸດອັດຕາດອກເບ້ຍນະໂຍບາຍລົງຈາກ 1% ຈາກທີ່ຍັງຄົງຮັກສາອັດຕາດອກເບ້ຍໄວ້ທີ່ລະດັບ 14% ມາດົນນານກວ່າເຄິ່ງປີ ລົງມາຢູ່ທີ່ 13% ໂດຍແນວທາງດັ່ງກ່າວສວນທາງກັບຫລັກການທາງດ້ານເສດຖະສາດທີ່ຜູ້ຊ່ຽວຊານສ່ວນໃຫຍ່ຍຶດຖືມາດົນນານ ນັ້ນຄື ເມື່ອອັດຕາເງິນເຟີ້ເພີ່ມສູງຂຶ້ນ ວິທີການທີ່ຈະໃຊ້ຄວບຄຸມຄືການປັບຂຶ້ນອັດຕາດອກເບ້ຍນະໂຍບາຍໃຫ້ສອດຄ່ອງປະສານກັນ.

ຂະນະທີ່ອັດຕາເງິນເຟີ້ຂອງຕວກກີເພີ່ມຂຶ້ນສູ່ລະດັບ 79,6% ເມື່ອເດືອນກໍລະກົດທີ່ຜ່ານມາ ຖືວ່າເປັນສະຖິຕິສູງທີ່ສຸດໃນຮອບ 24 ປີ ເຖິງແມ່ນວ່າທະນາຄານກາງໃຫ້ເຫດຜົນຂອງການປັບຫລຸດອັດຕາດອກເບ້ຍວ່າ ເພື່ອກະຕຸ້ນການຈ້າງງານ ແລະ ການຂະຫຍາຍຕົວທາງດ້ານເສດຖະກິດ ເຖິງຢ່າງໃດກໍຕາມ, ສະກຸນເງິນລີຣາ ຕວກກີ ຍັງຄົງອ່ອນຄ່າລົງຢ່າງຕໍ່ເນື່ອງເມື່ອທຽບກັບສະກຸນເງິນໂດລາ ແລະ ຍິ່ງສົ່ງຜົນກະທົບຕໍ່ການດຳເນີນຊີວິດປະຈຳວັນຂອງປະຊາຊົນ ຊຶ່ງຕ້ອງປະເຊີນກັບລາຄາອາຫານ, ເຊື້ອໄຟ ແລະ ສິ່ງຂອງຈຳເປັນອີກຫລາຍຢ່າງທີ່ເພີ່ມຂຶ້ນ. ໜຶ່ງໃນນັ້ນຄື ສິມິດ (Simit) ເຂົ້າໜົມປັງ ຊຶ່ງເປັນອາຫານວ່າງທີ່ນິຍົມຫລາຍ ແລະ ອາຫານເຊົ້າແບບດັ້ງເດີມຂອງຊາວຕວກກີ ໂດຍໃນຂະນະນີ້ລາຄາເຂົ້າໜົມປັງດັ່ງກ່າວເພີ່ມສູງຂຶ້ນຫລາຍຈົນກາຍເປັນອາຫານທີ່ຟຸມເຟືອຍສຳລັບຜູ້ທຸກຍາກໄປແລ້ວ ເຫດນີ້ຍິ່ງເນັ້ນຢ້ຳເຖິງຄວາມຕຶງຄຽດຂອງສະຖານະການທາງດ້ານເສດຖະກິດໃນປະເທດ.