ເອັມບັບເປ ສ້າງສະຖິຕິຍິງປະຕູໄວທີ່ສຸດໃນລີກເອິງ

ຄີລຽນ ເອັມບັບເປ ຍັງສຸດຍອດຄືເກ່ົາ ຫລັງສ້າງສະຖິຕິຍິງປະຕູໄວທີ່ສຸດໃນລີກ ເອິງ ເກມພາ ປາຣີສ ແຊັງ ແຊັກແມັງ ບຸກໄປຖະຫລົ່ມ ລີລ 7-1.

ຄີລຽນ ເອັມບັບເປ ດາວຍິງຕີຈະຫລວດ ປາຣີສ ແຊັງ ແຊັກແມັງ ຍັງເກ່ັງບໍ່ຢຸດ ເມື່ອສ້າງສະຖິຕິຍິງປະຕູໄວທີ່ສຸດໃນປະຫວັດສາດ ລີກ ເອິງ ຝຣັ່ງ ໃນເກມບຸກຖະຫລົ່ມ ລີລ ຂາດລອຍ 7-1 ເມື່ອວັນອາທິດທີ່ຜ່ານມາ.

ເອັມບັບເປ ໃຊ້ເວລາພຽງ 8 ວິນາທີ ໃນການເບີກປະຕູທຳອິດໃຫ້ ເປແອສເຊ ເມື່ອແລ່ນໄປຮັບບານທີ່ ລີໂອເນລ ເມສຊີ ຈ່າຍຂ້າມ ກອງຫລັງມາໃຫ້ ກ່ອນຈະຍົກຂ້າມຫົວຂອງ ເລໂອ ຊາດິມ ຜູ້ຮັກສາປະຕູຂອງ ລີລ ເຂົ້າໄປຢ່າງເໜືອຊັ້ນ ແລະ ກາຍເປັນສະຖິຕິຍິງປະ ຕູໄວທີ່ສຸດໃນລີກສູງສຸດຂອງຝຣັ່ງ ທຽບເທົ່າກັບສະຖິຕິເກ່ົາຂອງ ມິເຊລ ຣີໂອ ທີ່ຍິງໃຫ້ ກ໊ອງ ໃນເກມພົບກັບ ການ ເມື່ອປີ 1992.

ນອກຈາກນີ້ ເອັມບັບເປ ຍັງຍິງແຮັດທຣິກໄດ້ສຳເລັດ ຫລັງຍິງເພີ່ມອີກ 2 ປະຕູໃນນາທີທີ 66 ກັບ 87 ນຳອີກ ຂະນະທີ່ອີກ 4 ປະຕູ ທີ່ເຫລືອເປັນຜົນງານຂອງ ເມສຊີ ນາທີທີ 28, ອັຊຣາຟ ຮາຄີມີ ນາທີ 39 ແລະ ເນມາ ທີ່ເຫມົາ 2 ໜ່ວຍນາທີ 43 ກັບ 52 ສົ່ງໃຫ້ ເປແອສເຊ ເປີດສາກລະດູການໃຫມ່ດ້ວຍການຄວ້າໄຊ 3 ເກມລວດ ຄອງບັນລັງຜູ້ນຳ ລີກ ເອິງ ໂດຍຍິງໄປເຖິງ 17 ປະຕູ ແລະ ເສຍພຽງ 3 ປະຕູເທົ່ານັ້ນ.