ແມນຢູ ກຽມຍື່ນຂໍ້ສະເໜີ 100 ລ້ານຢູໂຣ ຫວັງປິດການຊື້ ອັນໂຕນີ

ສື່ລາຍງານວ່າ ແມນເຊສເຕີ ຢູໄນເຕັດ ກຽມຍື່ນຂໍ້ສະເຫນີກວ່າ 100 ລ້ານຢູໂຣໃຫ້ກັບ ອາແຈັກ ອຳເຕີດຳ ໃນການເຊັນສັນຍາກັບ ອັນໂຕນີ ປີກທີມຊາດບຣຊິລ ມາຮ່ວມທີມໃນຕະຫລາດລະດູການນີ້.

ສຳລັບ ອັນໂຕນີ ຄືອີກຫນຶ່ງນັກເຕະເປົ້າຫມາຍຂອງ ແມນເຊສເຕີ ຢູໄນເຕັດ ໃນຕະຫລາດນັກເຕະລະດູການນີ້ ແລະ ກ່ອນໜ້ານີ້ມີ ລາຍງານວ່າພວກເຂົາຍື່ນຂໍ້ສະເໜີຈຳນວນ 60 ລ້ານຢູໂຣ ແລະ 80 ລ້ານຢູໂຣ ໃຫ້ກັບ ອາແຈັກ ພິຈາລະນາແລ້ວ ແຕ່ກໍຖືກປະ ຕິເສດທັງຫມົດ.

ຂະນະທີ່ຕົວນັກເຕະເອງກໍສະແດງທ່າທີຈະແຈ້ງວ່າຕ້ອງການຍ້າຍໄປຫລິ້ນໃຫ້ກັບ ແມນເຊສເຕີ ຢູໄນເຕັດ ເພື່ອຮ່ວມງານກັບ ເອຣີກ ເທນ ຮາກ ອະດີດຜູ້ຈັດການທີມ ອາແຈັກ ອີກເທື່ອຫນຶ່ງ ແລະ ບໍ່ມາຮ່ວມມາຝຶກຊ້ອມກັບທີມ 2 ວັນຕິດຕໍ່ກັນແລ້ວ ເພື່ອກົດດັນໃຫ້ສະໂມສອນປ່ອຍຕົວຕາມລາຍງານຂອງ ຟຣີຊີໂອ ໂຣມາໂຣ ຜູ້ສື່ຂ່າວຄົນດັງ.

ຈົນຫລ້າສຸດ ສື່ຝຣັ່ງ ເປີດເຜີຍວ່າ ແມນຢູ ກຽມເພີ່ມຂໍ້ສະເໜີເປັນ 100 ລ້ານຢູໂຣ ເຊິ່ງຄາດວ່າເປັນລາຄາທີ່ ອາແຈັກ ຕັ້ງໄວ້ ເພື່ອຫວັງເຊັນສັນຍາກັບດາວເຕະອາຍຸ 22 ປີລາຍນີ້ມາເສີມທີມ.