ກຸ່ມຕິດອາວຸດ ອັລ-ຊາບັບ ກໍ່ເຫດ ກາດຍິງ-ບຸກຢຶດໂຮງແຮມໃນໂຊມາລີ ເບື້ອງຕົ້ນເສຍຊີວິດແລ້ວ 12 ຄົນ

ກຸ່ມຕິດອາວຸດຫົວຮຸນແຮງ “ອັລ-ຊາບັບ” ເຊິ່ງມີການເຊື່ອມໂຍງກັບກຸ່ມ “ອັລກໍອິດະ” ບຸກຢຶດໂຮງແຮມໃນນະຄອນຫລວງໂມກາດິຊູ ຂອງໂຊມາລີ, ສະຖານະການຍັງຍືດເຍື້ອ ມີລາຍງານຜູ້ເສຍຊີວິດຈຳນວນຫລາຍ.

ສຳນັກຂ່າວຕ່າງປະເທດລາຍງານວ່າ: ເກີດເຫດກອງກຳລັງຕິດອາວຸດບຸກຢຶດໂຮງແຮມຮາຢັດ ເຊິ່ງເປັນໂຮງແຮມຂະໜາດໃຫຍ່ຕັ້ງຢູ່ໃຈກາງນະຄອນຫລວງໂມກາດິຊູຂອງໂຊມາລີ ໃນຄືນວັນທີ 19 ສິງຫາ. ປັດຈຸບັນ ເຈົ້າໜ້າທີ່ກຳລັງຢູ່ລະຫວ່າງການປິດລ້ອມເພື່ອຢຸດເຫດ ມີລາຍງານຜູ້ເສຍຊີວິດເບື້ອງຕົ້ນແລ້ວ 12 ຄົນ.

ເຈົ້າໜ້າທີ່ຕຳຫລວດໂຊມາລີເປີດເຜີຍວ່າ: ຄົນຮ້າຍກໍ່ເຫດລະເບີດດ້ວຍລະເບີດຂ້າຕົວຕາຍ 2 ຄັ້ງ ກ່ອນຈະເຂົ້າບຸກຢຶດ ແລະ ເປີດສາກຍິງໃນໂຮງແຮມ ໂດຍກຸ່ມຕິດອາວຸດຫົວຮຸນແຮງ “ອັລ-ຊາບັບ” ໄດ້ອອກມາອ້າງຄວາມຮັບຜິດຊອບຕໍ່ເຫດການດັ່ງກ່າວ.

ການໂຈມຕີໂຮງແຮມຮາຢັດຄັ້ງນີ້ ຖືເປັນການໂຈມຕີຄັ້ງໃຫຍ່ທີ່ເກີດຂຶ້ນຫລັງຈາກປະທານາທິບໍດີ ຮຳຊັນ ຊີກ ໂມຮາມຸດ ເຂົ້າຮັບຕຳແໜ່ງຜູ້ນຳໂຊມາລີ ຫລັງຊະນະການເລືອກຕັ້ງໃນເດືອນພຶດສະພາຜ່ານມາ.

ທັງນີ້, ກຸ່ມອັລ-ຊາບັບ ເປັນກຸ່ມຕິດອາວຸດທີ່ປະຕິບັດການຢູ່ໃນໂຊມາລີມາຫລາຍປີ ເພື່ອຫວັງໂຄ່ນລົ້ມລັດຖະບານ ແລະ ບັງຄັບໃຊ້ກົດໝາຍອິສລາມໃນໂຊມາລີ ໂດຍໃນປີ 2020 ກຸ່ມນີ້ເຄີຍກໍ່ເຫດໂຈມຕີໂຮງແຮມໃນນະຄອນຫລວງໂມກາດິຊູໃນລັກສະນະດຽວກັນມາແລ້ວ ເຊິ່ງໃນຄັ້ງນັ້ນມີຜູ້ເສຍຊີວິດ 16 ຄົນ.

ອ້າງອີງ:

https://www.reuters.com/…/least-12-killed-somalia…/

https://www.reuters.com/…/unidentified-attackers-take…/