ຍີ່ປຸ່ນ ປັບຂຶ້ນຄ່າແຮງງານຮັບມືກັບບັນຫາການຂາດແຄນແຮງງານ

ຂ່າວຕ່າງປະເທດລາຍງານ ໃນລະຫວ່າງວັນທີ 1-12 ສິງຫາທີ່ຜ່ານມານີ້, ບໍລິສັດໃຫຍ່ໃນຍີ່ປຸ່ນທີ່ບໍ່ກ່ຽວຂ້ອງກັບການໃຫ້ບໍລິການດ້ານເງິນຈຳນວນ 495 ແຫ່ງໄດ້ເປີດເຜີຍຜົນການສຳຫຼວດພົບວ່າ ຫຼາຍໆບໍໍລິສັດໃນຍີ່ປຸ່ນມີຄວາມພໍໃຈຫຼາຍຂຶ້ນໃນການເພີ່ມຄ່າຈ້າງ ຫຼື ຂຶ້ນເງິນເດືອນໃຫ້ແກ່ພະນັກງານ ໂດຍຄິດເປັນອັດຕາສ່ວນ 44% ຂອງຜູ້ຕອບແບບສອບຖາມທັງໝົດ.

ບໍລິສັດໃນຍີ່ປຸ່ນພະຍາຍາມຫຼີກລ່ຽງການຂຶ້ນຄ່າຈ້າງ ເນື່ອງຈາກພາວະເງິນຝືດທີ່ດຳເນີນມາຫຼາຍສິບປີເຮັດໃຫ້ຍາກທີ່ຈະເພີ່ມຕົ້ນທຶນຜູ້ບໍລິໂພກໃຫ້ສູງຂຶ້ນໄປອີກ ແຕ່ສະຖານະການໃນຂະນະນີ້ປ່ຽນໄປແລ້ວ ເນື່ອງຈາກສິນຄ້າລາຄາແພງ ເງິນເຢນອ່ອນຄ່າ ສົ່ງຜົນກະທົບຕໍ່ຄ່າຄອງຊີບ ແລະ ສ້າງຄວາມຕຶງຄຽດໃຫ້ແກ່ແຮງງານ ເຖິງແມ່ນວ່າທ່ານ ຟູມິໂອະ ຄິຊິດະ ນາຍົກລັດຖະມົນຕີຍີ່ປຸ່ນຍັງຮຽກຮ້ອງໃຫ້ບໍລິສັດແຕ່ລະແຫ່ງປັບຂຶ້ນຄ່າຈ້າງ. ທາງດ້ານທ່ານ ໂຄຢະ ມິຢາມາເອະ ນັກເສດຖະສາດອາວຸໂສແຫ່ງເອສເອັມບີຊີ ນິກໂກະ ຊີຄຽວຣິຕີ (SMBC Nikko Security) ໄດ້ສະແດງຄວາມຄິດເຫັນວ່າ ກະແສ ນ້ຳປ່ຽນໄປເພາະບັນຫາການຂາດແຄນແຮງງານເຮັດໃຫ້ບໍລິສັດຕ່າງໆຕັດສິນໃຈຂຶ້ນຄ່າຈ້າງພ້ອມທັງສົ່ງເສີມສະພາບແວດລ້ອມການເຮັດວຽກໃຫ້ດີຂຶ້ນອີກເຊັ່ນ: ເຮັດສັນຍາຈ້າງງານຂັ້ນຕໍ່າ 1 ປີ ແລະ ໃຫ້ກະສຽນອາຍຸຊ້າລົງ ເພື່ອກະຕຸ້ນໃຫ້ຜູ້ສູງອາຍຸໄດ້ເຮັດວຽກຕໍ່ໄປ.

ນອກຈາກນີ້, ຜົນການສຳຫຼວດຍັງຊີ້ໃຫ້ເຫັນວ່າ ທຸລະກິດ 19% ຮັກສາພະນັກງານຕ່າງຊາດໄວ້ຫຼາຍກວ່າປີ 2017 ທີ່ມີພຽງ 13% ແລະ ບໍລິສັດສາມສ່ວນສີ່ທີ່ຢາກໃຫ້ລັດຖະບານຂອງທ່ານ ຄິຊິດະ ໃຊ້ມາດຕະການຄັ້ງໃຫຍ່ອີກຮອບເພື່ອກະຕຸ້ນເສດຖະກິດຮັບມືກັບບັນຫາຄ່າຄອງຊີບແພງ, ສ່ວນ 44% ຢາກເຫັນນະໂຍບາຍການເງິນແບບໃໝ່ ແລະ ເປັນທາງເລືອກທີີ່ຫຼາຍບໍລິສັດເຫັນດ້ວຍຫຼາຍທີ່ສຸດ.

ຂ່າວ: ປະຊາຊົນ