ເທນ ຮາກ ວອນແຟນບານແມນຢູ ລວມໃຈເພື່ອເສິກແດງເດືອດ-ໂຣນັລໂດ ຍັງຢູ່ໃນແຜນ

ອີຣິກ ເທນ ຮາກ ວອນແຟນບານແມນເຊສເຕີ ຢູໄນເຕັດ ໃຫ້ລວມໃຈເປັນຫນຶ່ງເພື່ອສະໜັບສະໜູນທີມ ໃນການໂຄຈອນມາພົບກັນເສິກແດງເດືອດກັບລີເວີພູລ ວັນທີ 22 ສິງຫານີ້ ພ້ອມຢືນຢັນ ຄຣິສຕຽນໂນ ໂຣນັລໂດ ຍັງຢູ່ໃນແຜນການເຮັດທີມ.

ແມນເຊສເຕີ ຢູໄນເຕັດ ຕົກຢູ່ໃນສະຖານະການຕົກຕຳ່ ຫລັງເປີດລະດູການດ້ວຍຄວາມປະລາໄຊເສຍ 2 ນັດລວດ ແລະການດຳເນີນງານໃນຕະຫລາດຊື້ຂາຍກໍບໍ່ເປັນໄປຕາມທີ່ຄາດຫວັງອີກ ເຮັດໃຫ້ມີຂ່າວວ່າແຟນບານ ກຽມລວມຕົວເພື່ອປະທ້ວງຕະກູລເກລເຊີ ເຊິ່ງເປັນເຈົ້າຂອງສະໂມສອນ.

ເທນ ຮາກ ກ່າວກ່ອນເຖິງນັດສຳຄັນນີ້ວ່າ : ‘‘ ຂ້ອຍເວົ້າໄດ້ພຽງວ່າ ເຈົ້າຂອງສະໂມສອນຕ້ອງການຄວ້າໄຊ ແລະ ເຮົາຕ້ອງການໃຫ້ແຟນບານຊ່ວຍສະໜັບສະໜູນ ຂ້ອຍບໍ່ໄດ້ຢູ່ກັບສະໂມສອນມາດົນພໍທີ່ຈະຮູ້ເບື້ອງຫລັງທັງຫມົດ ແຕ່ເຮົາຕ້ອງຕໍ່ສູ້ຮ່ວມກັນ ແລະ ເປັນຫນຶ່ງດຽວກັນ ’’.

ພ້ອມດຽວກັນນີ້ ເທນ ຮາກ ຍັງຢືນຢັນວ່າ ຄຣິສຕຽນໂນ ໂຣນັລໂດ ຊຸບເປີສະຕາທີມຊາດໂປຣຕຸເກສ ຍັງຢູ່ໃນແຜນ ເຮັດທີມຂອງຕົນເຊ່ັນເກ່ົາ ເຖິງຈະມີຂ່າວວ່າລາວຢາກຍ້າຍອອກຈາກທີມກໍຕາມ.