ແມນຢູ ເປີດສາກຍື່ນຂໍ້ສະເໜີຊື້ ກາເຊມີໂຣ ພວມຄືບໜ້າໄປດ້ວຍດີ

ແມນເຊສເຕີ ຢູໄນເຕັດ ຕົກເປັນຂ່າວໄດ້ຍື່ນຂໍ້ສະເໜີຈຳນວນ 60 ລ້ານປອນໃຫ້ກັບ ຣຽວ ມາດຣິດ ໃນການຄວ້າ ກາເຊມີໂຣ ກອງກາງທີມຊາດບຣາຊິລມາຮ່ວມທີມ ພ້ອມມີລາຍງານເພີ່ມອີກວ່າການຊື້ຂາຍພວມມີຄວາມຄືບໜ້າ.

ສຳລັບ ແມນເຊສເຕີ ຢູໄນເຕັດ ຕ້ອງການນັກເຕະຕຳແໜ່ງກອງກາງມາເສີມທີມໃນຕະຫລາດລະດູການນີ້ ໂດຍມີ ແຟຣັງກີ ເດິ ຢອງ ກອງກາງ ບາເຊໂລນາ ເປັນເປົ້າຫມາຍອັນດັບຫນຶ່ງ ແນວໃດກໍຕາມການຊື້ຂາຍດັ່ງກ່າວໃກ້ຖືກລົ້ມເລີກຢ່າງແນ່ນອນ ຫລັງນັກເຕະບໍ່ຕ້ອງການຍ້າຍອອກຈາກບາເຊໂລນາ.

ຫລັງຈາກນັ້ນພວກເຂົາກໍເລັງເປົ້າໄປຫາ ອາດຣຽງ ຣາບີໂອ ກອງກາງຂອງ ຢູເວນຕຸສ ເຊິ່ງເຖິງວ່າທັງສອງສະໂມສອນຈະສາມາດ ຕົກລົງເລື່ອງຄ່າຕົວໄດ້ແລ້ວ ແຕ່ມີບັນຫາເລື່ອງຄ່າເມື່ອຍເຮັດໃຫ້ການຊື້ຂາຍນີ້ຫລົ່ມໄປອີກ.

ຈົນເມື່ອຕົ້ນອາທິດທີ່ຜ່ານມາມີລາຍງານວ່າ ແມນເຊສເຕີ ຢູໄນເຕັດ ໄດ້ວາງເປົ້າໄປຫາ ກາເຊມີໂຣ ກອງກາງຕົວຮັບຂອງ ຣຽວ ມາດຣິດ ແລະ ຍົກໃຫ້ເປັນເປົ້າຫມາຍຫລັກຄົນໃຫມ່ໃນການເຊັນສັນຍາຂອງຕະຫລາດລະດູການນີ້.

ຈົນຫລ້າສຸດ ໄຊມອນ ສະໂຕນ ແລະ ກິເຢມ ບາລາເກ ສອງຜູ້ປະກາດຂ່າວຈາກ BBC ລາຍງານວ່າ ແມນເຊສເຕີ ຢູໄນເຕັດ ໄດ້ເປີດສາກຍື່ນຂໍ້ສະເໜີໃນການຄວ້າ ກາເຊມີໂຣ ແລ້ວດ້ວຍມູນຄ່າປະມານ 60 ລ້ານປອນ.

ຂະນະທີ່ ເດວິດ ອນສະຕຣີນ ຜູ້ປະກາດຂ່າວຈາກ The Athletic ສື່ຊັ້ນນຳລະບຸເພີ່ມວ່າ ຂໍ້ຕົກລົງລະຫວ່າງທັງສອງສະໂມ ສອນພວມຄືບໜ້າ ໂດຍເຊື່ອວ່າ ກາເຊມີໂຣ ໄດ້ໃຫ້ສັນຍາທາງບວກຂອງຄວາມປາຖະໜາທີ່ຈະຍ້າຍໄປຮ່ວມທີມແມນຢູ ເຊິ່ງຈະເຮັດໃຫ້ນັກເຕະອາຍຸ 30 ປີ ກາຍເປັນຫນຶ່ງໃນນັກເຕະທີ່ໄດ້ຮັບຄ່າເມື່ອຍສູງສຸດຂອງສະໂມສອນ.