ຈີນເລັ່ງເຮັດຝົນທຽມໃນຫລາຍມົນທົນ ຮັບມືໄພແຫ້ງແລ້ງຮຸນແຮງ ແລະ ວິກິດຄື້ນຄວາມຮ້ອນຍາວນານເປັນປະຫວັດສາດ

ທາງການຈີນເລັ່ງດຳເນີນການເຮັດຝົນທຽມໃນຫລາຍມົນທົນທາງພາກກາງ ແລະ ພາກຕາເວັນຕົກສຽງໃຕ້ ທ່າມກາງຄວາມພະຍາຍາມຮັບມືສະຖານະການໄພແລ້ງຂັ້ນຮຸນແຮງ ແລະ ຄື້ນຄວາມຮ້ອນທີ່ແຜ່ປົກຄຸມຍາວນານທີ່ສຸດເປັນປະຫວັດສາດກວ່າ 2 ເດືອນ.

ຜົນກະທົບຈາກໄພແລ້ງ ແລະ ຄື້ນຄວາມຮ້ອນດັ່ງກ່າວ ສົ່ງຜົນໃຫ້ແມ່ນ້ຳແຢງຊີ ເຊິ່ງເປັນແມ່ນ້ຳຍາວທີ່ສຸດໃນທະວີບອາຊີ ມີລະດັບນ້ຳໃນບາງຊ່ວງຫລຸດລົງຕໍ່າສຸດເປັນປະຫວັດສາດ, ຂະນະທີ່ມີຝົນຕົກໜ້ອຍກວ່າໄລຍະປົກກະຕິເຖິງເຄິ່ງໜຶ່ງ.

ໂດຍຫລາຍມົນທົນຮອບແມ່່ນ້ຳແຢງຊີເຊັ່ນ: ມົນທົນຫູເປີຍ ມີການຍິງຈະຫລວດບັນທຸກສານເຄມີເພື່ອມີການບົ່ມຂີ້ເຝື້ອ (Cloud Seeding) ແລະ ເຮັດໃຫ້ເກີດຝົນຕົກລົງມາເພີ່ມຂຶ້ນ ແຕ່ເນື່ອງຈາກບາງພື້ນທີ່ມີປະລິມານຂີ້ເຝື້ອໜ້ອຍ ເຮັດໃຫ້ຄວາມພະຍາຍາມເຮັດຝົນທຽມເປັນໄປຢ່າງຍາກລຳບາກ.

ຂະນະດຽວກັນ, ສະພາບຄື້ນຄວາມຮ້ອນ ເຊິ່ງເຮັດໃຫ້ລະດັບອຸນຫະພູມຫລາຍພື້ນທີ່ເພີ່ມສູງເກີນ 40 ອົງສາ ສົ່ງຜົນໃຫ້ປະຊາຊົນມີການໃຊ້ເຄື່ອງປັບອາກາດເພີ່ມຂຶ້ນ ແລະ ປະລິມານການໃຊ້ໄຟຟ້າໃນໄລຍະນີ້ເພີ່ມສູງຂຶ້ນ ເຮັດໃຫ້ເກີດຄວາມເຄັ່ງຕຶງຕໍ່ການຜະລິດໄຟຟ້າໃນຫລາຍພື້ນທີ່ ແລະ ເກີດໄຟຟ້າມອດໃນບາງມົນທົນ ສົ່ງຜົນກະທົບຕໍ່ປະຊາຊົນຫລາຍລ້ານຄົນ.

ຢູ່ມົນທົນເສສວນ ເຊິ່ງລະອັບອຸນຫະພູມສູງກວ່າ 40 ອົງສາ ທາງການທ້ອງຖິ່ນໄດ້ຂໍໃຫ້ສຳນັກງານລັດຖະບານທຸກແຫ່ງໃນມົນທົນ ໃຊ້ເຄື່ອງປັບອາກາດໃນລະດັບອຸນຫະພູມບໍ່ຕໍ່າກວ່າ 26 ອົງສາ ເພື່ອປະຢັດໄຟຟ້າ ແລະ ຂໍໃຫ້ເຈົ້າໜ້າທີ່ໃຊ້ຂັນໄດແທນລິບຖ້າເປັນໄປໄດ້.

ສ່ວນຢູ່ເມືອງຕ້າໂຈ ເຊິ່ງມີປະຊາກອນປະມານ 5,4 ລ້ານຄົນ ມີລາຍງານຈາກສື່ທ້ອງຖິ່ນວ່າ: ເກີດໄຟຟ້າມອດທົ່ວເມືອງດົນກວ່າ 3 ຊົ່ວໂມງ.

ນອກຈາກນີ້ຍັງພົບວ່າໂຮງງານຫລາຍແຫ່ງຖືກບັງຄັບໃຫ້ຫລຸດການຜະລິດ ຫລື ຢຸດການເຮັດວຽກ ເຊິ່ງເປັນສ່ວນໜຶ່ງຂອງມາດຕະການສຸກເສີນໃນບາງມົນທົນ ເພື່ອປ່ຽນການຈ່າຍໄຟຟ້າມຸ້ງເນັ້ນໃສ່ຄອບຄົວ.

ຂະນະທີ່ອ່າງເກັບນ້ຳສຳລັບໂຮງງານໄຟຟ້າພະລັງນ້ຳຫລາຍແຫ່ງ ມີລາຍງານວ່າລະດັບນ້ຳຫລຸດລົງເກີນກວ່າເຄິ່ງ ສົ່ງຜົນໃຫ້ເກີດຜົນກະທົບຕໍ່ປະລິມານການຜະລິດໄຟຟ້າເຊັ່ນກັນ.

ອ້າງອີງ:

https://www.bbc.com/news/world-asia-china-62573547