ສະຫາຍ ພົນເອກ ຈັນສະໝອນ ຈັນຍາລາດ ພົບປະສອງຝ່າຍ ກັບ ລັດຖະມົນຕີກະຊວງປ້ອງກັນປະເທດ ແຫ່ງ ສ ຣັດເຊຍ
ຂ່າວໜັງສືພິມກອງທັບລາຍງານໃຫ້ຮູ້ວ່າ: ວັນທີ 16 ສິງຫາ 2022 ຜ່ານມານີ້ສະຫາຍພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ ພ້ອມດ້ວຍຄະນະ ໄດ້ພົບປະສອງຝ່າຍກັບສະຫາຍພົນເອກ ເຊຣເກ ໂຊຍກູ ລັດຖະມົນຕີກະຊວງປ້ອງກັນປະເທດແຫ່ງສະຫະພັນຣັດເຊຍເນື່ອງໃນໂອ ກາດທີ່ເດີນທາງເຂົ້າຮ່ວມກອງປະຊຸມຄວາມໝັ້ນຄົງສາກົນມົດສະກູຄັ້ງທີ10.
ສອງລັດຖະມົນຕີກະຊວງປ້ອງກັນປະເທດ ສປປ ລາວ ແລະ ສ ຣັດເຊຍ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອມາແຕ່ດົນນານແລະສືບຕໍ່ໄດ້ຮັບການຮັດແໜ້ນແລະເສີມຂະຫຍາຍຈາກສອງລັດຖະບານ, ສອງກອງທັບ ແລະ ປະຊາຊົນສອງຊາດລາວແລະ ສະຫະພັນຣັດເຊຍ ຕະຫຼອດມາ. ພ້ອມນີ້ສອງລັດຖະມົນຕີກະຊວງປ້ອງກັນປະເທດລາວ ແລະ ສະຫະພັນຣັດເຊຍຍັງໄດ້ສະຫຼຸບຕີລາຄາຄືນເຖິງໝາກຜົນແຫ່ງການຮ່ວມມືວຽກງານການທະຫານລະຫວ່າງສອງກອງທັບໃນໄລຍະຜ່ານມາແມ່ນໄດ້ຮັບຜົນສຳເລັດຢ່າງສະຫງ່າງາມ, ພ້ອມດຽວກັນນີ້ ກໍຍັງໄດ້ປຶກສາຫາລືເຖິງ ແຜນການທີ່ຈະສື່ບຕໍ່ຮ່ວມມືໃນຕໍ່ໜ້າລະຫວ່າງກອງທັບປະຊາຊົນລາວ ແລະ ກອງທັບແຫ່ງ ສະຫະພັນຣັດເຊຍ.
ສະຫາຍ ພົນເອກ ຈັນສະໝອນ ຈັນຍາລາດ ໄດ້ຕາງໜ້າໃຫ້ລັດຖະບານ, ກອງທັບ ແລະ ປະຊາຊົນລາວສະແດງຄວາມຮູ້ບຸນຄຸນຢ່າງສູງມາຍັງລັດຖະບານກໍຄືກະຊວງປ້ອງກັນປະເທດແຫ່ງສະຫະພັນຣັດເຊຍທີ່ໄດ້ໃຫ້ການຊ່ວຍເຫຼືອອັນລ້ຳຄ່າໃຫ້ແກ່ ສປປ ລາວ ກໍຄືກອງ ທັບປະຊາຊົນລາວໃນດ້ານຕ່າງໆຕະຫຼອດໄລຍະຜ່ານມາເປັນຕົ້ນແມ່ນ: ຊ່ວຍເຫຼືອກໍ່ສ້າງພະນັກງານ-ນັກຮົບຂະແໜງການຕ່າງໆຢູ່ບັນດາໂຮງຮຽນຂອງກະຊວງປ້ອງກັນປະເທດແຫ່ງສະຫະພັນຣັດເຊຍ, ການຮ່ວມມືກ່ຽວກັບການເກັບກູ້ລະເບີດເພື່ອມະນຸດສະທຳຢູ່ ສປປ ລາວ ແລະ ດ້ານອື່ນໆການຊ່ວຍເຫລືອດັ່ງກ່າວໄດ້ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງລາວ ກໍຄືສ້າງກອງທັບປະຊາຊົນລາວໃຫ້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ.
ການພົບປະລະຫວ່າງສອງລັດຖະມົນຕີກະຊວງປ້ອງກັນປະເທດ ລາວ ແລະ ຣັດເຊຍ ໃນຄັ້ງນີ້ ແມ່ນເປັນການປະກອບສ່ວນເຂົ້າໃນການຊຸກຍູ້ ແລະ ຮັດແໜ້ນ ສາຍພົວພັນມິດຕະພາບລະຫວ່າງ ສອງປະເທດ, ສອງກອງທັບ ແລະ ປະຊາຊົນສອງຊາດລາວ ແລະ ຣັດເຊຍ ໃຫ້ແໜ້ນແຟ້ນຈະເລີນງອກງາມຍິ່ງໆຂຶ້ນ.
