ຣັດເຊຍສະແດງແບບຈຳລອງສະຖານີອະວະກາດຂອງຕົນເອງ ຫລັງປະກາດຖອນຕົວຈາກສະຖານີອະວະກາດນາໆຊາດ
ວັນທີ 15 ສິງຫາ 2022, ໜ່ວຍງານອະວະກາດຂອງຣັດເຊຍໄດ້ເຜີຍແບບຈຳລອງຂອງສະຖານີອະວະກາດທີ່ຣັດເຊຍກຽມສ້າງຂຶ້ນ ເຊິ່ງຖືເປັນການສົ່ງສັນຍານວ່າ: ຣັດເຊຍເຮັດແທ້ຕໍ່ການຖອນຕົວອອກຈາກການເປັນສະມາຊິກຂອງສະຖານີອະວະກາດນາໆຊາດ (ISS) ຫລັງປີ 2024 ແລະ ຈະເດີນໜ້າສ້າງໂຄງການສະຖານີອະວະກາດຂອງຕົນເອງ.
ອົງການອະວະກາດສະຫະພັນຣັດເຊຍ ຫລື Roscosmos ໄດ້ນຳສະເໜີແບບຈຳລອງສະຖານີອະວະກາດທີ່ມີຊື່ວ່າ: Ross ໃນງານວາງສະແດງ Army-2022 ເຊິ່ງເປັນການຈັດສະແດງຜົນງານໃນກຸ່ມອຸດສາຫະກຳທະຫານ. ພ້ອມລະບຸວ່າ: ການປ່ອຍສະຖານີອະວະກາດຂອງຣັດເຊຍນັ້ນຈະແບ່ງເປັນ 2 ໄລຍະ ແລະ ເມື່ອສຳເລັດຈະສາມາດຮອງຮັບນັກບິນອະວະກາດໄດ້ສູງສຸດ 4 ຄົນ ໂດຍອ້າງວ່າ: ສະຖານີອະວະກາດນີ້ຈະຊ່ວຍໃຫ້ນັກບິນອະວະກາດມີມຸມມອງທີ່ກວ້າງຂຶ້ນໃນການເຝົ້າສັງເກດໂລກຫລາຍກວ່າປັດຈຸບັນ.
ສື່ທາງການຣັດເຊຍລະບຸວ່າ: ການສົ່ງສະຖານີອະວະກາດຂຶ້ນສູ່ວົງໂຄຈອນໄລຍະທຳອິດຈະເລີ່ມຕົ້ນໃນປີ 2025-2026 ຫລື ບໍ່ເກີນປີ 2030, ສ່ວນໄລຍະທີສອງ ແລະ ໄລຍະສຸດທ້າຍຄາດວ່າຈະເລີ່ມຕົ້ນໄດ້ໃນປີ 2030-2035 ໂດຍຈະບໍ່ມີນັກບິນອະວະກາດປະຈຳຢູ່ຖາວອນ ແຕ່ຈະສົ່ງນັກບິນຂຶ້ນໄປປີລະ 2 ຄັ້ງ.
ການເຄື່ອນໄຫວດັ່ງກ່າວມີຂຶ້ນເນື່ອງຈາກຣັດເຊຍຕ້ອງການຫລຸດການອາໄສປະເທດຕາເວັນຕົກ ຫລັງຈາກອາເມລິກາ ແລະ ປະເທດພັນທະມິດ ໄດ້ບັງຄັບໃຊ້ມາດຕະການຂວ້ຳບາດ ເພື່ອຕອບໂຕ້ທີ່ຣັດເຊຍສົ່ງທະຫານເຂົ້າບຸກອູແກຣນ ໂດຍຕັ້ງເປົ້າໂຈມຕີດ້ານເສດຖະກິດ, ເງິນທຶນ ແລະ ເຕັກໂນໂລຊີ ເຮັດໃຫ້ຣັດເຊຍຕັດສິນໃຈເດີນໜ້າໂຄງການອະວະກາດຕໍ່ໄປດ້ວຍຕົນເອງ ຫລື ອາດຂະຫຍາຍການຮ່ວມມືກັບປະເທດອື່ນໆ ຄືຈີນ ແລະ ອີຣານແທນ.
ISS ຖືກສົ່ງຂຶ້ນສູ່ວົງໂຄຈອນເປັນຄັ້ງທຳອິດໃນປີ 1998 ແລະ ມີນັກບິນອະວະກາດຂຶ້ນໄປປະຈຳການຢ່າງຕໍ່ເນື່ອງນັບແຕ່ເດືອນພະຈິກ 2000 ພາຍໃຕ້ການຮ່ວມມືທີ່ນຳໂດຍອາເມລິກາ ແລະ ຣັດເຊຍ ຮ່ວມກັບປະເທດອື່ນໆເຊັ່ນ: ການາດາ, ຍີ່ປຸ່ນ ແລະ ອີກ 11 ປະເທດເອີຣົບ ໂດຍ ISS ຖືກເບິ່ງວ່າເປັນສັນຍາລັກຂອງການຮ່ວມມືລະຫວ່າງປະເທດມະຫາອຳນາດດ້ານອະວະກາດ ຄືອາເມລິກາ ແລະ ຣັດເຊຍໃນໂລກຍຸກຫລັງສົງຄາມເຢັນ. ເຖິງຢ່າງໃດກໍຕາມ, NASA ກ່າວວ່າ: ທາງອົງການຍັງບໍ່ເຄີຍໄດ້ຮັບການຢືນຢັນຢ່າງເປັນທາງການຈາກຣັດເຊຍກ່ຽວກັບການຖອນຕົວດັ່ງກ່າວ ໂດຍເຂົ້າໃຈວ່າຣັດເຊຍຈະຮ່ວມໂຄງການຕໍ່ຮອດປີ 2028.
