ອຸທົກກະໄພ ອັນຕະລາຍເກີດຈາກທຳມະຊາດ ພວກເຮົາຈະປະໝາດບໍ່ໄດ້
ໂດຍ: ທິດກໍ່າ
ນັບແຕ່ຕົ້ນເດືອນສິງຫາ ເປັນຕົ້ນມາ ພາຍຸຝົນໄດ້ຕົກໜໍ່າລົງຢູ່ໃນຂອບເຂດປະເທດລາວເກືອບທົ່ວທຸກພາກຂອງປະເທດ ຕ່າງແຕ່ວ່າມີບ່ອນຕົກຫລາຍຕົກໜ້ອຍ ໂດຍຍສະເພາະຢູ່ແຂວງພາກເໜືອ ເຊັ່ນ ອຸດົມໄຊ, ບໍແກ້ວ, ຫລວງນໍ້າທາ, ຜົ້ງສາລີ ແລະ ຫົວພັນ ປີນີໄດ້ຮັບຜົນກະທົບໜັກ
ຢ່າງໃດກໍດີ, ເພື່ອເປັນການຕອບໂຕ້ ແລະ ຮັບມືຕໍ່ສະພາບດັ່ງກ່າວ ທາງແຂວງ ກໍຄືຄະນະກຳມະການຄຸ້ມຄອງໄພພິບັດຂັ້ນແຂວງ ໄດ້ຈັດກຳລັງທະຫານຈຳນວນ 600 ກວ່າຄົນ ລົງພື້ນທີ່ເພື່ອໄປຊ່ວຍເຫລືອປະຊາຊົນທີ່ຖືກໄພພິບັດຈາກອຸທົກກະໄພຄັ້ງນີ້ຢ່າງຮີບດ່ວນ.
ດັ່ງພວກເຮົາຮັບຮູ້ນຳກັນແລ້ວວ່າ, ນັບແຕ່ເດືອນມິຖຸນາ, ກໍລະກົດ, ສິງຫາ ຫລື ອາດແກ່ຍາວໄປຮອດກັນຍາ ເປັນຊ່ວງລະດູຝົນ ເຊິ່ງເຖົ້າແກ່ບູຮານເພິ່ນເຄີຍເອີ້ນກັນວ່າ ຝົນຕົກລິນກາງເກົ້າກາງສິບ, ເຂົ້າກຳລັງເປັນບ່າວເປັນສາວ ພວມຂຽວອຸ່ມທຸ່ມຢູ່ທົ່ງນາ, ຍາມຝົນຕົກລິນ ໄດ້ກິນປາລົງຕ້ອນລົງຫລີ່. ທ້ອງຖິ່ນໃດ, ບ້ານເມືອງໃດ ຫລື ແຂວງໃດຟ້າຝົນດີ ອຸດົມສົມບູນກໍເຕັມໄປດ້ວຍເຂົ້າປາອາຫານ, ແຕ່ກົງກັນຂ້າມ ປີໃດຫາກມີພາຍຸ ຫລື ຝົນຕົກຫລາຍມັນກໍເກີດມະຫາອຸບາດ ເໝືອນດັ່ງນ້ຳຖ້ວມ 2 ແຂວງພາກກາງ ແລະ 4 ແຂວງພາກໃຕ້ໃນປີ 2018 ຜ່ານມາ.
ແຕ່ແນວໃດກໍຕາມ, ສະເພາະລະດູຝົນປີນີ້ອາດຈະຍັງມີພາຍຸອີກລູກໃໝ່ມາທຳລາຍພື້ນຖານການຜະລິດ, ສັດສາວາສິ່ງ ແລະ ບ້ານເຮືອນຂອງປະຊາຊົນບັນດາເຜົ່າຕື່ມອີກ ໂດຍສະເພາະແມ່ນຜູ້ທີ່ຢູ່ຕາມແຄມເຊ, ແຄມຫ້ວຍ ເພາະຟ້າຝົນສະໄໝນີ້ມັນຕ່າງເກົ່າຕ່າງຫລັງຫລາຍ ຍ້ອນວ່າໂລກຂອງເຮົາ ກໍຄືທຳມະຊາດ ແລະ ສິ່ງແວດລ້ອມມັນນັບມື້ມີການປ່ຽນແປງໄປເລື້ອຍໆ.
ຫາກຕັ້ງໂຈດກັນວ່າ, ເພື່ອຫລີກລ່ຽງຜົນກະທົບຈາກພາຍຸຝົນຕົກນ້ຳຖ້ວມ ພວກເຮົາຕ້ອງເຮັດແນວໃດ. ຢູ່ໃນແນວທາງພັດທະນາເສດຖະກິດ-ສັງຄົມຂອງພັກ ແລະ ລັດຖະບານເຮົາ ໂດຍສະເພາະໃນມະຕິຄັ້ງທີ XI ແມ່ນໄດ້ເນັ້ນໜັກເຖິງການພັດທະນາແບບຍືນຍົງ ແລະ ສີຂຽວ ໝາຍວ່າເຮັດແນວໃດກໍເຮັດ ທຸກສິ່ງທຸກຢ່າງແມ່ນຕ້ອງຄຳນຶງເຖິງສິ່ງແວດລ້ອມເປັນຫລັກ ການສ້າງສາພັດທະນາບໍ່ໃຫ້ມີຜົນກະທົບຕໍ່ຊີວິດການເປັນຢູ່ຂອງປະຊາຊົນເຮົາ.
ໄປຄຽງຄູ່ກັນນັ້ນ ກໍຕ້ອງມີການອະນຸລັກຮັກສາປ່າ ແລະ ປູກປ່າໃຫ້ເປັນສີຂຽວໃນທົ່ວປະເທດ. ກົງກັນຂ້າມ ຖ້າຫາກພວກເຮົາມີແຕ່ພາກັນລັກຕັດໄມ້ທຳລາຍປ່າໄປຕິກໆ ໂທດຂອງການທຳລາຍປ່າມັນຈະມາສັ່ງສອນເຮົາດ້ວຍພາຍຸຝົນຕົກມະຫາອຸບາດແບບຄາດບໍ່ເຖິງແນ່ນອນ.
