ບ້ານປາກແຟນ ເມືອງຊຽງເງິນ ແຂວງຫລວງພະບາງ ໄດ້ຮັບຜົນກະທົບຈາກໄພນ້ຳຖ້ວມ ແລະ ມີເຮືອນຖືກນ້ຳພັດໄຫລ 4 ຫລັງ

ຄະນະສະເພາະກິດໄພພິບັດທຳມະຊາດ ເມືອງຊຽງເງິນ ໃຫ້ຮູ້ວ່າ: ວັນທີ 13 ສິງຫາ 2022 ຜ່ານມາ, ທາງຄະນະໄດ້ເຂົ້າສຳຫລວດພື້ນທີ່ບ້ານປາກແຟນ ເມືອງຊຽງເງິນ ແຂວງຫລວງພະບາງ ທີ່ເກີດເຫດການນ້ຳບາກ ແລະ ນ້ຳແຟນ ໄດ້ເອີໄຫລນອງກະທັນຫັນຖ້ວມເຮືອນປະຊາຊົນ ແລະ ພັດເຮືອນປະຊາຊົນໄຫລ ໃນຄັ້ງວັນທີ 11 ສິງຫາ 2022 ຜ່ານມາ, ເຫດການນ້ຳຖ້ວມຄັ້ງນີ້ມີຄອບຄົວທີ່ຖືກຜົນກະທົບທັງໝົດ 27 ຄອບຄົວ, ໃນນີ້ມີຄອບຄົວທີ່ຖືກຜົນກະທົບໜັກ 8 ຄອບຄົວ ແລະ ມີເຮືອນທີ່ຖືກນໍ້າພັດໄຫລໜີ 4 ຫລັງ, ຈາກການປະເມີນຄວາມເສຍຫາຍໃນເບື້ອງຕົ້ນທັງໝົດແມ່ນ 300 ລ້ານກ່ວາກີບ, ປັດຈຸບັນສະພາບຂອງນ້ຳແມ່ນໄດ້ຫລຸດລົງເປັນປົກກະຕິແລ້ວ, ແຕ່ການໄປມາຫາສູ່ແມ່ນຍັງມີຄວາມລຳບາກຫລາຍ, ບາງເສັ້ນທາງຖືກຕັດຂາດ ລົດໃຫ່ຍບໍ່ສາມາດເຂົ້າໄປເຖິງໄດ້. ທາງນໍ້າກະບໍ່ສາມາດເອົາເຮືອເຂົ້າໄປໄດ້ເນື້ອງຈາກວ່າມີເຫຍື້ອໄມ້ຈໍານວນຫລາຍເຕັມໜ້ານໍ້າອັດທາງເຂົ້າ, ໄຟຟ້າຖືກຕັດຂາດ, ນໍ້າສະອາດບໍ່ມີໃຊ້, ເຮັດໃຫ້ປະຊາຊົນລຳບາກຫລາຍ.
ປະຈຸບັນປະຊາຊົນໄດ້ພ້ອມກັນສ້ອມແປງທາງບາງເສັ້ນທາງມີດິນເຈື່ອນຖົມທາງ ໂດຍການຂົນດິນອອກ ເພື່ອເຮັດໃຫ້ລົດໃຫ່ຍສາມາດແລ່ນໄດ້ຊົ່ວຄາວ, ສ່ວນສະພາບການໃນຕໍ່ໜ້າຫາກມີຄວາມຄີບໜ້າແນວໃດນັ້ນຈະແຈ້ງໃຫ້ຊາບເປັນແຕ່ລະໄລຍະ